VOV4.M’nông:  Jêh 12 năm gŭ kâp rnơm, ntơm khay 3 năm aơ, nŭih ƀon lan tâm xã Cư San, nkuăl Mdrak, n’gor Dak Lak, ntŭk ntrŭnh nau nkra thuỷ điện 4.400 rmen Krông Pách Thượng, dôl geh ntrơn tât ntŭk gŭ mhe xã Cư Elang, nkuăl Ea Kar. Lam trong kan chính trị tâm nkuăl dôl ma rgum nŭih, ndơ dŏng du trong prêh ngăn bah ăp nau ntrŭnh bah Ngih dak gay kơl an ƀon lan ơm đăp mpăn nau gŭ rêh tâm ntŭk gŭ mhe.

Rlau du khay ma aơ, nkuăl gŭ mhe tâm thôn 1, xã Cư Elang, nkuăl Ea Kar, n’gor Dak Lak, kơt du ntŭk pah kan âk, tâm du nar lŏ geh ăp ngih mhe ndâk. Aơ lah ntŭk ntrơn gŭ mhe mrô 1 ân an ăp rnăk ntrơn ta ưbah nglau thủy lợi Krông Pách thượng, tâm xã Cư San, nkuăl Mdrak. Tĭng nau ŭch bah nŭih ƀon lan, rgâl ma nau âk ngih geh ndâk mhe, ngih dak kơl an ƀon lan ntrơn ngih vâl, drăp ndơ tă bah ntŭk ƀon ơm tât ndâk tâm ntŭk gŭ mhe. Ngoai tâm ăp rnăk bôk năp geh ntrơn lĕ ngih vâl, drăp ndơ tă bah ntŭk ơm tât gŭ ntŭk mhe lah nô Ma Văn Cường, mbơh, bol ma geh âk nau ê gĭt kloh, yơn rnơm geh nau kơl an bah n’gâng kan tâm ntŭk, nau rêh bah rnăk nô hŏ ntơm ueh đŏng, ndrel mô hôm nau rvê dak lip băm:

  ‘Gâp ntrơn sĭt ta aơ bơi tât 4 pơh ma aơ hôm. Nkuăl aơ ri kŏ geh nau đăp mpăn ngăn, aƀaơ nau rêh gŭ mbơm oi hôm”.

Đah rnăk nô Lều Văn Sùng, mhe geh ntrơn tât ntŭk gŭ mhe tâm thôn 1, xã Cư Elang, ngih kđar ơm kơt lah geh rgâl mhe, ntoh ngăn tâm dâng bri duh nar. Nô nkoch:

 ‘Rnôk bôk năp ri saơ rvê ngăn yơn lah jêh rnôk sĭt tât ta aơ ri saơ trong hăn kŏ geh hôm, điện, dak kŏ geh tŏng ăp da dê, cán bộ xã bu kơl an âk đŏng, ri gâp rhơn ngăn. Aƀaơ knŭng ƀư lŏ dơm ndrel ma nơm rnơm lah lah geh nau nsôih ri nau rêh jêh aơ tă mra geh lơn”.

Tâm rơh ntrơn bôk năp, hŏ geh 44 rnăk đah 207 nŭih tă bah Cư San tât nkuăl gŭ mhe mrô 1. Ta aơ, ăp rnăk geh ndơn pă 400m2 neh gŭ ndrel bơi tât du he neh tuch tăm gay ngăch đăp mpăn nau rêh. Aƀaơ, ăp rmôt kan bah 2 nkuăl Mdrak ndrel Ea Kar dôl ma lŏ ƀư nau ntrơn tal 2, ntrơn ƀon lah bah nkuăl nglau thuỷ lọi Krông Pách Thượng. Nchrăp tâm du khay tay, nkuăl ntrơn gŭ mhe tâm Cư Elang mra geh dĭng lĕ 230 rnăk, lah rnoi Mông. Wa Trần Văn Thanh, Kruanh UBND xã Cư Elang, nkuăl Ea Kar, ngơi:

 ‘Ăp rmôt kan geh tât tâm Mdrak ndrel Ea Kar phung hên tâm rgop nsum ueh ngăn, n’ăp ma ntŭk hăn kŏ kơt lah ntŭk tât. Ntơm bah nau kan, nau nchrăp bah UBND nkuăl ri phung hên kŏ ƀư ân jăp nau rgum ăp rmôt dân quân tự vệ, rmôt đoàn druh ndăm ndrel ăp rmôt kan bah xã, tâm rgop nsum đah rmôt kan bah nkuăl ăp nhoat hăn ntrơn ndrel kơl an kônh wa nkra ngih vâl, jêh ri đăp mpăn ăp nau ŭch ngăn kơt lah dak kloh, điện, gay mhâm ƀư kônh wa tât ntŭk gŭ mhe ân geh đăp mpăn nau rêh”.

Tĭng wa Lê Đình Chiến, Groi kruanh UBND nkuăl Ea Kar, gay kơl an kônh wa đăp mpăn gŭ âm ta Cư Elang, nkuăl rgum rmôt kan bah 16 xã nkuăl têh tâm pleh gay ma tât kơl an ƀon lan. Ăp nau kan bah ngih dak kŏ geh dŏng kơt du trong ueh ngăn, nơih ngăn đah kônh wa:

  ‘Phung hên ndâk jêng rmôt kan gay ma rklaih ăp nau kan ntoh luh, đăp mpăn rnă njrăng, geh điện, dak, dak si, ntĭm nti. Rnôk tât ma geh ji kuet ri ân geh kơl an nkre, geh rnăk ê geh koh, ntrơn, yơn ân geh mât kơl an ƀon lan lor. Kon se ma hăn tĭng me mbŏ tât tâm nê ri jrâu kan ntĭm nti ndrel ăp ngih săm ƀŭt ân geh pă ăp kon se lăp nti lor, hôm săm ƀŭt ƀư nau ntrơn leo ri njoăl êng ba kơi”.

Tĭng nau nchrăp, tât khay 7 aơ, n’gor Dak Lak mra ƀư ân jêh nau kan ntrơn rlau 700 rnăk luh bah nkuăl ƀư ntŭk têm dak hoch Krông Pách thượng. Aƀaơ nau kan ntrơn, trok tâm ân ngih vâl ndrel ntrơn tât ntŭk mhe hŏ geh dŏng di trong ueh ngăn ăp nau ntrŭnh bah ngih dak, kŏ kơt lah nau nsum ty n’ăp ma drăp ndơ, nuih n’hâm, nŭih kan bah lam ntrong kan chính trị tâm nkuăl. Hĭ geh ăp nau kan ntoh luh bah nau ntrơn leo mrô 1 geh bun dăp bêng, nkuăl mrô 2 ŭch ntrơn dôl ma geh ƀư ân jêh. Yơn lah, đah nau nsôih bah lam ntrong kan chính trị ndrel nau tâm ban nuih n’hâm bah ƀon lan, ăp nau nkol nê dôl ma geh doh rklaih. Jêh 12 năm gŭ kâp rnơm, nŭih ƀon lah tâm nkuăl geh ƀư dak bât Krông Pách thượng dôl ma ntơm geh du nau rêh ueh lăng lơn./.

Nŭih rblang: H’Thi