VOV4.M'nông: Ta năp nô nău nuh srê Covid-19 dôl tât krit nji, hang rhiăng sinh viên n'gâng kan dak si ta Dak Lak hŏ đăng ký râng ntop kơl êng njrăng n'gang nuh srê, rgop suan ndrel đah mpôl kan ƀư pah kan dak si ta bôk trong rlong sial.  

        Bơi 2 khay aơ, sinh viên Trần Ngọc Hải n'hanh rmôt sinh viên râng êng bah  khoa Y Dược, nhih nti Đại học Tây Nguyên râng ntop kơl pah kan njrăng n'gang nuh srê ta Ntŭk rgum kan dak si nkual ƀon têh Buôn Ma Thuột, n'gor Dak Lak. Ăp nar pah kan bah rmôt ntơm bah 7 mông 30 mnĭt ôi n'hanh ntoch jong tât 11 mông măng, mô dơn nê geh ăp rnôk ân tât 4 mông ôi mơ lôch bah. Nău kan bah khân păng lah tâm pă ntil, sŏk mham uănh năl n'hanh rgum nchih nău lư. Trần Ngọc Hải nkoch, gĭt nău lư Sở Y tế rgum sinh viên râng kơl njrăng, n'gang nuh srê Covid-19, nô hŏ đăng ký râng n'hanh hŏ 2 tơ̆ lăp tâm nklang nuh srê.

      Gâp đăng ký râng njrăng n'gang nuh srê hŏ 2 tơ̆, rơh bôk năp lah gâp hăn ta Bình Dương, lôch nê dơi rhuăt sĭt n'hanh gâp đăng ký hăn ta nkual ƀon têh Buôn Ma Thuột. Gâp saơ lah du hê sinh viên y ri he ân đăng ký hăn njrăng n'gang nuh srê neh dak ngăch lĕ nuh srê lơn, n'hanh he an lĕ suan mom ndăm bah he dah âk an neh dak ri he an.

        Tâm ban kơt Trần Ngọc Hải, ntơm bah khay 6 tât aƀaơ hŏ geh hang rhiăng sinh viên n'gâng kan y ta Dak Lak đăng ký râng ntop kơl ta bôk trong rlong sial nuh srê. Ndrel đah kơl an n'gor Bình Dương, sinh viên râng kơl êng hôm dơi tâm pă ntop kơl an Ntŭk rgum kan dak si nkual ƀon têh Buôn Ma Thuột, Ntŭk rgum mât kân nuh srê n'gor, n'hao dăng ntop kơl pah kan ôp uănh nuh srê, n'glăp nău nchih, uănh năl Covid-19, ntop kơl uănh năl ngăch an nuĭh ƀon lan tâm ăp nkual mpă wêl...Rlău dơi ăp jêr bah nău kan n'hanh nău rvê geh ma nău ntưp rêng nuh srê, ăp sinh viên saơ rhơn n'hanh n'hao êng săk yor hŏ rgop n'hâm suan tâm rơh ntrôl rŭch nuh srê Covid-19. Aơ lah rnôk gay ăp sinh viên dơi dŏng nău gĭt blău hŏ nti lăp dŏng ngăn ngăn tâm ban kơt rgum âk nău tă ơm gĭt kan ngăn ngăn an nău kan bah kơi tay. Sinh viên Nguyễn Thị Thanh Nga, Khoa Y Dược, nhih nti Đại học Tây Nguyên nkoch:

       Ntơm bah rnôk Sở Y tế n'hanh nhih nti kuăl jă ăp mpôl kan râng njrăng n'gang nuh srê ri gâp hŏ đăng ký râng gay ntop kơl ăp oh yuh mpeh n'gâng kan dak si, kơp tât aƀaơ hŏ 4 khay hôm. Gâp ŭch dơi rgop du gâl n'hâm suan he gay kơl nkual ƀon têh ntrôl rŭch nuh srê jêng mpŏng lah Dak Lak tâm ban kơt Buôn Ma Thuột ơm ntrôl rŭch dơi nuh srê.

        Đah nuih n'hâm lĕ suan mom ndăm, ăp sinh viên râng kơl êng pah kan răp jăp n'hanh geh nău dơn kan da dê. Nău mô sŭch lach bah khân păng dơi nuĭh ƀon lan kơp dơn n'hanh rnê âk. Wa Nguyễn Thị Thanh Hương, Kruanh buôn Alê A, phường Ea Tam, nkual ƀon têh Buôn Ma Thuột an gĭt:

        Tâm bah ri aơ nơh ri ƀon gâp geh ăp oh nô sinh viên nhih nti Đại học Tây Nguyên mpeh tâm boh kan nsum uĕh, dŭt rah rơch, ăp dăp n'hanh ƀư lĕ nău dơn kan bah nuĭh sinh viên. Uănh nsum kan nsum nkre đah ƀon n'hanh ăp sinh viên dŭt uĕh đŏng. Lor rnôk sinh viên tât ri he geh tâm ôp đah sinh viên gay ăp nuĭh gĭt ntŭk he test ta ah ntŭk đŏng. Ăp kon se sinh viên tât êng n'hanh uănh nsum lah dŭt uĕh, dŭt rah rơch đah nuĭh ƀon lan.

        Bol ma tâm rdâng đah geh ma nău ntưp âk yơn ăp sinh viên n'gâng kan dak si ta Dak Lak hôm nar măng nsrôih ndrel rmôt kan dak si pah kan ta bôk trong rlong sial njrăng n'gang nuh srê. Khân păng dơn mpŏng đah nău rgop bah he mbra ơm ntrôl rŭch nuh srê gay săk nơm tâm ban kơt ăp nai dak si dôl pah kan ơm dơi plơ̆ sĭt đah rnăk wâl; ăp nkual đăp mpăn mbrơi dơi pơk hvi n'hanh nău rêh ơm dơi plơ̆ tay kơt ơm. Rnôk ma nuh srê hôm tât krit nji, ri đah nuih n'hâm n'hanh nău dơn kan, ăp sinh viên n'gâng kan dak si hôm hăn râng kơl êng bôk năp đŏng. Sinh viên Nguyễn Đức Duy, Khoa Y Dược, nhih nti Đại học Tây Nguyên lah rjăp nău nsrôih:

       Tâm let năp tay ma nuh srê hôm tât krit nji tay ri gâp mbra râng kơl tay đŏng. Rnôk râng ri gâp ŭch rŏng he mbra dơi rgop du gâl n'hâm suan bah he gay kơl nô nău nuh srê ơm ngăch hăn rlău gay he dơi plơ̆ tay nău rêh kơt ơm đŏng.

        Ntơm bah rnôk nuh srê Covid-19 tâl 4 ntoh luh tât aƀaơ, n'gor Dak Lak hŏ rgum bơi 800 sinh viên, cán bộ n'hanh nuĭh kan bah ăp nhih nti đại học tâm n'gor gay ntop kơl ăp mpôl kan ta bôk trong rlong sial njrăng n'gang nuh srê. Ma suan mom, nuih n'hâm hăn chŏl lor, rlău dơi ăp nău jêr jŏt, ŏ r'ah n'hanh klach rvê, ăp sinh viên n'gâng kan dak si hŏ nsrôih kơt dŏng ăp nău gĭt blău hŏ tă nti, râng ndrel rmôt cán bộ, nuĭh kan dak si tĭng ƀư nău kan, rgop suan ntrôch rŭch nuh srê Covid-19 gay ơm nsĭt nău rêh plơ̆ tay kơt ơm./.

Nuĭh rblang: Điểu Thân