VOV4.M’nông: Ntơm bah dŭt khay 4 tât rnôk aơ, n’gor Dak Lak ndơn geh rlau 173 rbăn nŭih sĭt tă n’gor, nkuăl mpeh ba dâng. Ndrel ma ăp nau kan kơl an tâm nau rêh jêng bah năp măt, n’gor dôl dŏng tơm prăk ân manh, kơl an ân ăp nŭih pah kan mhe tă sĭt gay ma manh hun hao văng sa, đăp mpăn nau rêh tâm ƀon lan. Aơ lah nau nsôih ueh, năn kơl an nŭih ƀon lan rlet rlau nau jêr bah srê.

            Leo 3 mlâm ndrôk 2m’ơk chiă tâm lŏ bah thôn 6, xã Cư Kty nkuăl Krông Bông, wa Tăng Ngọc Thịnh, mbơh, rnoh ndrôk aơ mhe rvăt bah rnôk aơ rlau du khay tă bah tơm prăk manh bah Ngân hàng chính sách xã hội.

Bôk năm e, ur sai wa tât tâm n’gor Bình Dương pah kan gay ma joi prăk ƀư nau kan. Yơn rnôk srê Covid-19 tât jêr, nau kan mô geh ri ma tâm khay 6 mhe rlau, ur sai wa sĭt tâm ƀon gay ma joi nau kan. Mô geh neh ntu, mô geh prăk ƀư nau kan, wa geh rmôt têm nkrem ân manh prăk ndrel tâm thôn bu hĭ ntĭm păng ƀư săm ƀŭt ndrel geh manh 50 rkeh prăk tă bah Ngân hàng chính sách xã hội đah rnoh jŏ manh lah 10 năm, prăk kon lah 7,92% du năm ma mô kâp nchăm ma drăp ndơ. Wa Tăng Ngọc Thịnh mbơh:

            ‘Srê hô ir mô dơi geh kan pah ri gâp hăn sĭt ri geh bôk nau kan aơ bu kơl an bah mpeh chính sách ân manh 50 rkeh gay ma rvăt ngăn ndrôk gay ma rong ntop. Gâp saơ bôk nau kan aơ ueh ngăn, kơl an dơi âk ngăn ăp nŭih tâm nau rêh mâp nau jêr kơt gâp”.

            Tâm 2 khay rlau aơ, hŏ geh rlau 20 rnăk tâm nkuăl Krông Bông geh nŭih sĭt tă bah n’gor mpeh ba dâng geh manh prăk đah rnoh rlau du rmen. Aơ lah ngoai tâm ăp nkuăl bôk năp geh manh prăk đah rnoh rlau du rmen. Aơ lah ngoai tâm ăp nkuăl bôk năp tâm n’gor Dak Lak ƀư nau kơl an prăk manh kơl an nŭih sĭt tă bah mpeh bah dâng.

            Wa Nguyễn Tử Ân, Giám đốc Ngân hành chính xã hội n’gor Dak Lak mbơh, rmôt kan nchrăp tâm rgop nsum đah n’gâng kan tâm dâng ƀư uănh nau ŭch ndrel pă nau dơi ân manh gay ma hun hao tuch tăm, đăp mpăn nau rêh tâm ƀon. Ngân hàng đă đah Trung ương ntop kơl an tơm prăk 19 rmen ân ăp rnăk geh nŭih tă bah ăp n’gor, nkuăl ƀon tệh sĭt. Ndrel ma nê, đah ăp rnăk geh nau rêh jêr jŏt, lah manh prăk, rmôt kan mra nchrăp trok rnon mô lah ân manh ntop đŏng gay ma geh tơm prăk pah kan:

            ‘Khân păng geh bôk nau kan n’hêl sĭt pah kan tâm nkuăl, ngăn lah khân păng ân râng tâm ăp rmôt ƀư nau kan têm nkrem, manh prăk dôl geh tâm ăp nkuăl. Lăp tâm ăp rmôt aơ ri khân păng mra geh ntĭm mbơh nau dŏng tơm prăk manh, ăp nau kan ê nkra tăch rgâl tâm rnôk tâm nkuăl ma jêh rnôk jŏ jong mô geh gŭ tâm nkuăl ndrel lah nsum lah ăp rnăk aơ ân geh dŏng tơm prăk ân geh tâm di ma nau dôl geh gay ma đăp mpăn săk tam ma nau kan leo nsĭt”./.

            Nŭih rblang: H’Thi