VOV4.M’nông: Gay ntrŭt dăng ăp nau kan kơl an yor nsum mpôl rƀŏng tât kon se ndrel nŭih geh n’hâm geh nau rêh jêr jŏt bah n’gor, mom ndăm Dak Lak ntrŭnh bôk nau kơl an tâm yan sial puh đah âk nau kan n’hêl. Tĭng nê, ăp gưl kan đoàn tâm n’gor ntrŭnh nau nkoch trêng njrăng rdâng srê Covid-19 ân ƀon lan, bonh đă tu tơm gay ma pă ma rhiăng nklâm ndơ ndrel ao răm, phôi ntâk ân kon se ach o, pă ăp nklâm ndơ ndâk nau kan ân druh ndăm, kơl an druh ndăm rnglăp tay tâm nau rnglăp rnoi mpôl.

Đoàn n’gor Dak Lak săch xã Ea Riêng, nkuăl M’Drak gay ƀư bôk nau kan gưl n’gor ndrel pă 50 nklâm ndơ ân ăp kon rnăk vâl geh nau rêh jêr jŏt, 10 bôk ndeh vah jâng đah phôi ntâk ân ăp kon se... Tâm bôk nau kan, đoàn n’gor Dak Lak kŏ ndâk 2 ngih kơl an ân rnăk vâl druh ndăm kŏ ndâk 2 ngih kơl an rnăk đoàn viên mâp nau jêr mpeh ngih gŭ tâm nkuăl Krông Pách ndrel Ea Kar. Rnoh prăk ƀư nau kan gưl n’gor lah rlau 200 rkeh prăk./.

Nŭih rblang: H’Thi