VOV4.Mnông- Bư tĭng nău ntĭm đă bâh n’gor Dak Lak, bâh năm 2004 tât aƀaơ, 1.194 ntŭk kan, ntŭk leo kan ta Dak Lak lĕ tâm rnglăp kan ndrel đah 758 ƀon rnoi đê̆. Lôch bơi tât 17 năm krêp dêh pah kan ndrel, đah ăp bôk nău kan kơl an na nê̆, nău rêh bâh ăp ƀon ăp nar lơ ma ntô̆ hao, nău rêh bâh nuĭh ƀon lan lơ ma geh n’hao, rnoh rnăk ach o hŭch.

            Mpôl hên ndrel đah cán bộ, nuĭh kan ta công ty điện lực Dak Lak tât khâl ƀon tâm rnglăp kan ndrel M’briu, xã Cư Né, nkuăl Ea Kar. Di rơh aơ, đoàn viên công ty pă bok put mbung, dak rao ti, ndơ ngêt sông, n’hanh bmơh tơih rgŏ jă ăp ntrong kan mât njrăng rdâng nuh srê Covid-19 an ƀon lan. Ndrel đah nĕ, ndơn kan Ban giám đốc công ty lĕ pă an 2 mblâm ndrôk ntil đah rnoh khlăy 40 rkeh prăk an bar rnăk ach o ta ƀon.

Ndơn kan Công ty Điện lực Dak Lăk pă ndơ an ƀon M'Briu

Wa Y Suk Niê- bí thư chi bộ ƀon Mbriu, xã Cư Né nkoch, ăp năm ba năp nău rêh bâh ƀon lan tâm ƀon hôm nha geh âk nău jêr, rnoh rnăk ach o âk, geh nău mât kơl tâm bâh Đảng n’hanh ngih dak, nău kơl an bâh ntŭk kan tâm rnglăo kan ndrel, aƀaơ rnoh aơ hŭch ta rnoh ba dâng 5%.

Đoàn viên công ty Điện lực Dak Lak pă ndơ an ƀon lan ntŭk njrăng srê Covid-19

Ta rơh geh nuh srê Covid-19 rnôk dŭt khay 9/2021, ƀon vơt geh 146 nuĭh pah kan ngai ta ăp n’gor nkuăl ƀon têh mpeh ba dâng sĭt der nuh srê, ăp gâl kan n’gâng kan ta ntŭk n’hanh Công ty điện lực Dak Lak lĕ tât kơl an đŏng.

“Công ty Điện lực Đắk Lắk tâm rnglăp kan ndrel đah ƀon M’briu bâh năm 2004 n’hanh geh dŭt âk bôk nău kan kơl an. Công ty way geh mât kơl tât ôp khâl, pă ndơ an ăp rơh trung thu, lễ, tết, kơl an ƀon lan mpeh ngih jay gŭ, phe bah ji ngot tâm rnôk kâp khay kăch rek mô lah pă ndrôk an rnăk ach o. Mbrơi mbrơi rnoh rnăk ach o tâm ƀon lĕ hŭch âk. Rơh nuh srê aơ khân păng tât pă bok văn mbung, dak rao ti, mbơh tơih ƀon lan njrăng rdâng nuh srê mô lah ƀư tĭng răng dăng ăp ntrong kan 5K bâh n’gâng kan dak si, văn bok put mbung, mô rgum ta ntŭk nuĭh âk năm deh. Ƀon lan ƀư tĭng ueh jêng tât aƀaơ ƀon lan ê hŏ geh nuĭh ntưp đah nuh srê.

Buôn M’briu, xã Cư Né, nkuăl Ea Kar aƀaơ geh 268 rnăk đah rlău 1.300 nuĭh, rlău 95% lah nuĭh Rđe.

Ndơn kan VOV Tây Nguyên pă ndơ an ƀon lan ƀon B'Hôk

Wa Trần Văn Thuận- Giám đốc công ty điện lực Dak Lak an gĭt, tĭng nău ntĭm đă bâh n’gor ủy Dak Lak, năm 2004 công ty lĕ tâm rnglăp kan ndrel đah ƀon m’briu. Gay ma kơl an ƀon tâm rnglăp, ăp năm ta ăp rơh lễ, tết, công ty lĕ jŭr tât khâl, ôp, rgŏ jă, pă ndơ an rnăk ach o, rnăk dơi kơl, rdâk njêng ăp bôk nău kan na nê̆ kơl an ƀon lan hun hao wăng sa rêh jêng, jut jăng ach o.

“Tĭng bôk nău kan tâm rnglăp kan ndrel ăp năm rĭ ntŭk kan lĕ ndơ̆ mbơh ăp ntrong kan ăp năm nău kan rnă njrăng ntŭk rêh jêng n’hanh mât uănh tât ăp rnăk vâl dơi kơl, rnăk vâl jêr jŏt gay ma hun hao wăng sa. Đah ƀon M’briu ăp nău jêr jŏt ma aƀaơ ta ƀon rĭ ntŭk kan lĕ geh gĭt ngluh mbơh ăp bôk nău kan gay ma kơl na nê̆ đah ăp nuĭh tâm ƀon kơt lah rdâk njêng ƀon văn hóa”.

Buôn B’hôk, xã Yang Tao, nkuăl Lắk geh tâm rnglăp kan ndrel đah ntŭk kan Radio nău ngơi Việt Nam gŭ kan ta tây Nguyên bâh năm 2004. Ƀon aƀaơ geh bơi tât 270 rnăk đah 1 rbăn nuĭh, dŭt âk lah nuĭh Bunong. Tĭng wa Y Mor Kuăn- kruanh ƀon B’Hôk, bâh ntơm tậm rnglăp đah VOV- Tây Nguyên way geh hăn ndrel, kơl an ƀon lan tâm ƀon.

Ndơn kan VOV Tây Nguyên pă ndơ an ƀon lan ƀon B'Bhôk ta ntŭk nchueng rvêl njrăng srê Covid-19

Ndrel tât ôp khâl, pă ndơ ta ăp rơh lễ, tết, VOV Tây Nguyên lĕ rgŏ jă ăp doanh nghiệp pă ƀư an 5 ngih tâ rnglăp đah rnoh khlăy 400 rkeh prăk an ăp rnăk ach o, rnăk dơi kơl. Rnôk nuh srê Covid-19 ntoh ntưp trêng ta dŭt khay 9/2021, ƀon geh vơt bơi tât 200 nuĭh pah kan bâh ngai sĭt der nuh srê, tâm rnoh aơ geh âk nuĭh ntưp srê, lôch nĕ lĕ ƀon geh nchueng rvêl, ndơn kan an VOV-Tây Nguyên lĕ jŭr kơl an ƀon lan.

Ƀon B’hôk geh nchueng rvêl tâm 14 nar, mô dơi hăn kan, mô tŏng âk ntil ndơ. Ntŭk kan tâm rnglăp VOV-Tây Nguyên tât pă an du rnăk 10kg phe, 1 chrok ngi, 1 dŭng nột ngot, dak măm, ka kro, ndrel đah bok put mbung, dak rao ti..Ƀon lan dŭt rhơn ngăn. Geh tay ndơ sông sa, dak ngêt gay ma gŭ nkhah êng, njrăng rdanag ntưp srê, ƀon lan đăp mpăn rlet rlău nuh srê bah rơh jêr jŏt aơ”.

 Vũ Nam Trang, phóng viên VOV Tây Nguyên an gĭt, ta rơh nuh srê năm 2021, ndrel đah tâm rgop pă kơl rĭ BCH Công đoàn ntŭk kan hôm nha rgŏ jă ăp nuĭh lŏng nuih n’hâm kơl an n’gâng kan dak si Dak Lăk rlău 200 rkeh prăk rvăt ndơ dŏng, năp ăp ntil ndơ dak si kơl an nău njrăng rdâng nuh srê, pă an bơi tât 5 tấn ndơ sông sa an ƀon lan ta ăp ƀon tâm rnglăp ndrel B’hôk tâm rnôk ƀon geh nchueng rvêl.

“Đah nău kan lah phóng viên  rĭ mpôl hên n’hao nău kuăl đă ăp nuĭh lŏng nuih n’hâm, n’hanh tâm rgop săk soan bâh săk nơm gay ma kơl an ƀon lan nkual njônh ngai, nkual geh nchueng rvêl êng yor nuh srê Covid-19. Dŭt lap lah ăp nuĭh lŏng nuih n’hâm khân păng mbra geh hăn ndrel đah  mpôl kan phóng viên hên gay ma tât ta ntŭk ăp ntŭk gŭ nchueng rvêl êng, ta nkual njônh nkual ngai gay ma pă ndơ an ăp nuĭh ƀon lan geh nău khuch khat yor nuh srê Covid-19”.

Bơi tât 17 năm ba năp, đah nău kơl an bâh Công ty Điện lực Dak Lak n’hanh VOV Tây Nguyên, bar ƀon tâm rnglăp kan M’briu n’hanh B’hôk lĕ geh ăp nău rgâl na nê̆, nău rêh bâh ƀon lan ntơm geh hao, ngăn lah ta rnôk nuh srê Covid-19 ntưp rêng âk.

Nuĭh rblang: Thị Đoắt