VOV4.M'nông: Bôk nău kan gưl neh dak mpeh hun hao wăng sa- rêh jêng kon nuĭh nkual rnoi mpôl đê̆ n'hanh mpeh yôk yang lvang năm 2021- 2030 nsrôih tât năm 2030 n'hŭch 50% xã dŭt jêr jŏt mha êng n'hanh hŭch 70% thôn ƀon dŭt jêr jŏt mha êng rđĭl đah aƀaơ. Gay dơi tât rnoh kan dja, rlău ma tơm prăk ntuh kơl bah Ngih dak, ân geh nău lăp kan bah lam trong kan chính trị ri dŭt ŭch geh du nuih n'hâm, nsum suan bah ăp rơh kơn ƀon lan.

Nar 18-6-2021, Ủy ban Dân tộc an n'gluh dŏng nău n'glêh an mbrô 433/QĐ-UBDT (QĐ 433), uănh an 22.027 thôn ƀon dŭt jêr jŏt mha êng nkual ƀon lan rnoi mpôl đê̆ n'hanh mpeh  yôk yang mpeh 40 n'gor, nkual ƀon têh. Aơ lah ntŭk nsing gay an ƀư ăp trong ntuh kơl, ntop kơl hun hao wăng sa- rêh jêng kon nuĭh bah tơm prăk ngân sách ngih dak lvang năm 2021 - 2025.

Tĭng nê, thôn ƀon dŭt jêr jŏt mha êng geh rnoh rnăk ach o ntơm bah 20% let lơ (đah nkual đồng bằng Sông Cửu Long lah ntơm bah 15% let lơ mô lah geh rlău 30 rnăk rnoi mpôl đê̆ ach o/thôn). Ăp thôn geh rnoh rnăk ach o ntơm bah 15% tât ta nâm 20% (đah  nkual Đồng bằng Sông Cửu Long ntơm bah 12% tât ta nâm 15%), lah geh rlău 60% rnoh rnăk ach o lah rnăk rnoi mpôl đê̆ tâm lĕ rngôch rnoh rnăk ach o bah thôn; mô hŏ geh trong bah thôn tât nklang xã mô lah geh trong yơn rsong hăn dŭt jêr jŏt, lơn lah khay mih; mô hŏ geh trong rse điện  ngih dak mô lah hŏ geh yơn rlău 30% rnoh rnăk mô hŏ dơi tât dŏng điện ngih dak ri dơi năl lah thôn dŭt jêr jŏt mha êng.

Rnoh kơp dơn lhăt lơn rơh bah năp nơh jêng tâm lvang năm 2021 - 2025, rnoh thôn ƀon dŭt jêr jŏt mha êng mpeh nkual rnoi mpôl đê̆ n'hanh mpeh yôk yang hŭch âk. Nău dja khuch tât trong kơl ta ăp n'gor; tâm nê, tât khuch dŭt kloh, dŭt ngăch lah ta trong kan dak si n'hanh ntĭm nti.

Ngăn an saơ, rnôk ƀon lan gŭ tâm săk thôn ƀon dŭt jêr jŏt mha êng, nuĭh ƀon lan dơi tât ndơ kơl bah Ngih dak tâm jŏ jong. Jêng, rnôk mô hôm dơi geh dơn ndơ kơl, du đêt nuĭh ƀon lan geh nău mĭn huăt ndal n'hanh geh nău lah mpeh nău rgâl dja.

Wa Giàng A Sáu, kruanh thôn Đồng Ruộng, xã Kiên Thành, nkuâl Trấn Yên, n'gor Yên Bái, lah ngoăy tâm ăp thôn luh bah săk thôn ƀon dŭt jêr jŏt mha êng tâm let năp tay nkoch mpeh nău ŭch rgŏ jă nuĭh ƀon lan tâm rơh mhe.

Nsrôih nkoch trêng rgŏ jă ăp mon său hăn nti ăp tŏng, mô an ăp mon său dja an geh ndul êng bah kơi. Lôch nê geh nău nkoch trêng an ƀon lan rvăt thẻ bảo hiểm y tế 100% đŏng.

Ân lah rjăp, ăp nău tât khuch mpeh thôn ƀon dŭt jêr jŏt mha êng tĭng QĐ 861 n'hanh QĐ 433 nklăp mbra khuch tât nău an ƀư trong ntop kơl tâm dâng; lơn lah nău tât khuch na nê̆ tât âk rnăk, lơn lah rnăk nuĭh rnoi mpôl đê̆. Ntŭk thôn ƀon dŭt jêr jŏt mha êng geh nău rgâl khuch tât âk nuĭh đŏng, lơn lah kon se nti, nai ntĭm, cán bộ, công chức, viên chức, nuĭh kan ta ntŭk gŭ n'hanh pah kan ta nkual dŭt jêr jŏt mha êng. Kon se nti mô geh trong kơl tĭng nkre đah nău rêh jêr jŏt bah ăp rnăk ƀon lan rnoi mpôl đê̆ nkual yôk prêh, nkual jru nga i mô đăp mpăn mbra jêng tât nău rgum kon se nti hăn tât jrô nti jêr jŏt, geh ma nău kon se ntlơi nti âk n'hanh hŭch rĭng way hăn nti ăp nar, khuch tât săk blău ntĭm nti, kơi năp nti ăp tŏng, jut bah mô gĭt rplay si ƀŭt, lơn lah đah ăp kon se nti ma ngai ir jay đah nhih nti, me bơ̆ kon se nti mô geh ndơ ma njŭn wơt ăp nar. Yơn me bơ̆ n'hanh kon se nti gĭt trong kơl mhe bah ngih dak, n'gâng kan ntĭm nti n'gor dja hŏ lor nchrăp ndơ̆ luh ăp trong nkra. Wa Đào Anh Tuấn, Groi Giám đốc Sở Giáo dục n'hanh Đào tạo n'gor Yên Bái an gĭt.

Sở hŏ ƀư tơm, kan nsum đah ăp nhih pah kan geh tât, ăp  nkuâl gay ntrôl dăng pah kan nkoch trêng, rgŏ jă, rgum kon se nti hăn nhih nti. Sở hŏ rdâk njêng  trong nchrăp, rgŏ jă trong tâm rŏng tâm kơl nsum tâm lam n'gâng kan, gay kơl ăp kon se nti nkual rnoi mpôl đê̆, ƀon lan geh ntŭk gŭ wăng sa rêh jêng kon nuĭh jêr jŏt đah trong rƀŏng lah "nhih nti kơl nhih nti, jrô nti kơl jrô nti, kon se nti nkual geh nău rêh mbơm oi kơl kon se nti geh nău rêh jêr jŏt". Rgum ôp uănh tay ăp tŏng lam lĕ rngôch ăp nuĭh mô dơi geh trong kơl tă bah ăp xã, thôn hŏ dơi luh bah săk nkual dŭt jêr jŏt mha êng, gay rgŏ jă ăp tơm ndơ tĭng trong nchrăp bah lam rêh jêng kon nuĭh kơl ƀư, ntop kơl ăp kon se nti geh nău rêh jêr jŏt, tâm pă ăp kon se nti jay gŭ ngai đah nhih nti yơn mô dơi plơ̆ hăn tâm nar ma mô geh sa ăp ndơ kơl ri mbra dơi an gŭ tay ta ăp jay an  gŭ n'gul nar bah nhih nti.

Ăp nuĭh ƀon lan ân gĭt lah, wăng sa- rêh jêng kon nuĭh nar lơn ma hun hao, nău rêh drăp ndơ, nuih n'hâm dơi n'hao prêh tâm ban đah nău ăp trong ntop kơl bah Ngih dak mbra hŭch đêt. Gay ƀư jêng dơi ngăn ngăn nău ŭch rŏng nsan hao ƀư geh ndrŏng ri mô dơi ndjôt nău mĭn "klach geh ndrŏng" ma ân nsrôih, ndôr êng, ŭch nsan hao ngăch đăt ndal.

Hôm đah n'gâng kan n'hanh rmôt cán bộ, kruanh rđău kan tâm dâng, lơn lah ăp n'gor geh tât khuch bah trong kơl, mô geh nău nter jêr, ma dơn nsrôih ƀư dơm. Ndrel đah nê, ăp n'gor ân lor nchrăp, blău ƀư mhe tâm trong rgum, ndop nkre, dŏng geh nău tam tơm ndơ ntuh kơl an pah kan n'hŭch ach o, uănh khlay pah kan ntĭm nti nău kan, nta joi nău kan, pơk hvi joi trong wăng sa, n'hao nău geh an nuĭh kan ta ăp n'gor gay nuĭh ƀon lan mô hôm wĭ wĕ, rvê rnôk tât khuch bah trong kơl mhe.

Nău lăp kan dơn kan bah n'gâng kan tâm dâng, ndrel nsum suan, du nuih n'hâm bah ăp rơh kơn ƀon lan mbra ƀư an tơm ndơ ntuh kơl, ntop kơl bah ngân sách ngih dak mât uĕh nău tam. Gay ntơm bah nê, nkual rnoi mpôl đê̆ n'hanh mpeh yôk yang "mô geh ndul êng bah kơi", ndrel đah lam dak dơi tât đah rnoh kan bah Nghị quyết Đại hội tâl XIII bah Đảng lah ndơ̆ neh dak he jêng dak hun hao geh rnoh wăng sa âk tâm năm 2045.

VOV4- Nuĭh rblang: Điểu Thân