VOV4.Mnông- N’gâng kan ntĭm nti n’gor Dak Lak dôl nsrôih mbơh ƀư ăp trong kan kơl an kon hoc tâm năm nti mhe 2021-2022. Tâm nĕ, dŭt mât uănh, kơl âk an ăp kon hoc geh F0, F1 n’hanh kon hoc tâm nkual geh nchueng rvêl nglah êng yorr geh nău khuch tât bâh nuh srê Covid-19. Tât nar 15/9 lĕ rngôch ăp kon hoc ta n’gor Dak Lak mbra ntơm lăp năm nti mhe.

Tĭng ta nău geh ngăn ta ntŭk ăp ngih nti mbra săch nău kan nti an tâm di. Yơn lah, tĭng rnoh kơp bâh ntŭk kan ntĭm n’hanh nti n’gor Dak Lak lam n’gor aƀaơ geh bơi tât 90 kon hoc lah nuĭh F0 n’hanh rlău 13.200 oh tâm rnoh gŭ nglah êng n’hanh rêh tâm ntŭk tâm nkhah, gay ma kơl an ăp oh mât đăp mpăn nău mĭn, tâm rnôk gŭ nhkah săm ji, ntŭk kan ntĭm n’hanh nti lĕ ntĭm đă ntrôl nău mbơh tơih, ntĭm đă mê̆ bơ̆, kon hoc ƀư tĭng răng dăng ăp nău ntrŭnh mpeh njrăng, rdâng nuh srê Covid-19.

Nuĭh rblang: Thị Đoắt