VOV4.M'nông: Tâm bah ri aơ nơh, nơm geh nău nchrăp lor, nsrôih bah ăp gưl, ăp n'gâng kan n'hanh n'gâng kan tâm dâng, rnoh âk kon se nti, sinh viên râng bảo hiểm y tế dôl hao âk mbrơi. Năm nti 2020- 2021, rnoh kon se nti, sinh viên râng BHYT lah rlău 18 rkeh (hao 1,6% rđĭl đah năm nti 2019-2020) n'hanh 3,5 rkeh kon se nti, sinh viên râng tĭng rmôt êng. Tâm năm nti 2021- 2022, n'gâng kan Bảo hiểm xã hội (BHXH) nsrôih geh 100% kon se nti, sinh viên râng BHYT, kơl rơh kơn let năp tay dơi tât, dŏng ăp nău geh bah lam rêng kan đăp mpăn rêh jêng kon nuĭh.

Ăp năm dăch aơ, nơm geh lor nchrăp, nsrôih bah ăp gưl, ăp n'gâng kan n'hanh n'gâng kan dơi kan ta ntŭk rnoh âk kon se nti, sinh viên râng BHYT hao rlău ăp năm. Năm nti 2020- 2021, bol ma tât khuch bah nuh srê COVID-19 yơn nău kan ƀư trong kơl BHYT kon se nti, sinh viên hôm geh ăp nău dơi uĕh đah rlău 18 rkeh kon se nti, sinh viên lam dak tât râng đŏng. Oh Nguyễn Thị Kim Hường, nti jrô 12 B1 nhih nti THPT Dương Đông, nkual ƀon têh Phú Quốc, n'gor Kiên Giang an gĭt, thẻ BHYT nsĭt tay âk nău uĕh an kon se tâm rnôk hăn kơt nti:

“Rnôk geh  thẻ BHYT ri mpôl hên mô hôm geh nău rvê, lơn lah đah ăp rnăk mô geh ndơ wăng sa ri lơn ma saơ đăp mpăn lơn. Trong kơl bah ngih dak pă an thẻ BHYT, rnôk he geh kop ji, rnôk geh thẻ BHYT ri he mô hôm rvê roh prăk hăn but săm ji ta nhih dak si".

        Ta năp nô nău nuh srê Covid-19 tât krit nji, gay tât rnoh 100% kon se nti, sinh viên râng BHYT tâm năm nti 2021- 2022, BHXH Việt Nam hŏ đă BHXH 63 n'gor, nkual ƀon têh n'hao dăng nkoch trêng mpeh trong kơl BHYT ma âk trong ƀư ngăch, tâm di; an lor tơm ndơ ntop kơl tay rnoh BHYT an kon se nti, sinh viên, lơn lah đah ăp nuĭh geh nău rêh jêr jŏt, ƀon lan rnoi mpôl đê̆...rlău ma nê, kan nsum tay đah n'gâng kan ntĭm nti an ƀư pah kan BHYT kon se nti, sinh viên, jao rnoh tât kan an tĭng ntŭk ntĭm nti. Lôch jêh an ƀư trong kan lah rnoh uănh năl tâm rlong, nkhôm rnê bah ăp nhih nti. Wa Nguyễn Hoàng Hà, Kruanh jrô pah kan chính trị n'hanh mât uănh sinh viên, Nhih nti Đại học Kinh tế Quốc dân an gĭt, pah kan nkoch trêng mpeh BHYT kon se nti, sinh viên dơi nhih nti ƀư ngăch ngăr, ma âk trong ƀư, nsrôih 100% sinh viên nhih nti râng BHYT:

          “Tâm pơh sinh hoạt bôk năm nti, kơp lĕ ma ta n'gul năm n'hanh kêng dŭt năm, mpôl hên geh du nkô̆ nkoch trêng dŭt dăng, mpeh nău way kon se nti sinh viên, bah meng nê lah nkoch trêng mpeh BHYT. Rnoh 100% kon se nti sinh viên râng BHYT lah rnoh uĕh yơn gay dơi tât rnoh ri hôm âk jêr jŏt đŏng. Jêng nê, đah ăp kon se nti sinh viên geh nău rêh jêr jŏt, mô dơi rvăt BHYT ri mpôl hên mbra joi trong kan  gay droh rklaih an ăp kon se”

        Tĭng wa Đinh Mai Hạnh, Groi kruanh Ƀan sŏk rgum, BHXH Việt Nam,  BHYT kon se nti sinh viên aƀaơ dôl geh ngân sách Ngih dak ntop kơl 30%. Ăp kon se nti sinh viên mpeh săk dơi kơl nuĭh geh n'hâm suan, ntop kơl lam rêh jêng kon nuĭh, ƀon lan rnoi mpôl đê̆...dơi pă an thẻ BHYT. Rlău ma nê, du đêt n'gor hôm ntop tay du đêt trong ntop kơl mha êng ntop kơl tay an kon se nti sinh viên rnôk râng BHYT, rnoh prăk dŏng but săm ji an kon se nti sinh viên tă bah Prăk nkrem BHYT trok tâm tâm ăp năm dăch aơ hao tât hang rbăn rmen prăk/năm. Mô đêt kon se nti sinh viên dơi trok prăk but săm ji đah rnoh prăk âk, hao tât hang rhiăng rkeh prăk.

        Lơn lah, ntơm bah bôk năm 2021 tât aƀaơ, nuĭh râng BHYT, tâm nê geh rlău 18 rkeh kon se nti sinh viên, dơi geh dơn âk trong kơl mhe ăp tŏng lơn. Ntoh lư lah mbluh soih trong bĭch săm ji đah but săm ji BHYT dơi an ƀư lam dak ntơm bah nar 1/1/2021, kơl du đêt  nuĭh râng BHYT săm ntŭk êng hôm dơi trok 100% prăk gŭ bĭch săm ji tâm ban kơt di ta ntŭk nơm đŏng. Wa Đinh Mai Hạnh an gĭt:

          “Tâm rnôk nuh srê Covid tât krit nji, ntơm bah khay 8, mpôl hên hŏ geh si ƀŭt rđău đău đă jŭr BHXH ăp n'gor, nkual ƀon têh. BHXH ăp n'gor dôl nsrôih an ƀư du đêt trong nkra gay năm aơ rmôt nuĭh kon se nti sinh viên ân râng ăp tŏng. Gay nsrôih geh nkrum lam lĕ rngôch BHYT lah nsum ri he ân hun hao ăp rmôt kơt BHYT kon se nti sinh viên n'hanh ăp rmôt nuĭh dơi ngân sách ngih dak ntop kơl"

        Nău geh bah nău râng BHYT hŏ dơi an uănh năl di, yơn aƀaơ lam dak hôm 3% kon se nti sinh viên, tâm ban đah bơi 600.000 nuĭh mô hŏ dơi râng. Nău dja ƀư du đêt băl mom n'hanh rnăk wâl bah khân păng mô geh ăp tŏng nău dơi. Năm nti mhe 2021 - 2022 hŏ dăch tât, gay tĭng ƀư geh nău dơi rnoh tât geh 100% kon se nti sinh viên râng BHYT, nta trong dơh kơl ăp kon se hun hao lam lĕ rngôch lĕ mpeh bôk rngok n'hanh săk suan, dŭt ŭch geh nău lăp kan dăng bah lam trong kan chính trị ntơm bah Trung ương tât ăp n'gor. Lơn lah nău khlay ƀư tơm, nău dơn kan bah ăp nhih nti, nai ntĭm nti tâm nău rgŏ jă kon se nti sinh viên, tâm ban kơt me bơ̆ bah ăp kon se râng BHYT kon se nti sinh viên, rgop n'hao săk geh mât chăm n'hâm suan an rơh kơn mom ndăm bah kơi tay./.

Nuĭh rblang: Điểu Thân