VOV4. M'nông: Ta xã Trung Lý, nkuâl Mường Lát, n'gor Thanh Hóa mhe ƀư lễ pă an jay ntĭt uănh lor n'hanh ntop kơl ƀư jay an rnăk ach o, jêr jŏt mpeh jay gŭ. Aơ lah bôk nău kan tă bah Bộ Công an lor nchrăp kan nsum đah n'gor Thanh Hóa n'hanh Ngân hàng Thương mại Cổ phần Ngoại thương Việt Nam Vietcombank ntop kơl "Rdâk njêng 600 mblâm jay an rnăk ach o ta nkuâl Mường Lát”.

Tĭng trong nchrăp, bôk nău kan mbra ntop kơl 30 rmen prăk an nkuâl Mường Lát gay rdâk njêng 600 mblâm jay an ăp rnăk ach o. ăp mblâm jay rnoh khlay 50 rkeh prăk đăp mpăn di rnoh 3 nâp: "jâng nâp, chor nâp, mpir nâp" tĭng weh ƀư bah Bộ Công an. Mường Lát lah nkuâl dŭt ach o bah n'gor Thanh Hóa n'hanh lah ngoăy tâm 56 nkuâl dŭt ach o lam dak. Nău ngăn geh dja, Bộ Công an hŏ rđău đă ăp đơn vị mpeh n'gâng kan gŭ mĭn dăn đă ƀư jay ntĭt lor, trong ƀư, trong nkra jay gŭ gay Công an n'gor Thanh Hóa ƀư tơm nsum ti ndrel kônh wa nkuâl Mường Lát rdâk njêng, nkra jay gŭ, rgop đăp mpăn nău rêh nuĭh ƀon lan ach o. Aƀaơ hŏ ƀư lôch jêh 9 mblâm jay ntĭt leo lor n'hanh nsrôih tât kêng dŭt khay 5/2021 mbra ƀư lôch jêh 600 mblâm jay tâm rŏng n'hanh jao an ăp rnăk ach o bah nkuâl Mường Lát.

Nuĭh rblang: Điểu Thân