VOV4.M’nông – Gay tâm pă đah nuĭh ƀon lan geh nău rêh jêr jŏt yor khuch bah chôt srê Covid-19, Hội Doanh nhân druh ndăm n’gor Dak Nông ƀư “ATM phe mô sŏk prăk” pă âk tấn phe an dơm ntop kơl kônh wa. Ăp ATM aơ dôl dơi pơk hvi ta ăp ntŭk geh khuch yor srê Covid-19 ta n’gor.

ATM phe răm nuih n’hâm nuĭh ƀon lan jêr jŏt tâm rơh chôt srê Covid-19

Đah trong way ƀư nuĭh geh tât an, nuĭh jêr jŏt tât sŏk “ATM phe mô sŏk prăk” yor Hội Doanh nhân druh ndăm n’gor Dak Nông ƀư jêh 4 nar lĕ pă geh rlău 6 tấn phe an rlău 2.000 nuĭh ƀon lan geh nău rêh jêr jŏt ta nkual ƀon têh Gia Nghĩa. Tĭng nô Nguyễn Ngọc Chính, Kruanh Hội Doanh nhân druh ndăm n’gor Dak Nông rlău ma pă phe ta nkual ƀon têh Gia Nghĩa, ATM phe mô sŏk prăk mbra ƀư pă phe an dơm kônh wa jêr jŏt ta ăp nkuăl Dak Rlâp, Tuy Đức n’hanh Dak Glong.

Nŭih rblang: Y Sưng Phê Ja