VOV4.M’nông: Ta rơh rƀŭ tal bôk năp, Quốc hội gưl 15, Kruanh Uỷ ban Trung ương MTTQ Việt Nam Đỗ Văn Chiến hŏ mbơh nau rgum nau, đă bah cử tri ndrel ƀon lan. Êp ăp nau tă dơi geh, cử tri ndrel ƀon lan hôm rvê, ngăn lah tât srê Covid-19

Cử tri ndrel ƀon lan tâm ban đah nau ntrŭnh du trong, n’ho ro bah Đảng lah ƀư ân ueh n’hâm dăng bah nau tâm rnglăp rnoi mpôl, ndâk nau ŭch ndâk njêng neh dak nơm hun hao ân nâp, ân ueh. Ndrel ma nau ta ưgeh bah nau njrăng, rdâng srê, ăp rmôt kan, ntŭk kan văng sa ndrel ƀon lan lŏ ntrŭt dăng nau kan hun hao ê nkra, tăch rgâl, văng sa ân geh nau hun hao 5,64%, geh lĕ 3 rmôt ƀư nau kan dăp rgum nau tâm rnơm bah lam ntur neh n’hao nau ŭch ueh ân neh dak ytă bah đăp mpăn hao jêng nâp nâl năch, rnă njrăng chính trị, đăp mpăn nau rêh jêng kon nŭih geh mât nâp, rnă njrăng rêh jêng, nau rêh ƀon lan đăp mpăn. Kruanh Uỷ ban TW MTTQ Việt Nam Đỗ Văn Chiến lah rjăp: Cử tri lah nau rhơn, nsôih rnôk Thủ tướng Chính phủ ntoh măt rđau kan Đảng, Ngih dak ƀư ueh nau nau kan chuh n’gang vắc xin njrăng rdâng srê Covid-19 tâm lam dak âk ngăn kơp nơm sa ơm, yơn lah, cử tri kŏ hôm rvê ngăn:

            ‘ Cử tri ndrel ƀon lan hôm geh nau rvê ngăn tâm rnôk mô geh vắc xin lam ntur neh, nau ton bah ăp dak tăch pă ri mô nâp, vắc xin tâm dak dôl ma tâm rnôk dôl rlong, phung he ân geh nau kan ân mhe, ân nâp ri mơ dơi geh rnoh tŏng chuh 75% rnoh nŭih bah lam dak kơt nau nchrăp bah N’gâng kan dak si. Lah mô dơi geh nau kan nchrăp chuh njrăng vắc xin ân ndâk nau hun hao văng sa rêh jêng mra geh mbrơi, nau rêh bah ƀon lan mâp nau jêr, ngăn lah nŭih mô dăng, nŭih roh nau kan, mô tŏng kan pah yor ƀư nau kan tâm nkhah srang, tâm nkhah tâm kon nŭih yor geh srê Covid-19”.

            Rnoh kơl an 62 rbăn mren prăk tĭng nau ntrŭnh mrô 41 bah Chính phủ mpeh nau kan kơl an ƀon lan mâp nau jêr yor srê Covid-19 geh nau ting rnôk, ntrongkan geh nau tât ndal. Yơn lah, cử tri ân lah, nau ntrŭnh ƀư nau kan hôm vĭ vĕ, kơp nŭih geh kơl an ê tâm ban tâm rnôk, tâm rnoh ndrel ma nau pă tơm prăk tă bah Ngih dak kơl an ƀpn lan, ntŭk kan geh rnoh dêh, mô dơi geh nkô̆ nau kơt nau nchrăp. Đă ăp n’gâng kan, ntŭk kan, ăp gưl geh tât ân geh ƀư ngăch nau kan, rhuăt ăp nau tă blau, nchŏng kloh nkô̆, nau kan gay ntrŭnh ân ueh lơn nau kơl an ân Nau ntrŭnh mrô 68 bah Chính phủ gay kơl an ntŭk kan tăch rgâl ndrel ƀon lan du trong ueh, nâp tam ngăn.

            Cử tri kŏ rvê ngăn lah, knŭng hôm 5 khay dơm lah lôch năm 2021 ma du đê̆ nau kol, nau ntoh luh, nau tâm rkăng mpeh nau kan, nau ntrŭnh bah pháp luật hŏ hôm geh tă bah jŏ, ê dơi năn rklaih mpeh nau kan, lah chính phủ, Quốc hội mô doh rklaih năn ăp nau nkol nê ri nau jêh ăp nkô̆ nau mpeh văng sa, rêh jêng 2021 mra jêr ngăn. Tâm rnôk dôl ma geh nkhah srang kon nŭih, gay ma đăp mpăn nau njrăng srê, du đê̆ nŭiuh băl mpôl mô geh ăhn nti, mô geh pâl m’ak rđil đah ănm deh bah nơm tâm âk khay ƀư khuch ngăn tât nau mĭn, nau rêh, ngăn lah tâm nkuăl đô thik, khu chung cư. Nau kan aơ ân ơm geh n’gâng kan ƀư ân rjăp gay ma tâm ban nau rklaih, mô dơi uănh dơm.

            Cử tri đă ăp rmôt kan ntoh măt Quốc hội ân ntô̆ n’hao nau kan, nsôih ƀư ân rjăp, ân săk tam nau kan ndrel nau tă ton lah ma cử tri tâm rnôk bonh đă náu ăch kan ân nơm, nsôih rjăp ƀư tĭng nau dơi kan, nau pah kan bah nŭih leo trong, ân nâp, ngăn ngên lah “nting mham” đah ƀon lan, nsôih ƀư kan tĭng nau: Nsôih, gơih gay ƀon lan ŭch, ƀư nau kan ân ƀon lan rŏng,  ƀư nâp, njrăng, blau gay ƀon lan đă rnơm. Kruanh Uỷ ban TW MTTQ Việt Nam Đỗ Văn Chiến đă Quốc hội lŏ rgâl mhe ƀư nau kan, n’hao nau nâp nau ndâk njêng pháp luật, ntrŭnh ăp nau kan khlay bah neh dak ndrel mêt uănh gưl prêh:

            ‘Kan ndâk njêng nau ntrŭnh pháp luật ân geh uănh tĭng nau ngăn, geh nau kan jŏ jong, n’huch ngăn nau ntrŭnh luật mhe ma hŏ rgâl nkra, ntop tay yor mô rgâl nkra, ntop tay ri nau kan nê mô geh lăp tâm nau rêh, ơm rgâl nkra, ntop tay Luật neh ntu, đă Quốc hội ndrel Chính phủ doh rklaih ăp nau kol mpeh pháp luật đah nau kan ân tâm ban kơt nau ntrŭnh luật rgâl âk nau kan ân tâm di đah ăp nau ntrŭnh leo rlong ân ăp nau kan e êgh nau ntrŭnh, rgop nau rklaih nau tơm tâm rnôk dôl geh nau jêr yoor srê Covid-19 lơh đah jâng văng sa ndrel ƀon lan. Yor lah, tâm rnô mô ueh ma hôm kơt tĭng ntrong kan, nau ntrŭnh kơt rnôk tâm ban ueh ri mra mô geh tŏng dơi nau đă kơt nau ngăn”.

            Di rnôk aơ, Rmôt Kruanh Uỷ ban TW MTTQ Việt Nam kuăl jă ăp kơn ƀon lan, rnoi mpôl, ƀon lan lam dak, ăp ntŭk kan ndrel rmôt kan, n’ăp ma nŭih dak ba dih dôl rêh tâm Việt Nam ân rnơm ngăn tâm nau rđau kan tâm di bah Đảng, Ngih dak, Chính phủ, Thủ tướng Chính phủ mpeh nau njrăng, rdâng tâm ban ngăn bah Đnảg, Ngih dak, Chính phủ, Thủ tướng Chính phủ mpeh nau njrăng, rdâng srê Covid-19, ƀư ueh nau tâm rnglăp, tâm kơl, njêng nau tâm ban nuih n’hâm, kơt tĭng ân rjăp ăp nau ntrŭnh mpeh nau nkhah, ƀah rsang kon nŭih, chuh njrăng vắc xin Covid-19, ƀư ân ueh nau kan nkah đă 5K bah N’gâng kan dak si. Kônh wa ndrel cử tri lam dak tâm rnglăp du nuih n’hâm, tâm ban nau mra njrăng rdâng, ntrŭt jăng lơi srê ji Covid019, ƀư ân geh nau dơi Đại hội lam dak tal 13 bah Đảng, ƀư ân dơi nau mpŏng ndâk njêng neh dak nơm hun hao nâp nâl, đăp mpăn./.

                                    Nŭih rblang: H’Thi