VOV4.M'nông: Ta n'gor Dak Lak, nău rêh kơt ơm mhe hŏ mbrơi plơ̆ tay đah nuĭh ƀon lan ta ăp nkual tơm nuh srê rnôk ăp nuĭh ntưp Covid-19 dơi mât kân, nuh srê bôk năp dơi rdêl bah. Âk nuĭh ji lôch jŏ nar săm hŏ plơ̆ sĭt tay đah rnăk wâl n'hanh ƀon lan. Nuh srê hŏ kơl an ăp nuĭh gŭ tâm dăch tay nsum lơn n'hanh khlay lơn ăp mông nar gŭ nsum.  

Lôch bơi 1 khay lĕ ma rnăk ân gŭ rgum êng yor ntưp Covid-19, nô Đỗ Văn Lực ta buôn Cuôr Đăng A, xã Cuôr Đăng, nkuâl Cư M’gar dŭt rhơn yor rnăk wâl hŏ đăp mpăn rgum nsum. Nô Lực nkoch: Tâm rơh nuh srê mhe aơ xã rnôk bôk khay 11, rnăk nô 5 nuĭh ri geh tât 4 nuĭh ntưp Covid-19. Tâm nê, lĕ 2 hê ur sai an gŭ săm êng da dê ƀư nău rêh jêng rlơ̆ rlơt. Dŭt rvê lah 2 hê kon jê̆ dôl năm hăn nti, geh ntưp ji đŏng. Nău rvê mpeh nuh srê dah âk ri saơ nău lap bah ji, wăch rgum rnăk wâl âk dah nê đŏng:

“Rnôk bôk năp ri dŭt rvê, yor lĕ dĭng nuĭh geh ntưp ji da dê jêng klach đŏng. Lôch nê bác sĩ mât chăm rgŏ jă djăt ma nkân nkân, tập thể dục, ngêt sa ăp tŏng kah uĕh, n'hâm suan ngăch dăng uĕh lah rlău dơi nău ji dơm. Rnăk gâp lap rnôk dơi plơ̆ tay đah nău rêh  kơt ơm".

Tă lah ngoăy tâm ăp tơm nuh srê ta Dak Lak, aƀaơ nău rêh bah nuĭh ƀon lan xã Cư Pui nkuâl Krông Bông hŏ plơ̆ tay kơt ơm. Wa Y Bran Niê, ta buôn Khoá, xã Cư Pui, dŭt rhơn rnôk rnăk geh 6/9 nuĭh lah F0, dơi săm bah da dê. Wa Y Bran an gĭt: ndrel đah nău rvê n'hâm suan n'hanh săk khĭt rêh, rnôk lĕ ma jay hăn gŭ rgum êng săm ji hôm ndjôt nkre đah nău rvê mir ba đŏng, yor cà phê hŏ tât rnôk klêh play; ndrôk rpu geh nuĭh mât chăm. Nơm geh n'gâng kan ntop kơl đŏng, kônh wa kuăl điện ôp khâl, ăp nai dak si lĕ nuih n'hâm kơl săm jêng ăp nuĭh hŏ ngăch dăng plơ̆ sĭt jay đăp mpăn. Si tăm, ndơ mât hŏ kơl mât chăm uĕh đŏng:

“Rnăk geh F0 rvê đŏng rnôk ăp nuĭh gŭ êng du ntŭk mô dơi tâm ôp ngơi. He hăn tât nê saơ dơi mât chăm ăp tŏng, piăng sông dak ngêt ăp tŏng. He sĭt ta aơ mâp tay rnăk wâl rhơn ngăn. He mô hôm rvê tay đŏng ôh yor ăp nuĭh hŏ bah ji lĕ hôm, ngăch dăng tay n'hanh plơ̆ tay nău kan kơt ơm hôm”.

 Nkuâl Krông Bông ngoăy tâm ăp nkuâl năl geh dŭt âk nuĭh ntưp Covid-19 tâm lam ƀon lan. Yơn lah, tât aƀaơ lơn âk hŏ bah, plơ̆ sĭt tay đah rnăk wâl pah kan jan sa tay. Wa Nguyễn Ngọc Pháp, Groi kruanh UBND nkuâl Krông Bông an gĭt: Ta ăp thôn, ƀon ntơm lah tơm nuh srê ri aƀaơ mô hôm năl geh nuĭh ntưp mhe tâm ƀon lan. Nkuâl hŏ plơ̆ tay kơt ơm, yơn nuih n'hâm hôm njrăng đŏng, nău gĭt êng tâm njrăng n'gang nuh srê hôm dơi n'hao prêh tay đŏng.

“Ƀan rđău đă nkuâl hŏ rđău đă lĕ n'hâm suan rgum nchih wăr, mpă wêl, puh nkhĭt kaman, ôp uănh ƀoi tĭng ăp F1, F2 n'hanh ngăch njŭn hăn an gŭ rgum êng. Hôm đah nkual mpă wêl hŏ groi nđôi lhăt tă bah Krông Bông ngăch rdêl bah nuh srê".

Tĭng nchih rgum bah n'gâng kan dak si n'gor Dak Lak kơp tât nar 16/12, lam n'gor hŏ năl geh rlău 9.700 nuĭh ntưp Covid-19, tâm nê rlău 7 rbăn nuĭh ji hŏ săm bah. N'gor mĭn lah Covid-19 dôl mbrơi dơi mât kân bah, n'hanh hŏ an rlu kan 1 nhih dak si manh ntăm ƀư. Âk nkuâl tâm n'gor, kơp lĕ ma ăp nkual ơm lah tơm nuh srê, nuĭh ƀon lan dôl bên di uĕh n'hanh dơi plơ̆ tay kơt ơm mhe./.

Nuĭh rblang: Điểu Thân