VOV4.M’nông – Bôl geh khuch bah chôt srê Covid-19 yơn 11 rmôt rnoh an wăng sa-rêh jêng bah n’gor Dak Nông geh da dê n’hanh rlău rnoh an trong nchrăp n’gluh an. Nău mbơh aơ dơi nkoch ta “rƀŭn nchră n’glôch jêh trong kan năm 2021, jao an trong nchrăp, trok tâm êng n’hanh mbơh ƀư nău kan năm 2022”, yor UBND n’gor ƀư kêng măng 16/12.

Dak Nông: 11 rnoh an wăng sa rêh jêng geh da dê n’hanh rlău nău nchrăp năm

Tĭng nău mbơh bah UBND n’gor Dak Nông, tâm năm 2021, ngăch hao jêng GDP bah n’gor geh 8,63%, dâk tal 7/63 n’gor, nkual ƀon têh ta lam dak; rĭng geh bôk nuĭh geh 52,1 rkeh prăk/du hê/du năm. Sŏk an tơm prăk ngih dak geh rlău 3.100 rmen prăk, rlău nchoh mbơh n’gor jao. Dĭng lĕ trong nchrăp prăk ntuh kơl ngih dak năm 2021 bah n’gor lah 2.117 rmen prăk, rnoh pă an manh geh bơi 98% trong nchrăp.. Đah trong nchrăp hun hao wăng sa-rêh jêng năm 2022, Dak Nông nchrăp mât rnoh hao jêng GDP geh 7,5%; sŏk an tơm prăk geh rlău 3.000 rmen prăk; rnoh rnăk ach o bah n’gor hŭch rlău 3%, nkual ƀon lan rnoi đêt geh 5% let lơ.

Nŭih blang: Y Sưng Phê Ja