VOV4.M’nông: Pơh rlau aơ, Uỷ ban MTTQ Việt Nam ăp n’gor tâm nkuăl Tây Nguyên hŏ ƀư jêh nau nchrăp rƀŭn tal 3 gay nchih moh săk ăp nŭih tŏng nau dơi geh săch kan tâm Quốc hội gưl XV ndrel ntơh măt HĐND gưl n’gor năm kan 2021-2026. Nau nchrăp ân nar săch kan dôl geh ăp nkuăl ƀư tĭng di nau ntrŭnh bah pháp luật.

            Ta nar rƀŭn nchră tal 3 bah cử tri Gia Lai, jêh rnôk nchră geh 100% ntoh măt tâm ban đah moh săk bah 10 nŭih geh mbơh săch pah kan Quốc hội gưl XV. Rơh rƀŭn hŏ ndơn ân 3 nŭih dăn rhuăt luh bah moh săk mô ŭch râng ân săch Quốc hội gưl XV. Rơh rƀŭn kŏ nchih moh săk 119 nŭih ntoh măt HĐND n’gor Gia Lai gưl XII, năm kan 2021-2026. Tĭng wa R’chăm Hdéo, nŭih kan tâm rmôt săch kan bah n’gor Gia Lai, ăp nŭih ân geh rhuăt luh bah moh săk ntơh măt Quốc hội gưl XV lah nŭih ŭch êng, mô geh khuch tât nroh ăp nŭih ân geh săch ntơh măt Quốc hội gưl XV:

             ‘Bah rơh rƀŭn nchră tal 3 ân saơ geh 3 nŭih ŭch geh rhuăt luh bah rnoh moh săk ntơh măt Quốc hội gưl XV aơ ri bah nau rƀŭn nchră ndrel sŏk nau rgop bah cử tri ri 3 nŭih aơ tŏng nau dơi gay ân geh săch ntơh măt Quốc hội, yơn ăp nŭih aơ ŭch êng nau mô ân geh săch lăp kan tay ôh ri tĭng săk gâp nơm ri ân geh ryơk nau ŭch bah khân păng, nau aơ mô geh nau khuch tât rnọh geh, nŭih bah rmôt kan ntơh măt quốc hội n’gor Gia Lai”.

            Wa Đinh Ngọc Hải, Groi Kruanh uỷ ban MTTQ Việt Nam n’gor Gia Lai mbơh, jêh rơh rƀŭn nchră tal 3, Uỷ ban săch kan n’gor Gia Lai nchih moh săk lah 14 nŭih râng ân geh săch kan ntơh măt Quốc hội gưl XV (tâm nê geh Trung ương mbơh 4 nŭih, n’gor geh 10 nŭih).

             ‘Jêh rnôk tă geh nau dơi bah rơh tâm nchră tal 3 ri mra nchih moh săk ăp ri tă bah nê Rnâng kan MTTQ Việt Nam n’gor ndrel n’gâng kan ăp gưl mra tâm rgop đah UBND ndrel gưl ndâk nau nchrăp ăp nŭih ân geh săch ntơh măt Quốc hội ri kŏ kơt lah ăp nŭih ân geh săch HĐND n’gor ƀư rƀŭn mâp cử tri gay bonh đă ân săch nơm gay ntoh nau kan nau dơi bah nơh. Bah nê kơl an cử tri gĭt kloh mpeh nau kan bah ăp nŭih lah geh nau dơi săch ri mra ƀư nau kan bah nơm tâm ntrong kan n’gâng kan ăp gưl mhâm ƀư”.

            Tâm Dak Lak, pơh rlau aơ, ndrel nau kan ƀư rƀŭn nchră tal 3, Uỷ ban MTTQ Việt Nam hŏ mbơh nau tă geh ƀư sŏk nau uănh ndrel nau rnơm bah cử tri tâm ntŭk gŭ. Tâm ban rnoh moh săk bah ăp nŭih tŏng nau dơi ntợh măt Quốc hội gưl XV, ndrel tŏng dơi ntơh măt HĐND n’gor, năm kan 2021-2026. Bah tâm nchră, rơh tâm nchră tal 3, ăp ntơh măt hŏ yơr ty tâm ban nau moh săk bah 1 1nŭih geh râng săch ntơh măt Quốc hội XV (ê kơp 4 nŭih lah ntơh măt Trung ương mbơh), tâm ban ân du hê nŭih rhuăt luh bah moh săk ân geh săch ntơh măt Quốc hội gưl XV. Rơh rƀŭn nchră tâm ban rnoh 125 nŭih tŏng nau dơi ân geh săch HĐND n’gor, năm kan 2021-2016. Wa Nguyễn Thị Thu Nguyệt, Kruanh , Kruanh Rmôt kan bu ur Việt Nam n’gor Dak Lak mbơh, Gay rƀŏng geh nkô̆ 30% nŭih bu ur jêng ntơh măt HĐND ăp gưl, rmôt kan mra ƀư 4 jrâu ntĭm mbơh tâm ăp nkuăl Krông Ana, Ea H’Leo ndrel nkuăl ƀon têh Buôn Ma Thuột, ân rlau 300 nŭih bu ur rơh bôk năp râng ân geh săh pah kan HĐND ăp gưl:

             ‘Phung hên ân lah, aơ lah âk nau kan gay ma năn ân ăp nŭih aơ mpeh nau gĭt, nau blau gay ma bonh đă ân geh săch lăp kan đăp mpăn ân rnôk geh săck, geh nau dơi, nau gĭt, nau blau, nau kan gay ma lăp tâm nau bonh đă săch kan dăch tât ân geh nau dơi ueh ngăn. Ngăn lah, tĭng rnoh ndŏ luh ri nsôih ân đăp mpăn geh 30% nŭih lah bu ur jêng nŭih ntoh măt HĐND ăp gưl”

            Ta Dak Nông, jêh rnôk tâm nchră, 100% ntoh măt râng rƀŭn nchră hŏ yơr ty tâm ban moh săk bah ăp nŭih tŏng nau dơi geh ân săch ntơh măt Quốc hội gưl XV geh 10 nŭih (tâm nê Trung ương mbơh 2 nŭih, n’gor mbơh 8 nŭih) ndrel tâm ban ân 3 nŭih geh nau dăn luh bah nau săch kan ntơh măt Quốc hội gưl XV. Nkre lah, rơh rƀŭn kŏ nchih moh săk 88 nŭih tŏng nau dơi gay ntơh măt HĐND n’gor Dak Nông, năm kan 2021-2026. Wa Điểu Xuân Hùng, Kruanh Uỷ ban MTTQ Việt Nam n’gor Dak Nông, mbơh:

             ‘Jêh rơh rƀŭn nchră tal 3 hŏ lôch, năm kan bah Uỷ ban rnâng kan MTTQ n’gor Dak Nông, phung hên mra nchih tŏng moh săk ntơh măt Quốc hội gưl XV ndrel HĐND n’gor. Phung hên mra jur tâm tâm dâng gay ma uănh, kơp ân ngăn rnoh nŭih ƀon lan, cử tri ê tâm ban đah moh săk hôm geh nau kol ri ân geh nau đăp măpn nau săch kan ân ƀon lan ƀư tơm, tâm di luật. Ndrel ma nau mêt uănh ăp ntơh măt Quốc hội gưl XV ndrel HĐNĐ ăp gưl, phung hên mra hăn bonh đă nŭih ân geh săch hăn kan tât ăp ntŭk nê đê̆ ngăn 10 tŏ, hôm ntoh măt HĐND n’gor ri ân geh tât du ntŭk đê̆ ngăn 5 tŏ tĭng nau ntrŭnh”.

            Jêh rơh rƀŭn nchră tal 3, uỷ ban săch kan ăp n’gor tâm nkuăl Tây Nguyên mra lŏ ntơm ƀư nau nchrăp ăp nhoat gay geh ăp nŭih ƀư nau bonh đă săch kan, mbơh nau ma cử tri mpeh nau nchrăp bôk nau kan bah nơm gay ma ƀư nau kan ntoh măt lah geh săch ndrel tâm nchră mbơh nau kan ma cử tri hôm uănh khlay./.

                                                Nŭih rblang: H’Thi