VOV4.M'nông: Gay tŏng ndơ an ƀon lan rvăt năp tâm rnôk tết kêng dŭt năm 2021 n'hanh Tết Nguyên đán Nhâm Dần 2022, aƀaơ hŏ geh 10 doanh nghiệp têh ta n'gor Dak Lak ton rnă ntêm ndơ tăch đah lĕ rngôch rnoh khlay rlău 270 rmen prăk. Ăp ndơ tăch đăp mpăn rnoh khlay lah: phe, puăch sŭr, djăr, tăp kik djăr, dak ngi, bột ngot n'hanh ăp ntil ndơ sa nkret njêng, bum biăp, dak pring, bánh kẹo mứt. Tâm rnôk tĭng ƀư đăp mpăn rnoh khlay ntoch jong rlău 2 khay, ntơm bah nar 15/12/2021 - 28/2/2022.

Tâm  rnôk nuh srê COVID-19 tât krit nji ntoch jong, Sở Công Thương Dak Lak đă ăp doanh nghiệp, hợp tác xã, rnăk tăch rgâl nkre rnă ntêm tơm ndơ tăch, nkre đăp mpăn pah kan njrăng n'gang nuh srê tâm rnôk ƀư njêng tăch rgâl tĭng di nău way. Aƀaơ, ndơ tăch tŏng an nău ŭch geh rvăt dŏng bah nuĭh ƀon lan n'hanh nchrăp tŏng an rnôk Tết. Sở Công Thương hŏ mbơh rblang UBND n'gor Dak Lak mĭn uănh, an dŏng trong nchrăp tĭng ƀư bôk nău kan đăp mpăn rnoh khlay ăp ntil ndơ dŏng sa tơm rnôk têt kêng dŭt năm 2021 n'hanh Tết Nguyên đán Nhâm Dần 2022.

Nuĭh rblang: Điểu Thân