VOV4.M’nông: Knŭng rlau du khay đŏng lah mra ƀư nau săch kan Quốc hội ndrel HĐND ăp gưl. Gay đăp mpăn nau ƀon lan ƀư tơm ndrel geh nau dơi bah rơh săch aơ, n’gor Dak Lak hŏ ntrŭt dằng nau kan nkoch trêng đah âk nau kan êng êng, ngăn lah đah ƀon lan lah nŭih rnoi mpôl đê̆ tâm nkuăl jru, ngai.

            Jêh mông sông măng, rnăk bu ranh Lò Khái Phụ, tâm thôn Ea Rớt, nkuăl Cư Pui, nkuăl Krông Bông, n’gor Dak Lak ndjôt ngăn ŭnh pil gay ma hăn ăp ngih tâm thôn gay nkoch mbơh. Lah tât măng, wa Phụ lŏ ndăn hăn nklăp 4-5 ngih gay ma nkoch ân ƀon lan gĭt mpeh nau kan ndrel nau ƀư săch kan. Yor kônh wa tâm thôn lah rnoi H’mông yor ri ma ăp nkô̆ kŏ geh wa Phụ rbăng ma nau ngơi H’mông gay ƀon lan gĭt kloh lơn:

             ‘Gâp kŏ geh nau dơi gay ma nkoch trêng, bonh đă oh nô tâm nau săch kan, ăp nŭih kŏ ân geh râng ân ăp, yor nê lah luật bah ngih dak ndrel nau dơi bah ăp ƀon lan. Nau nkoch trêng ri lah rnôk thôn nơm rƀŭn ri mbơh, lah rnăk ê geh nau gĭt kloh ri nơm hăn tât ngih gay ma nkoch trêng bonh đă bu”.

            Cư Pui lah xã nkuăl jru ngai bah nkuăl Krông Bông, geh âk nŭih rnoi mpôl đê̆ gŭ rêh, geh âk thôn, ƀon ngai ma xã nklăp 20 kmn, trong hăn jêr. Yor ri gay nŭih ƀon lan gĭt kloh nau kan geh tât nau săch kan mra geh ri Rnâng kan tâm xã Cư Pui hŏ geh âk ntrong gay ma leo mbơh ân ƀon lan.

            Wa Nguyễn Văn Tâm, Kruanh UBND xã Cư Pui mbơh, rơh săch kan aơ, xã Cư Pui geh 10 rmôt kan săch đah rnoh ân geh săch lah 30 nŭih HĐND. Bah 2 tŏ tâm nchră hŏ geh dĭng lĕ lah 65 nŭih ndrel kŏ geh ƀư lôch jêh nau uănh kloh ntŭk gŭ đah ăp nŭih gay nchrăp nau tâm nchră tal 3. Xã kŏ jêh nau ndâk nchih moh săk cử tri đah nklăp 7.200 nŭih râng săch tâm 13 ntŭk.

            Tĭng wa Nguyễn Văn Tâm, tât rnôk aơ, nau nchrăp kan ndrel ăp nau ntơm ƀư săch kŏ geh ƀư tâm di. Gay geh nau dơi aơ, nau kan nkoch trêng mpeh nau săch kan geh mbơh mro, ndrel geh nau kơl an ta ưbah bu ranh ƀon, kruanh ƀon ndrel nŭih geh bu rnơm tâm ăp nkuăl ƀon lan:

             ‘Đah nau geh lah du xã geh âk nŭih rnoi mpôl đê̆ ndrel nau geh tâm nkuăl ƀon lan bah xã mô geh rgum, gay nau kan nkoch trêng ân geh tâm di ma nkuăl ri phung hên ƀư ka ntrong. Nau kan nkoch trêng ân ueh ngăn nê lah nkoch trêng tâm ƀon lan, ăp ntŭk ƀon lan gŭ. Phung hên ƀư leo ăp ndeh hăn tât nkuăl ƀon lan gay ma nkoch trêng. Tal 2 lah tă bah ăp nau kan bah bu ranh ƀon, nŭih geh bu rnơm, nŭih geh tĭng chroh ri bu mra kơl an ân nau kan nkoch trêng ueh ngăn”.

            Tâm kơt ma nê, xã Yang Reh, nkuăl Krông Bông, n’gor Dak Lak ƀư nau kan nkoch trêng kŏ geh ntrŭt dăng. Wa Y Mui Nê, kruanh ƀon Yang Reh, xã Yang Reh nkoch, tâm ƀon geh 4  rkŭm loa nkoch mbơh nau, ăp nar mbơh nau nkoch trêng mpeh nau săch kan tât ƀon lan. Êng nê, cán bộ Văn hoá-mbơh nau xã vay lăp tâm ƀon gay ma nkoch trêng ngăn mpeh nau săch kan. Wa Y Mui nơm kŏ tâm rgop nsum đah nau nkoch trêng nê mpeh nau săch kan tâm ăp rơh rƀŭn, bonh đă ƀon lan ndrel băl mpôl tâm rnăk nơm ta ưbah ngai tât lơ 23/5 tât sĭt bah xã nơm gay ma hăn săch kan:

             “Ƀon lan gĭt kloh nau nkoch trêng mpeh luật săch kan kŏ rnơm ntŭk nkoch mbơh nau ăp nar tâm mông ôi ndrel mông măng, tâm ƀon geh 4 cặp loa. Nau tal bar lah đah nau nkoch mbơh ma rup ndrel mâp nkre ƀon lan. Dăch tât nau săch kan ntoh măt HĐND ri kŏ geh kơt tĭng, nchrăp nuih n’hâm săch luh ăp nŭih ngăn ngên geh nau gĭt blau gay ma kơl an ƀon lan”.

            Tĭng wa Bùi Duy Thích, Kruanh Uỷ ban MTTQ Việt Nam nkuăl Krông Bông, lam nkuăl geh 25 rnăk rêh ndum, tâm nê geh 40% ƀon lan lah rnoi mpôl đê̆. Yor r gay nau săch kan geh nau dơi, êng nau njoch mbơh đah ăp rup mpla n’hơ, nkuăl hŏ in ăp băng, đĩa nkoch tât nau săch kan gay ma njoăl tât ăp UBND bah 14 xã, nkuăl têh. Ntŭk ntoh ngơi, ntoh rup nkuăl ntoh nau ngơi rnoi yoăn-Rđe, nkoch mbơh mpeh nau săch kan ăp nar.

Tât rnôk aơ, ăp nau săch kan kŏ geh ntrŭnh tâm di, rnoh mọh săk ăp nŭih kŏ geh nchih jêh, ndrel hŏ tâm nchră tal 3:

             ‘Phung hên hŏ ƀư nau sŏk nau rgop bah cử tri tâm ntŭk gŭ rlau 140 thôn, ƀon, tổ dân phố đah 87 nŭih gưl nkuăl ndrel 666 nŭih gưl xã. Mặt trận ăp gưl kŏ dôl ma ntơm ƀư nau rgum nau rgŏ mbơh gay ma ndŏ tât ân  rơh tâm nchră tal 3. Rnôk aơ, tâm lam nkuăl ăp ntŭk nkoch mbơh nau bah xã kŏ geh nkoch trêng mro nau săch kan, tâm ăp nar rƀŭn rgum bah thôn, ƀon, tổ dân phố kŏ kơt lah tâm rgop nsum ma nau kan nkoch trêng bah nau săch kan. Ăp rmot, ăp ntŭk kŏ nsôih nkoch trêng ân nau săch kan bah Quốc hội ndrel HĐND ăp gưl”.

            Tâm rơh săch kan rnôk aơ, n’gor Dak Lak geh 20 rmôt kan săch kan ntop pă tĭng ăp nkuăl, nkuăl têh ndrel nkuăl ƀon têh. Đah nau geh lah du n’gor hvi, âk nŭih rnoi mpôl đê̆, âk nkuăl jêr ngăn tâm nau gĭt mbơh nau kan. Yor ri, gay đăp mpăn nau dơi ƀư tơm ndrel nau dơi ân rơh săch kan ntoh măt Quốc hội gưl XV ndrel ntoh măt HĐND ăp gưl năm kan 2021-2026, Dak Lak dôl ntrŭt dăng nau nkoch trêng đah âk nau kan, ngăn lah nau nkoch mbơh mpeh nau săch kan tâm nkuăl jru, nkuăl ngai, nkuăl ƀon lan rnoi mpôl đê̆./.

            Nŭih rblang: H’Thi