VOV4.M’nông - Tă bah khuch srê Covid-19, âk doanh nghiệp geh nău jêr jŏt an rlu nkra njêng, koh n’hŭch pah kan, đê̆ đŏng chrai rnon, nkre nĕ lah âk nuĭh pah kan ta Dak Lak roh nău kan n’hanh prăk khay. Gay ăp nuĭh an n’hŭch jêr jŏt, Dak Lak lĕ nta an ăp nuĭh pah kan dơi geh ntop kơl roh nău kan du trong tâm di.

         Djôt sam ƀŭt rhăch nău hăn Ntŭk mbơh nkoch nău kan n’gor Dak Lak gay ƀư sam ƀŭt dăn đă dơi geh nău ntop kơl roh nău kan, nkre joi du nău kan mhe, nô Trương Đức Dũng, ta trong Đào Duy Từ, phường Thành Công, nkual ƀon têh Buôn Ma Thuột an gĭt: Bah năp đaơ nô ƀư phung pah kan đah prăk khay 6 rkeh prăk/khay. Ăp nău khuch bah srê Covid-19 bah năm 2020 n’hanh rơh srê aƀaơ lĕ ƀư an công ty dôih rnon. Lor rnôk dơi joi nău kan mhe, nău rêh rnăk wâl knơm đêt tâm rnoh prăk bảo hiểm roh  nău kân ma nơm dơi dơn:

         “Tâm rnôk srê bah năm e plơ̆ ma aơ doanh nghiệp ntơm geh nău jur n’hanh mô dơi mbak anh jêng an rlu chrai năm aơ. Oh mpŏng dơi joi nău kan mhe đăp mpăn lơn tâm nău rêh”.

Nuĭh kan ntŭk kan nkoch mbơh nău kan ntop kơl nuĭh pah kan roh nău kan ƀư sam ƀŭt dơn ntop kơl roh nău kan

         Roh nău kan đŏng n’hanh plŏ sĭt bah n’gor Khánh Hòa, nô Nguyễn Vũ Bốn, thôn 6, xă Ea Bhôk, nkuăl Cư Kuin, ndăn hăn ƀư sam ƀŭt dơi geh nău ntop kơl roh nău kan. Nô Bốn an gĭt, nô lĕ dơi nuĭh pah kan bah Ntŭk mbơh nkoch nău kan Dak Lak ntĭm na nê̆ mpeh nău ƀư sam ƀŭt n’hanh ngăch dơn rnoh prăk ntop kơl roh nău kan rlău 2 rkeh prăk/khay. Nô Bốn an gĭt, bôl rnoh aơ đêt lơn nkôp đah prăk khay, yơn hôm e rgop kơl rnăk wâl rlet rlău jêr jŏt:

         “Tâm rnôk nu nău srê aƀaơ mô geh nău kan mhe ri Bảo hiểm roh nău kan dơi oi du gâl. Tâm nar tât gâp ŭch joi nău kan êp jay, êp rnăk wâl”.

         Wa Nguyễn Văn Cường, Groi Kruanh Ntŭk mbơh nkoch nău kan (N’gâng kan Lao động Thương binh n’hanh Xã hội) n’gor Dak Lak an gĭt, tâm 5 khay bôk năm 2021, Dak Lak lĕ geh 3.365 nuĭh ndơ̆ sam ƀŭt rhăch nău dăn mkra nău ntop kơl roh nău kan. Êng khay 5 geh rlău 1 rbăn sam ƀŭt rhăch nău, hao 15% nkôp đah khay bah năp. Tâm nĕ rnoh nuĭh pah kan bah dih n’gor ndơ̆ sam ƀŭt rhăch nău dăn đă ntop kơl roh nău kan geh 70%. Aƀaơ lĕ geh bơi 3 rbăn nuĭh dơi ntrŭnh an ntop kơl roh nău kan đah rnoh prăk rlău 45 rmen prăk.

         Ndrel đah nău mkra trok ntop kơl roh nău kan, gay kơl nuĭh pah kan đăp mpăn nău rêh, Ntŭk kan hôm nsrôih mbơh ntĭm, nkoch nău kan, ntop kơl nti nău kan. Knơm nĕ, tâm khay 5 lĕ geh 89 nuĭh dôl geh ntop kơl roh nău kan dơi nti nău kan tĭng nău ntrŭnh, đah prăk ntop kơl bơi 400 rkeh prăk. Ntŭk kan lĕ rgâl ăp nău ƀư mbơh ntĭm nău kan, boăt nthoi đah doanh nghiệp gay kơl ăp nuĭh pah kan ơm joi tay geh nău kan. Wa Nguyễn Văn Cường an gĭt:

         “Mpeh trong kan nkoch mbơh nău kan rnôk geh srê khuch dŭt têh ăp nău kan kơt nău ƀư ăp rgâl joi nău kan ăp nău ƀư rgum âk nuĭh lah Ntŭk kan mô dơi ƀư tĭng. Ntŭk kan knŭng rgum mbơh nkoch tă bah điện thoại, Website, facebook lah dŭt âk. Ntŭk kan tâm ôp đah doanh nghiệp, tâm ôp đah nuĭh pah kan gay bu boăt nthoi tă bah điện thoại mô lah ndơ̆ sam ƀŭt rhăch nău tât na nê̆”.

         Nău ntop kơl mkra ăp sam ƀŭt ntop kơl roh nău kan ngăch bah ngih pah kan dơi kan Dak Lak lĕ du gâl kơl nuĭh pah kan lĕ roh nău kan yor khuch bah srê Covid-19 đăp mpăn, rlet rlău lor jêr jŏt dơi geh nău kan mhe./.

Nuĭh rblang: Y Sưng Phê Ja