VOV4.M’nông: Rnôk aơ, ntŭk tăch ndoh ndơ rhŏ Tết Nguyên đán Nhâm Dần 2022 ta n’gor Dak Lak lĕ ntơm âk. Ndoh ndơ dơi mpla tăch dŭt uĕh, âk ntil mpeh ndơ, rup gui, uĕh kah, nkre âk nău n’hŭch thuk gay ngăch tŏng nău ŭch bah nuĭh dŏng.

          Hôm nklăp 1 khay tay lah tât Tết nguyên đán 2022, yơn yuh Huỳnh Thị Hương, ta phường Thành Nhất, nkual ƀon têh Buôn Ma Thuột lĕ ndăn tât du đêt siêu thị ta nkual gay mĭn joi gĭt n’hanh săch ăp ndơ khlay. Tĭng yuh Hương, năp rwăt rnôk aơ ri saơ rnoh khlay tâm di, uĕh kah ndơ uĕh đŏng.

          “Lah nsum ri Tết ăp nuĭh rwăt đŏng dak ngêt, ƀănh, mứt kĕo bia ndrănh way dŏng dơm. Saơ rup gui âk ntil uĕh, mpla uĕh măt uĕh dơh uănh, rnoh khlay ri saơ tâm di”.

          Uănh ta ăp chợ ƀon lan gŭ n’hanh ntŭk tăch ndơ ta phường Thành Nhất n’hanh Thanh Công, nkual ƀon têh Buôn Ma Thuột an saơ, ăp ndơ rhŏ dŏng khlay tâm rơh Tết dôl hao khlay. Yơn lah, nău ŭch rwăt năp bah nuĭh ƀon lan hôm hŏ hao. Yuh Nguyễn Thị Trúc Phương, mât uănh ntŭk tăch ndơ Ngọc Khánh 2, phường Thành Nhất, nkual ƀon têh Buôn Ma Thuột an gĭt, yor khuch srê jêng năm aơ yuh mô janh nglăp sĭt âk ndoh ndơ:

          “Ndoh ndơ năm aơ nchrăp sŏk đêt lơn nkôp đah ăp năm yor nu nău srê kơt aơ ri rnoh ndơ sŏk đêt. Rnoh khlay năm aơ ndoh ndơ hao lơn nkôp đah ăp năm, yơn tĭng ăp ndoh ndơ, geh ntil đăp mpăn rnoh khlay, geh ntil rnoh khlay mhe”.

Âk nuĭh ƀon lan ta nkual ƀon têh Buôn Ma Thuột lĕ joi hăn rwăt ndơ Tết.

          Rŏ đah ăp ntŭk tăch ndoh ndơ n’hanh chợ way ơm, ta ăp siêu thị têh kơt Go, Co.op Mart, Vinmart, MM Mega Markit..., ăp ndoh ndơ rhŏ Tết kơt ƀănh keo, ndrănh, bia, dak njŭng, mứt dŭt âk. Ăp siêu thị an geh ntŭk uĕh ngăn gay mpla nsơ ndơ Tết. Rnoh khlay ăp ntil ndơ ta siêu thị hôm e ta rnoh đăp mpăn. Nô Bùi Văn Quân, groi kruanh Siêu Thị Go Buôn Ma Thuột an gĭt:

“Rnoh ndơ hao 14% rnoh ntêm nkrem nkôp đah năm 2021, nchrăp soan rwăt tĭng siêu thị năl lah knŭng hao bah 5 tât 10% dơm, hôm tât rnôk aƀaơ ri soan rwăt mô hao. Rnoh khlay aƀaơ hôm e mât kơt ơm nkôp đah năm bah năp, lah ntŭk tăch geh nău rgâl geh tât nău rdêng mô lah nkra njêng bah nuĭh tăch ri rnôk nĕ mbra nkra rgâl bah kơi, yơn tât aƀaơ siêu thị dôl nsrôih mât rnoh khlay tâm ban năm bah năp”.

Yor nu nău srê Covid-19 hôm e jêr jŏt, ndrel đah nău nchrăp lor ndoh ndơ ta ntŭk, ăp siêu thị dôl ntrôl dăng trong tăch online, jao ndơ tât jay rhŏ nău ŭch năp rwăt bah nuĭh ƀon lan. Wa Nguyễn Ngọc Hiệp, Mât uănh ta MM Mega Markit Buôn Ma Thuột nkoch.

Ăp siêu thị an ntŭk êng gay mpal nsơ ndơ Tết

“Aƀaơ siêu thị mpôl hên ƀư âk trong tăch ndơ, lơn lah hun hao trong tăch ndơ online, jao ndơ tât ntŭk an nuĭh rwăt nkôp đah năm bah năp trong aơ hao jêng nklăp 300% đah rnoh năch kơt rnoh geh tăch ndơ”.

Gay đăp mpăn ntŭk tăch dŭt năm, tâm di nău ŭch rwăt bah nuĭh ƀon lan tâm rơh Tết Nguyên đán Nhâm Dần 2022, aƀaơ lĕ geh 10 doanh nghiệp têh ta n’gor Dak Lak ton ntêm nkrem ndơ dŏng đah dĭng lĕ khlay rlău 271 rmen prăk. Ăp ntil ndơ đăp mpăn geh phe, poăch sŭr, poăch djăr, tăp kik, djăr, dak ngi, ƀŏt ngot n’hanh ăp ntil ndơ nkret gâm, biăp, bum, play, bănh kĕo mứt. Nar khay ƀư tĭng đăp mpăn jŏ rlău 2 khay, bah nar 15/12/2021-28/1/2022.

                    Nuĭh rblang: Y Sưng Phê Ja