VOV4.M’nông - UBND nkual ƀon têh Buôn Ma Thuột, n’gor Dak Lak lĕ geh công văn an kơt dŏng du đêt trong njrăng n’gang srê Covid-19 ta nkual ƀon têh. Tĭng nĕ, ntơm bah 6 mông nar 6/1 UBND nkual ƀon têh Buôn Ma Thuột mbra an ƀư ăp nău kan tâm jay, bah dih đah nău nkol: rgum mô rlău 60 nuĭh tâm du ntŭk n’hanh rlău 90% nuĭh râng dơi chuh tŏng 2 nglai vaccine mô lah bah ji Covid-19 mô rlău 6 khay, tŏng ăp ƀư tĭng 5K. Êng ƀư nsông sao, khĭt ôm n’hŭch rnoh nuĭh râng n’hanh geh groi nđôi bah n’gâng kan ƀon lan. An nău kan rdêng năch tĭng trong tâm nkual ƀon têh n’hanh n’gor, ndeh buýt, taxi, tâm ton, pâl nđaih; ăp ntŭk tăch rgâl ndơ ngêt sa dơi kan plơ̆ tay yơn an ƀư tĭng ăp trong đăp mpăn njrăng n’gang srê Covid-19. Êng ăp ntŭk tăch rgâl ndơ ngêt sa knŭng dơi rhŏ an mô rlău 20 nuĭh tâm du ntŭk. Đah nău plơ̆ tay ngih sam ƀŭt, công văn đă wah rlu ăp nău ƀư ntĭm nti đah gưl mầm non. Ƀư nău kan ntĭm nti ta jrô đah rmôt jrô 9 n’hanh jrô 12, kơp bah nar 10/1/2022. Đah ăp jrô gưl I, II, III hôm e ƀư ntĭm nti tĭng trong trực tuyến.

Nŭih blang: Y Sưng Phê Ja