Mò Nguyễn Thị San là kòn cau Tày deh mờ dờng tàm ù tiah Nghĩa Đô, kơnhoàl Bảo Yên, càr Lào Cai. Mò San yal là, Nghĩa Đô là ù tiah yau, tiah mòn gơs, mblàng wơl ală bơta kuơ niam chài li la, cèng bơta niam chài mờ jơnau đơs, dà đơs bơh kòn cau Tày dê. Tiah do gam geh bơta pràn bơtàu tơnguh nhơl chờ mpồl bơtiàn. Broă yal tơnggit ală phan bơna ƀòn lơgar kung bè ală phan bơna niam chài kòn cau dê tus tơl nă cau là bơta pal geh ngan, ngan là tàm tơngai kông nghệ 4.0 bè tŭ do.

Bơdìh mờ broă tus bal broă lơh cau ùr bơh thôn ƀòn dê, broă lơh sơn sre, mò Nguyễn Thị San sùm lời tŭ tơngai nàng jòi tơrgùm, cih wơl ală jơnau đơs then, đơs cọi yau bơh Nghĩa Đô dê. Tus tŭ do, mò neh cih wơl geh 119 jơnau đơs cọi bơh yau bơh ƀòn lơgar dê mờ kơp kờñ bơto wơl rơnàng kơnòm să in tơnơ̆ do nàng pleh jơnau pơhìn gơtìp roh huĭ gùng đơs pơnđik bơh yau bè ồng dê. Kuơmàng, tàm tơngai kông nghiệp 4.0 tŭ do, broă lơh gơ rề ală bơta kuơ niam chài bơh yau ală jơi bơtiàn kòn cau dê neh gơ gơs ƀuơn rlau.

Bơh ală mạng xã hội bè: Facebook, Zalo, You Tube, TikTok neh gơ gơs bơta dong kờl uă ngan tàm broă tàm tơrbŏ, lơh gơ rề mờ prap gàr bơta kuơ niam chài gơ jat bal mờ bơtàu tơnguh nhơl chờ ai kòn cau Tày in. Jat Tiến sĩ Nguyễn Anh Cường, atbồ khoa niam chài jơi bơtiàn kòn cau dùl êt nă cau, hìu bơsram Đại họk Văn hóa Hà Nội yal, tŭ do, bơta gơ rềng bơh kông nghệ 4.0 neh mờ gam lơh tam gơl tơl bơta bơh rài kis kòn bơnus. Tŭ bol he git tŭ niam den bơta gơ rề tus ală mpồl bơtiàn tàm tiah do, geh tŭ tàm gùt dunia geh ƀuơn uă rlau: “Kung geh uă broă nàng prap gàr, yal tơnggit mơya jat añ bơta kuơmàng ngan rlau jơh kung gam là broă gàr wơl ală rùp hin. Hơ̆ là ală rùp hin pal geh tam gơl gơs sồ. Mờ kông nghệ 4.0 tŭ do den broă yal tơnggit ai phan soh, ai niam chài kòn cau in là ƀuơn ngan mờ uă broă lơh krơi is, broă lam lơh krơi is sơl. Kung ƀuơn ai broă lơh gơ rề ală jơnau tơnggit hơ̆. Ai lài do den pơyua dùl pang rùp là kal ke ngan, tŭ do bol he mìng click tàm măi tíñ là gơtùi jơh”.

Tŭ do Facebook, TikTok gam geh gal ngan cau tàm gùt plai ù ngui tài bơh dùl ròt ală bơta kuơ ngac ngar bè kờñ (like), tam pà bal (share), jat sền (follow), livestream… neh lơh gơlik anih ƀuơn ngan nàng tàm tơrbŏ bal, lơh gơ rề niam chài. Ală pang fanpage bơh hơ̆ kung geh lơh jat tơl tơngume ngan ngồn, bè: fanpage bè đơs then, đơs cọi, halà phan soh kòn cau, phan sa bơkah… Tàm hơ̆, gơ jat bal mờ broă yal tơnggit niam chài, là broă lơh bơtàu tơnguh nhơl chờ nàng tơnguh bơta kuơ phan lời wơl, pơgồp bơnah sơlơ chồl pràn bơta bơtàu tơnguh lơh sa.

Jat bi Đồng Thị Vân Hà, kòn cau Tày tàm ƀòn dờng Bắc Kạn, càr Bắc Kạn đơs, tŭ do ală phan gơ rềng tus niam chài kòn cau, bè: phan soh, đơs pơnđik halà ală phan tàñ mờ gle đơr bơh cau jơi bơtiàn kòn cau dùl êt nă cau dê ngai sơlơ geh yal tơnggit dùl bă li la, niam ngan bơh mạng xã hội. Pơn yơu bè dùl blah phan soh, ala mờ soh nàng lơh broă lơi halà tơmut tàmală homestay nàng yal tơnggit nac nhơl chờ in. Uă cau kơnòm să kòn cau Tày neh tơmut ală phan hơ̆ tàm anih kă bro điện tử, hơ̆ sồng tơmut tàm facebook, zalo, tiktok nàng yal tơnggit tơl nă cau in git bè phan soh kòn cau. Mơya do kung là broă lơh khi gam yal tơnggit bè niam chài kòn cau, bè phan cau Tày dê. Bi Đồng Thị Vân Hà pà git: “Tàm ƀòn dờng, uă cau geh bơta mờng kwèng blơi phan tàm mạng, añ kung git ngui măi mok kông nghệ, bal mờ ală cau kra, cau kơnòm, cau dờng, cau dềt rùp phan nàng tơmut tàm mạng, mờ bơta kơp kờñ phan geh mòn gơs ờ mìng geh tac tàm ƀòn, tàm càr, tàm lơgar, mờ gam wèt tus ngài rlau là tac hờ lơgar ndai”.

Tŭ do, bơta bơtàu tơnguh bơh ală mạng xã hội gan ù tiah nhàr dà lơgar dê neh lơh gơlik bơta ƀuơn nàng tìp mat lơh kwèng dunia, geh tŭ niam gơtùi rề ơnàng, mờ bơta pràn bè dà đơs lơgar ndai, bơta chài git gŏ, uă cau kơnòm să gơ wèt broă pờ ală pang You Tube mờ tơngume yal tơnggit niam chài, nhơl chờ Việt Nam geh bơtơl mblàng dà Mỹ dong bơyô ală lơgar ndai ƀuơn git, ƀuơn sền. Uă pang mạng geh lơh cồng nha ngan, ngan ngồn gơ gơs ală anih niam chài geh cau sền tàm lơgar mờ lơgar ndai sền gròi.