VOV4.M’nông: Pơh rlau aơ, rmôt kan ntoh măt Quốc hội ăp n’gor tâm Tây Nguyên hŏ ntơm ƀư nau mâp nŭih ƀon lan bah năp rơh rƀŭn tal 2, Quốc hội gưl XV. Ta ăp ntŭk mâp, cử tri kŏ ntoh nau rhơn bah năp ăp nau tă dơi bah rơh rƀŭn tal bôk năp Quốc hội gưl XV. Nkre tâm ban ma nkô̆ nau, nau kan bah rơh rƀŭn tal 2, ndrel ntoh âk nau rgop, đă mpeh âk nau kan tâm nkuăl. Ngăn lah kơt năn pă tŏng vắc xin njrăng rdâng srê Covid-19 ân ƀon lan, geh nau kơl an ƀon lan ndâk văng sa jêh bah srê, uănh kơl an hun hao tuch tăm geh nau dăng tâm Tây Nguyên...

            Ta nar tâm mâp đah cử tri, rmôt kan ntoh măt Quốc hội n’gor Dak Lak kơp dơn âk nau uănh khlay tât ăp nau kan gay ma ƀư “nkô̆ nau bar ntil kan” nkre hun hao văng sa, rêh jêng, nkre njrăng rdâng srê săk tam hŏ geh cử tri mbơh. Nkre lah, cử tri đă đah Quốc hội, Chính phủ, ăp n’gâng kan, ntŭk kan Trung ương ndrel n’gor lŏ ƀư ân rjăp nau ntrŭnh njrăng, rdâng srê Covid-19, pơk rgum vắc xin chuh n’gang ân ƀon lan, n’hao nau nâp mpeh dak si, n’ăp ma rmôt nŭih, ndơ dŏng, ngăn lah nŭih kan dak si tâm dâng gay ơm ntrŭt jăng lơi srê, leo neh dak ơm plơ̆ tay nau ueh nâm ơm mhe. Cử tri Lê Văn Thao, ta xã Ea Trang, nkuăl M’Drak, đă:

            ‘Tâm rơh rlau aơ, đah vắc xin geh pă nkuăl ntrŭnh nau leo chuh ân ăp mrôt geh kơl an tĭng nau ntrŭnh, yơn lah, gay săk tam lơn ân geh njêng luh nau dơi njrăng rdâng tâm ƀon lan ân geh săk tam jŏ jong kŏ kơt lah đă ăp gưl kan kơl an pă vắc xin gay mât đăp mpăn mhâm ƀư mô êng chuh ân ăp nŭih râng nau kan kơl njrăng rdâng srê ma hôm chuh ân ƀon lan. Ngăn lah ăp nŭih tâm nkuăl rnoi mpôl đê̆, nkuăl jri ngai lạh ntŭk geh nau ntưp rêng srê hô ndrel ăp nau tâm nkhah, ăp nau dơi njrăng rdâng srê jêr”.

            Kŏ tâm pơh rlau aơ, rmôt kan ntoh măt Quốc hội n’gor Gia Lai geh nar tâm mâp ƀon lan tâm 4 xã nkuăl n’har bri geh: Ia Mơr, Ia Ga, Ia Piơr ndrel Ia Lâu, nkuăl Cư Prông, nau mbơh mpeh nau nchrăp rơh rƀŭn tal 2, Quốc hội gưl XV ndrel kơp dơn ăp nau đă bah cử tri. Tâm ăp ntŭk mâp, cử tri ntoh nau rhơn bah năp ăp nau tă geh bah rơh rƀŭn bôk năp Quốc hội gưl XV hŏ săch dơi ăp nŭih kan gưl prêh bah Quốc hội, Ngih dak, chính phủ năm kan 2021-2026 đah n’ha phiếu rnơm prêh. Nkre đă: Ân geh rgâl, ntop tay du đê̆ nau ntrŭnh pháp luật, kơt: Luật neh ntu, Bộ luật tố tụng hình sự năm 2015, Luật nghĩa vụ quân sự, Luật tâm rlong rnê nkhôm...gay ăp gưl, ăp rmôt kan nơih ntrŭnh gay mât đăp mpăn nau nkri rnôk tih pháp luật ndrel tâm di đah nau dơi bah nau rêh. Lŏ ƀư ăp nau kan ndâk, ntrŭt dăng nau hun hao văng sa, rêh jêng.

            Mpeh ăp nau kan n’hêl bah nkuăl, cử tri Gia Lai mbơh: Ntŭk ƀư nau nkah ơm Plei Me geh kơp dơn lah ntŭk nkah ơm gưl neh dak yơn ê geh nau ntuh kơl ndâk njêng tâm di gay ma rgum nŭih năch pâl n’aih, uănh kơl ntuh kơl ăp ntŭk trong hăn bah nkuăl, kan pă neh gŭ, neh tuch tăm ân ƀon lan rnoi mpôl đê̆. Cử tri Gia Lai kŏ đă ăp ntŭk kan gay rklaih ăp nau kan geh tât nau hun hao duh điện mặt nar chor jay, kan mât ăp nau hun hao mât rong tâm nkuăl, ăp nau kol tâm nau ƀư ntĭm nti trực tuyến...Ngăn lah, âk cử tri ntoh ăp nau kan duh mpeh nau njrăng, rdâng srê Covid-19, mhâm ƀư pă kan pah ân nŭih ƀon lan jêh sĭt tă bah nkuăl geh srê. Cử tri Nguyễn Trường An, xã Ia Lâu, nkuăl Cư Prông ntoh nau đă:

            ‘Nau ngăn lah oh kon tâm nkuăl jêh rnôk sĭt tă bah nkuăl geh srê ri jêr ngăn, ma rnôk aơ ri kŏ mô dơi geh nau kan tâm nkuăl. Mặt êng rnôk aơ ăp nŭih lŏ sĭt ta ưbah nkuăl geh srê  ri nau kan aơ kŏ ŭch ăp gưl geh nau dơi gay ma kơp uănh. Rlau ma nê nau rêh bah kônh wa tâm nkuăl n’har bri ri mâp âk nau jêr ngăn, ŭch mhâm ƀư ngih dak geh ăp nau kan gay ma kơl an, pơk trong nơih ân ăp nŭih geh nau dơi gay hun hao, ntĭm mbơh kônh wa ndâk njêng hun hao ăp nau kan tuch tăm, mât rong gay ma hun hao văng sa”.

            Ta Kon Tum, rmôt kan ntoh măt Quốc hội hŏ mâp nŭih cử tri ta nkuăl Sa Thầy, Kon Plông ndrel Kon Rẫy. Cử tri ntoh nau tâm ban đah nau nchrăp kô̆ nau, bôk nau pah kan bah rơh rƀŭn tal 2, Quốc hội gưl VX, kơl an nau ntrŭnh kŏ kơt lah nau rđau bah Chính phủ tâm nau kan njrăng, rdâng srê Covid-19 ndrle rhơn rnôk saơ nŭih ƀon lan, ngăn lah nŭih mô geh nau dăng geh nau kơl an, năn kơl an.

            Mpeh nau kan tâm nkuăl, cử tri Kon Tum ŭch ntoh kơl ntrŭt dăng ngăch nau nkra ăp nau kan, n’hao nkra ăp gưl trong mô nâp tâm quốc lộ 24 ntơm nkuăl têh Măng Đen, nkuăl Kon Plông hăn n’gor Quảng Ngãi. Lŏ ân kon se rnoi mpôl đê̆ geh kơl an nau gŭ sa nar tâm ngih săm ƀŭt. Rgum nsĭt lơi ăp bôk nau kan ƀư mbrơi, mô nâp tam gay ma der nau mpŭng lir neh ntu. N’hao nau kan mât neh ntu, si gle, tui ka. N’huch nau khuch tă bah thuỷ điện jê̆ ndrel bah găp đah nau rêh kŏ kơt loah nau pah kan tuch tăm bah ƀon lan.

            Đah nau kan mât njrăng bri, cử tri Kon Tum đă ăp gưl ơm mêt uănh, kơp tay ăp rnoi neh bri geh jao tĭng nau ntrŭh 178 bah Chính phủ. Geh nau kan kơl an ngăn đah nŭih rnoi mpôl đê̆ mpeh ntil tăm, nau mât chăm, nau kan gay ƀon lan tăm tay bri  tâm rnoh neh lơi dơm./.

            Nŭih rblang: H’Thi