VOV4.M'nông: Nkual ƀon têh Buôn Ma Thuột, n'gor Dak Lak lah ngoăy tâm ăp nkual ƀon têh geh rnoh nkrum n'hâm tơm si dŭt âk lam dak, rlău 8m2/ nuĭh. Mbor tơm si bah nkual ƀon têh Buôn Ma Thuột dôl njêng luh ntŭk n'hâm uĕh di an nău rêh nuĭh ƀon lan n'hanh ntŭk nkah uĕh đah năch hăn pâl nđaih. Nkual ƀon têh Buôn Ma Thuột nar aơ lah nău dơi geh bah âk rach năm uănh khlay tăm n'hanh nău dja dôl ma mât uĕh tay tâm ăp bôk nău kan, nghị quyết rƀŏng trong hun hao bah nkual ƀon têh tât năm 2030, uănh ngai tât 2045.

  Nar bôk năm mhe, yuh Nguyễn Thị Loan ndrel 5 công nhân bah Đội 2, Công ty TNHH MTV môi trường Osaka luh hăn mât chăm kao si ta Ndah rup Wa Hồ đah kon se jê̆, trong Lê Duẩn, nkual ƀon têh Buôn Ma Thuột. Đah âk nuĭh ƀon lan, ăp công nhân kơt yuh Loan lah ăp nuĭh blău ngăn, lĕ nuih n'hâm mât chăm, khân păng hŏ rgop mât chăm, n'hanh nkrơ̆ uĕh rup kao, si gle rêh an nkual ƀon têh. Yuh Loan dŭt rhơn rnôk n'hâm suan bah ăp yuh tâm rmôt dơi nuĭh ƀon lan nchih nkah:

“Uănh nsum dơi ƀư uĕh an ăp nuĭh hăn nchrâng rup, ăp nuĭh tât khâl rnê uĕh lah dŭt rhơn. He saơ hăn kan ta aơ he n'hao êng săk kloh uĕh, âk nuĭh tât pâl rlưn lah saơ lŏng nuih n'hâm hôm. Năm mhe ri dăn an nuh srê ngăch rlău bah, ăp nuĭh tâm mâp nsum rhơn mƀak.”

Tât năm 2022, nuh srê Covid-19 ta Buôn Ma Thuột hŏ rngot rngăt oi, nău rêh dôl mbrơi plơ̆ tay kơt ơm mhe. Mô lŏk li hăn jâng thể dục nar bôk năm mhe ta Công viên Sơn La bah năp jay, wa Trần Đức Hoà, trong Y Ơn, phường Tân Thành, nkual ƀon têh Buôn Ma Thuột dŭt rhơn rnôk ngih dak hŏ uănh khlay ntuh kơl ƀư ntŭk dja. Păng an gĭt, ntơm bah du blah neh an ntlơi dơm đah âk nuĭh tih djơh, aƀaơ hŏ jêng du công viên uĕh reh n'hanh păng lơn ma geh nkô̆ khlay đah nuĭh ƀon lan lôch bah kơi nuh srê:

“Nuĭh ƀon lan dŭt rhơn nđơr, geh ntŭk tập thể dục, geh ntŭk an kônh wa, ăp mon său pâl rlưn, geh mông nar hăn pâl nđaih, rlu rlău lôch sĭt hăn kan ŏ r'ah. Aơ lah lha klơm soh bah nkual ƀon têh n'hanh bah êng an nkual dja. Gâp hŏ hăn âk ntŭk yơn he ân dơi lah nkual ƀon têh Buôn Ma Thuột lah geh tơm si dŭt uĕh lam dak. Ngih dak uănh khlay, ntuh kơl âk. Nkual ƀon têh dăp rgum rĭng uĕh, geh dăp rgum dŭt ăp grep.”

Dâk hao bah hăch rlâm âk tâm lơh tâm su n'hanh n'huk neh môi neh guh, mô jŏ, Buôn Ma Thuột hŏ tât nău rsang rnglăy tâm nău hun hao. Ăp njônh kual ƀon têh, ăp yăng kao, công viên, quảng trường mpơl nău hun hao nđĭr uĕh, rƀŏng tât nău geh nsum an lam nuĭh ƀon lan. Leo kon hăn pâl kual ƀon têh tâm nar bôk năm, yuh Trần Thị Yến, phường Tự An, nkual ƀon têh Buôn Ma Thuột saơ dŭt di nuih n'hâm đah ăp rnoh khlay dơi njêng luh bah ăp mbor tơm si n'hanh công viên, hoa viên tâm ban kơt ăp nkual bri lha paih “bri krŏng tâm kual ƀon têh":

“Ta Buôn Ma Thuột he ri gâp saơ dŭt âk công viên, tơm si n'hâm. Lơn lah ăp trong me ri tơm si têh dŭt âk, păng ƀư n'hâm sial ta aơ kloh uĕh, dŭt đêt n'huk djơh, he saơ gŭ rêh ta aơ đăp mpăn, rêh ta aơ gâp saơ dŭt gân uĕh.”

Rdâk njêng “nkual ƀon têh nđĭr uĕh" mô dơn ta trong nkual ƀon têh, công viên ma nău dja hôm mpơl ta jâng gung ăp nhih pah kan, n'gâng kan n'hanh ăp rnăk ƀon lan đŏng. Ăp nhih pah kan ngih dak rnôk ăp tơ̆ mon mhe, nkrơ̆ uĕh way uănh khlay mât tay tơm si têh ơm yău n'hanh tăm tay tơm si mhe đŏng. Hôm ăp ƀon tâm nkual ƀon têh, nđĭr uĕh bah tơm si way geh âk gay njêng luh nău nkah uĕh ndjôt săk tơm  văn hoá Tây Nguyên têh hvi.

 Wa Võ Kỳ, Groi kruanh jrô kan mât uănh nkual ƀon têh Buôn Ma Thuột an gĭt, tĭng Nghị quyết bah Quốc hội mpeh tâm pă ntil đô thị, đah nkual ƀon têh ntil I mpeh n'gor mât, rnoh hvi neh an tăm tơm si tâm trôm nkual ƀon têh geh 5- 6m²/nuĭh. Tâm rnôk nê, rnoh âk tơm si ta trôm nkual ƀon têh Buôn Ma Thuột tât năm năm 2021 hŏ geh tât 8,11m2/nuĭh n'hanh lam nkual ƀon têh lah 17,4m2/nuĭh. Đah nău dơi geh dja, Buôn Ma Thuột aƀaơ lah ngoăy tâm ăp nkual ƀon têh geh rnoh tơm si dŭt âk lam dak. Tĭng ƀư bôk nău kan 1 rkeh tơm si bah Chính phủ, năm rlău aơ, nkual ƀon têh hŏ nsrôih an ƀư n'hanh hŏ dơi geh tăm rlău 6.000 tơm. Nău ŭch tât năm 2022 mbra tăm âk tay đah ăp ntil tơm si ntĭt êng  ta Tây Nguyên:

“Aƀaơ tăm tơm si hoa viên, công viên ta nkual ƀon têh Buôn Ma Thuột lơn âk rgum ăp ntil tơm si ta ntŭk nơm, ndjôt săk tơm êng an nkual ƀon têh Buôn Ma Thuột tâm ban kơt nkual Tây Nguyên. Dŏng ăp ntil tơm kơt tơm n'ger, tơm Rte, tơm nâng, tơm rnhông mô lah tơm Kơ Nia, aơ lah du đêt ntil tơm tăm mpôl hên nsŏng kơl an Thành uỷ, UBND tăm ta nkual ƀon têh."

Wa Vũ Văn Hưng, Kruanh UBND nkual ƀon têh Buôn Ma Thuột an gĭt, gay rdâk njêng nkual ƀon têh nđĭr uĕh kơt aƀaơ, âk rach năm rlău aơ, ăp rơh kơn kruanh rđău kan bah n'gor, bah nkual ƀon têh hŏ way uănh khlay n'hanh geh trong uănh jong, geh dăp rgum hun hao tăm mbor tơm si du trong rĭng grep. Tât aƀaơ trong uănh nê dôl dơi mât uĕh tay gay rdâk njêng nkual ƀon têh Buôn Ma Thuột di lah nkual ƀon têh nđĭr uĕh bri dak, săk tơm n'hanh uĕh mhe tĭng nău n'glôch jêh 67 bah Bộ Chính trị mpeh rdâk njêng, hun hao nkual ƀon têh Buôn Ma Thuột tât năm 2030, uănh ngai tât năm 2045.

Tĭng bôk nău kan tĭng ƀư Nghị quyết Đại hội Đảng bộ nkual ƀon têh tâl XV, năm kan 2020- 2025, hvi neh tăm tơm si ta trôm nkual ƀon têh tât lĕ dŭt năm kan mbra hao tay 9m²/nuĭh. Aơ lah nău kan jêr rnôk rnoh nuĭh nar lơn ma âk rnôk rnoh neh an dŏng nsum n'hanh prăk ngân sách mpêt đê̆, yơn nkual ƀon têh nsing nơm mbra dơi tât đah ăp bôk nău kan, rƀŏng trong na nê̆.

 “Nău mĭn bah nkual ƀon têh lah n'hao âk tay, rlău 9m²/nuĭh ta trôm nkual ƀon têh n'hanh 18m²/nuĭh lam nkual ƀon têh. Gĭt lah n'hao mbra dŭt jêr yor nuĭh ƀon lan mbra hao âk nuĭh n'hanh rnoh hvi neh an tăm tơm si nar lơn ma đêt. Ndrĭ ri rgum cán bộ, công nhân viên chức ăp năm geh nar Tết rgŏ jă tơm si ri dŭt đêt ăp nuĭh tăm du tơm. N'hanh ăp nkual ƀon têh mhe hao ri an ntuh kơl ƀư ăp hoa viên, lĕ rngôch hoa viên geh ntuh kơl ăp kôp da dê".

 Đah trong uănh jŏ jong, dăp rgum ăp tŏng rĭng grep n'hanh nău uănh khlay ntuh kơl di rnoh, Buôn Ma Thuột dôl mbrơi dơi rdâk njêng gay di đah nkual ƀon têh rgum tơm Tây Nguyên. Tâm ăp nău dơi bah nkual ƀon têh, ntŭk ntoh lư dôl dơi năl geh nê lah mbor tơm si dơi ntĭt kơt "bri krŏng tâm nkual ƀon têh", njêng luh ntŭk gŭ rêh nđik uĕh an nuĭh ƀon lan n'hanh wăch rgum năch pâl nđaih./.

Nuĭh rblang: Điểu Thân