VOV4.M'nông: Tĭng ƀư si ƀŭt njuăl bah Thủ tướng Chính phủ mpeh lor nchrăp rdâng lơh đah phŭt Rai, kơp ntơm bah nar 17/12, ăp n'gor nkual ƀon têh mpeh miền Trung mpăng ăp duk mpan hăn nklang dak lêng, lĕ ma duk mpan nchuăn rdeng tâm dak nơm. Nkual ƀon têh Đà Nẵng hŏ mpăng ăp duk mpan hăn nklang dak lêng; dăp rgum duk mpan der phŭt nsrŭng kât đăp mpăn ta nkual der phŭt duk mpan Thọ Quang n'hanh ăp ntŭk kât nsrŭng duk mpan hŏ ơm dơi dăp rgum....Ntơm bah 12 mông nar 17/12, Bộ Chỉ huy Tahen n'har bri n'gor Quảng Nam n'hanh ăp nkuâl, thị xã, nkual ƀon têh meng dak lêng mpăng ăp duk mpan hăn nklang dak lêng. Nkre, ăp ntŭk kan tahen mbơh an duk mpan hôm gŭ nklang dak lêng lor nchrăp sĭt kơh, joi ntŭk gŭ nde đăp mpăn. Ta n'gor Bình Định, ăp nkuâl hŏ đă ăp duk mpan dôl gŭ  hăn nklang dak lêng ngăch luh du bah nkual klach rvê. Hŏ geh rlău 50 tơ̆ bôk duk lơh joi ka đah nklăp 500 nuĭh ƀon lan ăp n'gor Quảng Nam, Quảng Ngãi, Bình Định, Phú Yên n'hanh Khánh Hòa lăp tâm ăp ntŭk gŭ nde gôl dak Song Tử Tây n'hanh gôl dak Sinh Tồn, nkuâl Trường Sa gay der phŭt Rai.

Nuĭh rblang: Điểu Thân