VOV4.Mnông – Ta Hà Nội, N’gâng kan tuch tăm mât rong n’hanh hun hao ƀon lan n’hanh Bôk nău kan Hun hao Liên Hợp Quốc (UNDP) lĕ ký sam ƀŭt nău nchrăp ƀư “N’hao dơi rchăng n’gang bah lŏ mir ntrong kan jêt đah rnă njrăng tu dak tă bah rgâl trôk nar nkual Tây Nguyên n’hanh Nam Trung Bộ”. Ƀư ký ton geh tât râng pơk sŏng dăng bah kruanh ăp n’gor tâm nkual nău nchrăp ƀư geh: Dak Lak, Dak Nông, Khánh Hòa, Ninh Thuận, Bình Thuận. Nău nchrăp ƀư mbơh bah aƀaơ tât năm 2026, dŏng tơm prăk ntop kơl hun hao na nê̆ (ODA) bah Tơm prăk nkrem trôk nar uĕh nđĭr tă bah UNDP. Nău nchrăp ƀư rgop ntrôl dăng rgâl trong nkra njêng lŏ mir rnăk, đêt nar, geh nău rdâng an ăp trong mkra geh rgum lĕ rngôch tă bah mât uănh tu dak. Dĭng lĕ tơm prăk bah lĕ rngôch nău nchrăp ƀư lah rlău 30,2 rkeh đôlar. Nău nchrăp ƀư mbra nsĭt uĕh tay an 222.400 nuĭh ƀon lan (lơn lah bu ur n’hanh nuĭh rnoi mpôl đêt) ta ăp n’gor Dak Lak, Dak Nông, Bình Thuận n’hanh Ninh Thuận.

Nuĭh rblang: Y Sưng Phê Ja