VOV4.M’nông: Săch kan ntoh măt Quốc hội gưl XV ndrel ntơh măt HĐND ăp gưl năm kan 2021-2026 lah nau kan chính trị khlay. Ta Dak Nông, Uỷ ban săch kan bah n’gor dôl rgum rđau ăp ntŭk kan, rmôt kan, n’gor nsôih nchrăp đăp mpăn tĭng di nau kan, ƀon lan ƀư tơm ndrel nau ntrŭnh bah pháp luật.

            Rnơm ƀư ueh nau kan nkoch mbơh nau săch kan ntoh măt Quốc hội gưl XV ndrel ntơh măt HĐND ăp gưl năm kan 2021-2026 ma âk cử tri tâm nkuăl jru, nkuăl ngai, nkuăl jêr jŏt ngăn bah n’gor Dak Nông hŏ gĭt kloh lơn nau kan ndrel nau dơi bah săk nơm. Wa H’Plơ tâm ƀon Sar pa, xã Thuận An, nkuăl Dak Mil, mbơh kônh wa mro uănh tĭng ăp nhoat tâm nchră ndrel ăp nau mbơh geh nkoch bah nŭih ân geh săch ntoh măt Quốc hội, HĐND ăp gưl:

             ‘Phung hên ŭch ăp nŭih geh ƀon lan săch, khân păng mra leo lôch nau dơi bah nơm gay ma bonh đă leo thôn, ƀon hao jêng, kơl an neh dak nar lơn hun hao, ƀon lan nar lơn sâm geh, văng sa nar lơn đăp mpăn”.

            Tĭng wa Nguyễn Thị Thu Hường, Giám đốc Sở Nội vụ, Thư ký bah Uỷ ban săch kan Dak Nông mbơh, tât rnôk aơ, nau nchrăp ân nau săch kan ntoh măt Quốc hội gưl XV ndrel ntơh măt HĐND ăp gưl năm kan 2021-2026 tâm n’gor Dak Nông hŏ geh ntrŭnh ân năn, tâm di nau ntrŭnh bah pháp luật, nau kan geh ƀư tĭng nau nchrăp kan bah Hội đồng săch kan neh dak ndrel Uỷ ban săch kan ăp gưl. Lam n’gor hŏ ndâk 2 rmôt săch kan ntơh măt Quốc hội ndrel 14 rnâng kan săch ntơh măt HĐND n’gor, 8 uỷ ban săch kan HĐND gưl nkuăl, 71 uỷ ban săch kan HĐND gưl xã. Jêh rnôk tâm nchră tal 2, n’gor Dak Nông mbơh 11 nŭih ân geh săch ƀư ntơh măt Quốc hội gưl XV, 96 nŭih geh ân săch ntơh măt HĐND n’gor, 507 nŭih geh ân săch ƀư ntoh măt HĐND nkuăl, 3.244 nŭih geh ân săch ntơh măt HĐND gưl xã, năm kan 2021-2026:

             ‘Aƀaơ, Rnâng kan rđau kan bah n’gor kŏ kơt lah Uỷ ban săch kan bah n’gor hŏ rđau ân ăp nkuăl, ăp xã tĭng nau pă gưl bah nơm gay ntrŭnh ndâk ăp rmôt săch kan. Jêh nê, xã mra đă ân nkuăl kơp ăp ntŭk gay ma nklăch phiếu ndrel ndâk rmôt nklăch phiếu. Mpeh nau kơp uănh ntŭk ƀư nau kan kŏ kơt lah pă tơm prăk ndrel nau kan êng ri phung hên hŏ tâm nchră mbơh nau ân uỷ ban săch kan bah n’gor rđau ăp nkuăl kơt tĭng luật kŏ kơt lâh ăp nau ntĭm mbơh bah trung ương, ntĭm mbơh bah n’gor gay ma ntơm tĭng di nau kan bah rơh săch kan”.

            Ndrel ma nê, Rnâng kan bah Uỷ ban Mặt trận ăp gưl tâm rgop nsum, nchrăp ăp tŏng ăp nau dơi gay ƀư ân dơi ăp nau tâm mâp ma ƀon lan, bonh đă săch kan bah ăp nŭih ntoh măt Quốc hội gưl XV ndrel ntơh măt HĐND n’gor năm kan 2021-2026. UBND ăp xã lŏ kơp uănh, ntop tay nŭih cử tri rgâl ntŭk gŭ, ăp nŭih ntrơn ntŭk êng ân geh đăp mpăn cử tri geh ƀư nau dơi bah nơm tĭng nau ntrŭnh bah pháp luật. Wa Nguyễn Phú Nghĩ, Groi Kruanh Uỷ ban MTTQ n’gor Dak Nông mbơh, rơh tâm nchră tâm gưl n’gor ntơm mbơh kloh rah vah, ƀon lan ƀư tơm, nar ƀư geh tĭng luật ndrel geh nau tâm ban bah cử tri:

             ‘Nau kan mbơh săch ntơh măt ta ntŭk pah kan, rmôt kan ndrel sŏk nau rgop bah cử tri ntŭk nơm, ndrel ndrel nau đă bah rnâng kan rđau kan pơk hvi geh ƀư rjăp. Ăp nŭih ndŏ luh geh rnơm âk ngăn, kơt lah tâm rnôk ŭch geh săch lăp tâm rnâng kan rđau kan hŏ săch nŭih tâm di, geh nau dơi gay ma ndŏ luh ân geh săch lăp kan  tâm Quốc hội ndrel HĐND ăp gưl. Nau dơi mpeh ntoh măt ri prêh ngăn, mpeh nau dơi, năm mom, năm kan cán bộ kŏ geh đăp mpăn nau đă ndrel đăp mpăn ntoh dơi nau ŭch tâm di pháp luật bah ƀon lan”.

            Ta nar mêt uănh nau kan săch săch kan tâm lơ 23/5, wa Phùng Khánh Tài, Groi Kruanh Uỷ ban Trung ương MTTQ Việt Nam đă n’gor Dak Nông lŏ ƀư ueh nau nkoch trêng mpeh tâm ban, tâm di ndrel săk tam. MTTQ n’gor ân ƀư ueh nau nchrăp kan ân rơh rƀŭn nchră tal 3 gay ma săch, ndâk moh săk nŭih geh săch tŏng dơi bah ntơh măt Quốc hội ndrel ntoh măt HĐND ăp gưl năm kan 2021-2026, nkre ân ƀư ueh nau mbơh kan ân nŭih kan tâm Uỷ ban săch kan ăp gưl:

             ‘ Gâp đă n’gor ân ƀư ueh nau kan rklaih săm ƀŭt phong dôih, mbơh đă bah ƀon lan. Lŏ kơp uănh rnoh nŭih râng ntoh măt Quốc hội kŏ kơt lah ntơh măt HĐND ăp gưl, ngăn lah nau kan mpeh nau dơi chính trị, ăp nau kan chính trị rnôkâƀơ geh nsum ma ăp nau kan geh bu nkoch mbơh tâm ăp rnôk tâm mâp ma cử tri. Gâp ân lah aơ lah nau khlayt ngăn gay geh nau dơi nsing tâm nê geh ăp nau kan rnôk nơm dŏng. Phung hên đă n’gor mât jăp nau kan ƀon lan, ngăn lah ntŭk geh ăp nau ji nuih ƀư nau phong dôih âk nŭih, nau kan mpeh neh ntu, ntŭk ntu mô lah ăp nau kan geh tât tĭng chroh. N’gor ân uănh khlay ngăn gay ma rklaih, der ân phung rlăng nsing ndăn tâm nê gay ma nsŭk đă ƀư khuch tât nau săch kan”.

            Aƀaơ, nau nchrăp kan ân nar rgum lam ƀon lan dôl ma geh n’gor Dak Nông ntrŭnh ân tâm ban, đăp mpăn tâm di nau ntrŭnh, nau đă ndrel nar ƀư. Nkô̆ nau bah n’gor lah săch kan du tŏ ân tŏng rnoh nŭih ndrel rnoh geh săch dơi ăp ntoh măt nŭih geh nau blau, tâm di ma nau kan ntoh măt ân nau ŭch ndrel nau dơi ƀư tơm bah ƀon lan./.

                                                Nŭih rblang: H’Thi