VOV4.M'nông:  Tĭng ƀư nău n'glêh an bah Thủ tướng Chính phủ, Bộ Công an dôl an ƀư thẻ căn cước công dân (CCCD) ntrŭp chíp an nuĭh ƀon lan lam dak. Căn cước công dân rgâl an chứng minh nhân dân dŏng gay ƀư ăp ntil nău tâm rgâl ta neh dak Việt Nam. Ntơm bah aơ tât nar 1/7/2021, nsrôih ƀư lôch jêh pă an 50 rkeh thẻ căn cước công dân geh ntrŭp chíp, gay n'hao nău tam pah kan mât uănh ngih dak mpeh căn cước công dân, nta trong dơh an nuĭh ƀon lan tâm dak rnôk hăn ƀư si ƀŭt si tra n'hanh ăp nău tâm rgâl ndrăng nuĭh ƀon lan; rƀŏng tât rdâk njêng Chính phủ điện tử, njêng đăt ndal tâm hun hao wăng sa- rêh jêng kon nuĭh bah lam dak; rgop rhŏ dŏng geh nău tam pah kan rlăch ndăng njrăng, n'gang nuĭh tih. Ndrĭ mhâm lah ntơ căn cước công dân? Si ƀŭt ƀư thẻ căn cước công dân mhâm ƀư? Moh nhih pah kan dơi kan i geh nău dơi ƀư thẻ căn cước công dân? Ƀon lan moh geh nău dơi n'hanh nău way đah thẻ căn cước công dân. N'hanh ndơ lơh dĭng ƀư thẻ căn cước công dân ntrŭp chíp bah năp nar 01/7/2021.

Căn cước công dân lah ngoăy tâm ăp ntil si ƀŭt rnă săk bah nuĭh ƀon lan neh dak Việt Nam nơm. Aơ lah trong ƀư mhe bah lha chứng minh nhân dân, ntơm pă an phăt n'hanh geh nău tam ntơm bah năm 2016. Tĭng Luật thẻ căn cước công dân 2014 nuĭh ntơm bah 14 năm deh let lơ mbra dơi pă an thẻ căn cước công dân.

Căn cước công dân geh rnoh khlay an saơ di mpeh căn cước, tu tơm luh bah nuĭh ƀon lan bah nuĭh dơi pă an gay tĭng ƀư si ƀŭt si tra lam neh dak Việt Nam, mbra dơi dŏng rgâl hộ chiếu nkhêp Việt Nam n'hanh du dak êng geh nău tâm nkol mô lah tâm ton dak bah dih an nuĭh ƀon lan bar dak dŏng thẻ Căn cước công dân rgâl an nău dŏng hộ chiếu.

Năm 2016, Việt Nam ntơm rgâl chứng minh nhân dân (CMND) ma thẻ Căn cước công dân (CCCD) mã vạch. Tât bôk năm 2021, thẻ Căn cước công dân mã vạch dơi rgâl tay ma Căn cước công dân ntrŭp chíp ta lam dak. Kalơ Thẻ Căn cước công dân ntrŭp chíp aƀaơ geh 12 mbrô. Mbrô bah thẻ Căn cước công dân lah mbrô gĭt năl êng săk nơm. Tĭng Điều 13 bah Nghị định 137/2015/NĐ-CP bah Chính phủ, goi mbrô dja lĕ rngôch 12 mbrô, geh tâm nkrĭp lah 06 mbrô, tâm nê 03 mbrô bôk năp lah mã n'gor, nkual ƀon têh mpeh trung ương mô lah mã neh dak ntŭk nuĭh đăng ký khai sinh; 01 mbrô bah kơi nê lah mã rôk năm deh n'hanh mã năl nuĭh bu ur bu klô; 02 mbrô nthoi tay bah kơi nê lah mã năm deh bah nuĭh ƀon lan n'hanh 06 mbrô n'glĕ dŭt lah mbrô dah ma luh êng.

Ntĭt: mbrô căn cước công dân lah: 037153000257 ri:

Mbrô 037 lah mã n'gor Ninh Bình

Mbrô 1 mpơl gĭt năl săk bu ur, deh ta rôk năm 20

Mbrô 53 mpơl nuĭh ƀon lan deh năm 1953

Mbrô 000257 lah mbor mbrô geh luh êng. Mã mbrô ta thẻ căn cước công dân mô dơi rgâl roh, kơp lĕ ma nuĭh ƀon lan đă ƀư tay nkhêp geh roh, mô lah rgâl nău nchih mbơh Hộ khẩu way gŭ.

            Aƀaơ, kơp lĕ ma thẻ căn cước công dân ntrŭp chíp dôl geh ta lĕ 4 ntil si ƀŭt rnă săk geh nău tam dŏng tâm ban nsum, nê lah Chứng minh thư nhân dân lha đaih 9 mbrô, Chứng minh thư nhân dân lha đaih 12 mbrô, Thẻ căn cước công dân mã vạch n'hanh Thẻ căn cước công dân ntrŭp chíp. Tĭng nău way an bah pháp luật ri Chứng minh nhân dân 9 mbrô jŏ dŏng 15 năm kơp ntơm bah nar pă an ƀư, hôm Thẻ căn cước công dân ri ân dơi rgâl rnôk nuĭh ƀon lan tŏng 25 năm deh, 40 năm deh n'hanh 60 năm deh. Lah Chứng minh nhân dân, căn cước công dân hôm năm dŏng ri nuĭh ƀon lan hôm dŏng tay đŏng. Dak he dôl hăn tât nău lam ƀon lan dơn ngoăy dŏng 1 ntil si ƀŭt rnă săk lah Thẻ căn cước công dân ntrŭp chíp.

Ơh nău ôp mpeh nău nuĭh ƀon lan gĭt kâp hăn sĭt tay di ntŭk he đăng ký hộ khẩu gay ƀư si ƀŭt rgâl Thẻ căn cước công dân ntrŭp chíp đŏng lah mô? Thượng tá Tô Anh Dũng, Giám đốc Ntŭk rgum mât prăp nău lư neh dak mpeh ƀon lan gŭ, Bộ Công an an gĭt:

“Aƀaơ, Bộ Công an dôl rđău đă Công an 63 n'gor, nkual ƀon têh mpeh nău pă an căn cước công dân ntrŭp chíp điện tử an nuĭh ƀon lan manh gŭ. Nuĭh ƀon lan mbra hăn tât ntŭk dŭt dăch nê gay ƀư căn cước công dân ma mô kâp sĭt tay tât ntŭk đăng ký hộ khẩu".

Nuĭh dơi an ƀư lor?

“Bộ Công an dôl njrăng đă lĕ rngôch nuĭh ƀon lan hăn ƀư tâm rơh dja yor căn cước công dân ntrŭp chíp điện tử mbra rhŏ dŏng an ăp nău ƀư si ƀŭt si tra an dơh glêh, ma nău ŭch bah Bộ Công an lah gay rhŏ dŏng nuĭh ƀon lan ƀư an dŭt dơh ngăch hŭch đêt ăp ntil si ƀŭt mô lăng khlay".

Lah du hê nuĭh ƀon lan mhe ƀư Thẻ căn cước công dân mã vạch ri kâp ƀư tay Thẻ căn cước công dân geh ntrŭp chíp đŏng lah mô?

“Ndơ Chứng minh dân dân mô lah căn cước công dân 12 mbrô ơm ri hôm dơi dŏng an tât rnôk lĕ nar an dŏng đŏng?

Ndơ lơh dĭng Công an ăp n'gor, nkual ƀon têh ndin ndăn pă an ƀư rơh dja, ƀư ndăng măng nar kơt nê̆?

“Nău ŭch bah Bộ Công an lah nsrôih ƀư an 50 rkeh Thẻ căn cước công dân ntrŭp chíp điện tử ntơm bah nar 01/7/2021. Kơt he gĭt ri nar 01/07/2021 ri Luật Cư trú geh nău tam n'hanh ăp nuĭh ƀư si ƀŭt si tra ri ân n'hŭch dơh glêh ăp ntil si ƀŭt ƀư. Bah kơi nar 01/7/2021, Bộ Công an mbra buăt nthoi tâm pă đah ăp Bộ, ăp n'gâng kan dơi kan yor kơt nê̆ gay rhŏ dŏng dŭt uĕh mpeh Chính phủ điện tử, rƀŏng tât Chính phủ mbrô n'hanh jâng wăng sa brô ri Bộ Công an hŏ rđău đă Công an 63 n'gor nkual ƀon têh ƀư ngăch ndăn pă an căn cước công dân ntrŭp chíp điện tử ntơm bah aơ tât nar 01/7/2021 gay rhŏ dŏng nuĭh ƀon lan".

VOV4- Nuĭh rblang: Điểu Thân