VOV4.M’nông: Tĭng nau kơp bah Uỷ ban Dân tộc, rnoh rnăk ach o tâm nkuăl gôl yôk âk rlau 2,5 tơ̆ rđil đah nau geh nsum bah lam dak. Nau geh du hê bôk nŭih bah rnoi mpôl đê̆ kŏ tâm ban 1/3 rnoh geh bah nau rgum nsum bah lam dak. Ngoai tâm ăp nau kan ndơ̆ luh gay ma rklaih nau jêr tâm nkuăl rnoi mpôl đê̆, nê lah đăp mpăn nau ƀư ăp nau kan ntuh kơl ân nkuăl aơ.

            Ƀư tĭng ăp nau ntrŭnh, ntrong kan bah Đảng ndrel Ngih dak mpeh nau kơl an, ntuh kơl ân nkuăl rnoi mpôl đê̆, gôl yôk, nkuăl nroi mpôl đê̆ dôl geh ăp rmôt kơl an bah rnoi mpôl kơt lah nau kan geh tĭng rnoi ndrel rmôt rnoi; nau kan hun hao văng sa, rêh jêng tĭng nkuăl, nau kan hun hao văng sa, rêh jêng tĭng nau kan. Tâm nê geh 2 bôk nau kan nkô̆ nau bah neh dak (Bôk nau kan neh dak n’huch ach o nâp nâl ndrel Bôk nau kan ndâk njêng ƀon lan mhe) ndrel ăp bôk nau kan geh nkô̆ nau. Gay dơi ƀư, ăp gưl kan, ăp rmôt kan hŏ ntrŭnh âk nau ntrŭnh rđau, ntĭm mbơh ndrel ƀư, geh dơi ăp nau ngăn, bah nê rgop nau n’hao nau dơi, hun hao tu tơm, nau ntĭm nti nŭih, kŏ kơt lah hun hao văng sa, rêh jêng, mât đăp mpăn chính trị, đăp mpăn nau rêh, ngăn lah rnoi mpôl đê̆ nar lơn geh n’hao.

            Yơn lah, nau tơm bah nau kan ê nkra, nê lah nau kơlan kônh wa rƀŏng tât nau rklaih ach o nâp nâl ri ê geh ntuh kơl tâm ban. Ndri ma, rnoh mplơ̆ tay ach o tâm nkuăl rnoi mpôl đê̆ hôm prêh. Mô tŏng nau ntĭm, mô blau nau kan, ăp rnăk nŭih rnoi mpôl đê̆ ngăn ngên jêr jŏt ê geh nau blau dŏng tơm prăk kan. Rnôk aơ nau ji ngot ach p hŏ n’huch, yơn gay geh êng ndơ sa, ndơ tuch tăm ri hôm lah nau jêr. Wa Hồ Thị Minh-Groi Kruanh Ban Dân tộc n’gor Quảng Trị ân lah, nau kan tă bah nau rgâl tâm nuih n’hâm ƀon lan:

            ‘Rnôk aơ lah ân geh rgâl ăp ntil, rgâl nau mĭn, rgâl nau kan. Lah nơm geh nơm pă ân kônh wa dơm ri mô dơi ôh. Nau khlay rnôk aơ lah nơm ân săch tơm tăm, mpa rong, neh ntu ân moh tâm di ma ntil tăm”.

            Wa Quàng Văn Hương-Groi Kruanh Hội đồng dân tộc bah Quốc hội ân lah, ăp nkuăl ân geh ntĭm nti âk tơ̆, yor đah nŭih rnoi mpôl đê̆, ndrel âk rnoh nau gĭt, ndrel ma rnoh prăk geh nê ân moh nau dŏng ân tâm di ma nau ngăn, mô lah nơm leo nŭih ƀon lan tât ntĭm tâm mbok lŏ, tâm trong mương bah nau kan ngăn, gay kônh wa gĭt lơn, yơn mô di ân rgum tâm ngih rƀŭn ân tŏng ăp:

            ‘Nau kan hun hao tuch tăm, kônh wa mơng ma nau kan tuch tăm tĭng trong ơm, nau kan tuch tăm ơm, gay hun hao tĭng nau kan mhe ri nơm na geh ntĭm mbơh ngăn. Kônh wa ŭch geh nau jao, nau hăn ro hôm jêr, nau gĭt mô âk ri ân geh mbơh tĭng nhoat. Kônh wa ŭch geh bau ntĭm nti đŏng yơn mô tŏng geh. Yor nơm ê geh nau blau ƀư nau kan dơm. Ndri ma ân geh nau kan ân tâm di, ơ dĭng geh ƀư rgum n’hâm ƀon lan, lah nơm knŭng nsing ndăn tâm nê lah nau kan bah nơm ê geh kloh”.

            Rơh rlau aơ, Hội đồng dân tộc bah Quốc hội hŏ đă Chính phủ ntrŭnh ƀư nau nchrăp n’hao tơm prăk manh bah Ngân hàng chính sách xã hội, n’hao rnoh geh ân manh ntơm 8 rkeh hao jêng 15-20 rkeh/rnăk, n’hao rnoh geh bah neh ntu tuch tăm, kơl an ntrơn rgâl nau kan ntơm 15 hao jêng 20-30 rkeh; pơk hvi nau kan ƀư êng nkuăl hôm jêr, jêr ngăn (tĭng nau ntrŭnh 54). Êp nê, n’hao tay rnoh prăk ân manh đah rnăk ach o, pơk âk nŭih geh manh prăk bah Ngân hàng chính sách đah ăp rnăk ach o mô lah rnăk mhe rklaih ach o, gay ăp nŭih aơ dơi rklaih ân nâp.

            Mpeh ntŭk kan Ngih dak, Uỷ ban Dân tộc kŏ ndâk nau kan ân ueh tĭng trong rgum ăp nau kan lôch năm ân ƀư, kơp uănh ăp nŭih geh kơl an nau kan gay mô ân tâm rkăng. Ăp n’gâng kan, ntŭk kan rnôk ndâk ăp nau kan gay ma ntrŭt dăng hun hao văng sa rêh jêng tâm nkuăl rnoi mpôl đê̆, ân geh đăp mpăn nau râng tâm rgop ndrel mêt uănh bah Uỷ ban Dân tộc. Nau kan pă ntop nŭih kơl an ăp nkuăl ân geh kơl an nkuăl rnoi mpôl đê̆ ndrel nkuăl jêr geh rnoh ach o âk, pă tơm prăk ân tâm di, mô ân nŭih ƀon lan ach o rgop kơl./.

Nŭih rblang: H’Thi