VOV4.M’nông: Đah nau kan “lah geh săm ƀŭt tât ri ân geh rklaih nkre ta nê”, n’gor Dak Lak dôl nsôih ntrŭnh ƀư nau kơl an ntŭk kan tăch rgâl ndrel nŭih pah kan dôl mâp nau jêr yor srê Covid-19. Rnơm na nê, tât rnôk aơ geh bơi tât 3000 ntŭk kan, đah rlau 50.500 nŭih geh kơl an bah nau ntrŭnh mrô 68 bah Chính Phủ.

            Jêh rnôk jêh ăp nau ntrŭnh mbơh tĭng nau ntĭm bah Ntŭk kan bảo hiểm xã hội n’gor Dak Lak, công ty cổ phần thép Đông Nam Á, ntŭk kan ta Hoà Phú, nkuăl ƀon têh Buôn Ma Thuột, n’gor Dak Lak hŏ geh n’huch bơi tât 200 rkeh. Aơ lah rnoh prăk tâm ban 0,5% rnoh rgop bảo hiểm khuch rmah rnôk pah kan ân rlau 600 nŭih pah kan tâm du năm, kơp ntơm khay 7 tât khay 6 năm tât. Wa Lê Thị Hạ, Groi Tổng giám đốc Công ty mbơh, bol ma âk yơn nau kơl an aơ lah nau bonh, nau pă đah rmôt kan tâm rnôk mâp nau jêr:

            ‘Rnoh prăk khay đah công ty phung hên lah nklăp 3 rmen prăk du khay, rnôk geh n’huch 0,5% ri tâm ban lah 15 rkeh/khay. Rnôk aơ ri tơm kơl an ntơm nau ntrŭnh 68 ri đah công ty hŏ ntrŭnh mpeh nau nchrăp ndơ dŏng dak si, ndơ dŏng njrăng rdâng srê ndrel mât chăm nau rêh ân cán bộ pah kan, kơl an nau dŏng ân công ty tâm rnôk dôl mâp nau jêr aơ”.

            Bah năp nau tât bah srê Covid-19 tal 4, nkuăl ƀon têh Buôn Ma Thuột n’gor Dak Lak hŏ âk tŏ tâm nkhah srang nŭih tĭng nau ntrŭnh mrô 16, 15 ndrel 15+. Âk ntŭk kan hŏ nstŭng nau ê nkra tăch rgâl mô lah geh nau kan ê nkra tuch tăm tâm di gay ma đăp mpăn nau njrăng rdâng srê. Nau kan ndrel nau geh bah nŭih pah kan kŏ geh nau khuch.

Tơm kơl an tă bah nau ntrŭnh mrô 68 hŏ kơl an ăp ntŭk kan geh tay prăk gay ma mât chăm, kơl an nŭih pah kan, bonh đă khân păng đăp mpăn pah kan. Nô Trần Trung Tiến, nŭih pah kan bah công ty Cổ phần Thép Đông Nam Á, tâm ntŭk kan công nghiệp Hoà Phú, nkuăl ƀon têh Buôn Ma Thuột, n’gor Dak Lak, mbơh:

            ‘Rnôk srê nuh tât jêr ri bol ma n’hâm ƀư nau kan tuch tăm ndrel n’hâm pah kan geh n’huch âk ri nau geh jêng kŏ n’huch đŏng. Yơn lah, rđau kan công ty âk tŏ ngăn mât kơl an tât nŭih pah kan ndrel geh ăp nau kan ngăn,  bôk năp lah kơl an tay ân ăp tŏ ngêt sông tâm rnôk oh nô dôl ma pah kan, kơl an prăk xăng ndeh hăn ro ndrel mô lah kơl an tât ăp nŭih pah kan joi ntŭk gŭ, ntŭk gŭ ân êp, đăp mpăn lơn gay nŭih pah kan rklaih bah nau jêr, nkuăl geh srê dôl ma ntưp rêng gay dơi pah kan ndrel lŏ nsôih pah kan ân công ty”.

            Tĭng wa Nguyễn Khắc Tuấn, Giám đốc Bảo hiểm xã hội n’gor Dak Lak, ƀư ăp nau kơl an tĭng nau ntrŭnh mrô 68, Bảo hiểm xã hội n’gor hŏ n’huch rnoh rgop bảo hiểm khuch rmanh rnôk pah kan ân bơi tât 3000 ntŭk kan ndrel nŭih dŏng kan đah nklăp 44 rbăn nŭih. Rnoh prăk n’huch rlau 13 rmen. Nsrŭng nau rgop prăk rlu ranh ndrel khĭt ôm ân 4 ntŭk kan đah rnoh bơi tât 800 rkeh. Rmôt kan kŏ lah ntŭk tơm gay uănh năl ân ntŭk pah kan ndrel nŭih pah kan tă bah nau yor geh srê ndrel nsrŭng nau rgop prăk bảo hiểm xã hội yơn mô geh sa prăk roh kan pah gay geh nau kơl an tă bah nau ntrŭnh mrô 68. Tât rnôk aơ, nau ntrŭnh nau kan mrô 68 tâm nrŭk kan geh nau nơih ndrel kloh aih. Rnơm nê kơl an nŭih pah kan ndrel ntŭk kan rhuăt gleh nar kâp rnôk ƀư jêh săm ƀŭt kan.

            ‘Tâm nau ntrŭnh ƀư aơ ri phung hên hŏ tâm ban tă bah Trung ương tât n’gor lah ƀư tĭng nau ntrŭnh bah Chính phủ ndrel bah rđau kan. Bảo hiểm xã hội Việt Nam ri rđau lah tâm di nar ân geh năl nŭih pah kan ndrel ntŭk kan rnôk ma tŏng dơi săm ƀŭt ƀư nau kan êng ân ntŭk kan bảo hiểm xã hội ri tâm du mông ân geh kơp dơn ân ntŭk kan gay ma bu pơk trong nơih ngăn ân ntŭk kan ndrel nŭih pah kan geh kơl an tă bah nau ntrŭnh 68”.

            Wa Nguyễn Quang Thuân, Groi Giám đốc N’gâng kan Lao động-Thương binh ndrel Xã hội n’gor mbơh: Tât rnôk aơ ta Dak Lak hŏ ƀư 9/11 rmôt nau kan kơl an tĭng nkô̆ nau ntrŭnh mrô 68. Tâm nê, geh 3 rmôt ƀư nau kan ueh ngăn lah nau n’huch rnoh rgop bảo hiểm khuch rmanh rnôk pah kan, nau kan kơl nsrŭng nau rgop prăk rlu ranh ndrel khĭt ôm, nau kơl an nŭih pah kan nghệ thuật ndrel nŭih ntĭm mbơh nau kan pâh n’aih. Rnôk aơ, n’gâng kan dôl ntrŭnh ƀư ăp nau kan ntrŭnh dăng nau nkoch trêng, kơl nchră nau ân UBND n’gor jao nau dơi ân ƀư kơl an mpeh UBND ăp nkuăl, nkuăl têh ndrel nkuăl ƀon têh gay đăp mpăn mông, nar, nkô̆ nau ndrel nŭih geh kơl an. Nkre lah, N’gâng kan kŏ ndâk ăp rmôt kan gay ma uănh, bonh đă nau ƀư nau ntrŭnh 68 ta tâm dâng:

            ‘Gay ƀư ueh nau kan aơ tâm rơh tât ri n’gâng kan kŏ geh nau kan tâm nchră, tâm rgop nsum ma N’gâng kan nkoch mbơh nau, ăp ntŭk kan, n’gâng kan geh tât, ngăn lah ăp nkuăl n’hao nau kan nkoch trêng tât ăp nau kan đah ăp nŭih gay ma nchrăp đăp mpăn tâm di nau kan, tâm di nŭih, kon nŭih ndrel ndâk ăp nau ntĭm mbơh ân ăp rmôt kơl an aơ gay tă bah nê n’hao nau nkoch trêng gay ăp nŭih geh kơl an gĭt kloh lơn mpeh nau kan aơ”.

            Đah nau kan “lah geh săm ƀŭt tât ri ân geh rklaih nkre ta nê, mô ân nŭih ƀon lan ndrel ntŭk kan gŭ kâp jŏ” rnôk aơ ăp gưl kan, ntŭk kan bah n’gor Dak Lak dôl n’hao nau tâm rgop nau ƀư nau kan ntrŭnh kơp, ndâk nchih ăp nau kan kơl an ăp nŭih hăn pah kan ndrel nŭih dŏng nŭih pah kan tĭng nau ntrŭnh. Nkô̆ nau kơl an ân năn, tâm di nŭih, mbơh ân kloh rah vah, mô dơi ndăn tâm nê gay ma sa nkhiăn./.

            Nŭih rblang: H’Thi