VOV4.M’nông: Ơi kônh wa! Aƀaơ, bol hŏ geh tâm ban ŭch mpeh rnoh âk nuĭh ntơh măt Quốc hội lah nuĭh rnoi mpôl đê̆ lah 18%, yơn i ngăn uănh năl ăp năm kan bah năp nơh mô tŏng da dê rđĭl đah rnoh âk ndơ̆ luh. Năm kan gưl 14, rnoh âk nuĭh ntơh măt Quốc hội lah nuĭh rnoi mpôl đê̆ dơn geh 17,3% dơm, tâm ban đah 86 nuĭh, rđĭl đah trong nchrăp bôk năp lah mô tŏng 4 nuĭh...Nău dja ndơ̆ luh nău ôp, bah nkô̆ n'hanh mhâm trong ƀư gay đăp mpăn tŏng ăp rnoh nuĭh an năm kan tât. aơ lah nkô̆ nău ân dơi uănh năl kloh bah âk mpeh.

Tĭng rnoh nchih rgum bah Hội đồng dân tộc bah Quốc hội, rnoh âk nuĭh ntơh măt lah nuĭh rnoi mpôl đê̆ râng lăp Quốc hội hao âk mbro tĭng khóa. Âk khóa mhe aơ, nuĭh ntơh măt lah nuĭh rnoi mpôl đê̆ hŏ âk 15 - 18% rđĭl đah lĕ rngôch rnoh đại biểu Quốc hội. Tâm nê, Quốc hội khóa XIII geh 78 nuĭh ntơh măt, âk 15,6% tâm lĕ rngôch rnoh 500 đại biểu Quốc hội. Năm kan Quốc hội khóa XIV, nuĭh ntơh măt lah nuĭh rnoi mpôl đê̆ 86 nuĭh âk 17,3%.

Nău ƀon lan ăp nuĭh rnoi mpôl đê̆ râng n'hanh sơch dơi ăp nuĭh ntơh măt Quốc hội lah nuĭh gĭt blău ngăn, lĕ nuih n'hâm dơn kan, nău dơn kan hŏ rgop mô jê̆ tâm nău dơi bah Quốc hội, lơn lah tâm nău rdâk njêng n'hanh tĭng ƀư jăp ăp trong kơl nuĭh rnoi mpôl đê̆ bah Đảng, Ngih dak. Aơ lah ăp trong kơl khlay gay ntrŭt ntrôl nău hun hao n'hanh n'hao săk geh nău rêh bah nuĭh ƀon lan nkual mpeh yôk yang, nkual ƀon lan nuĭh rnoi mpôl đê̆. Yor nuĭh ntơh măt lah nuĭh rnoi mpôl đê̆ lah ăp ndơ an saơ dŭt kloh mpeh ăp nău nchiăng khan, jêr jŏt ta ntŭk he nơm, n'gor he nơm gŭ rêh ntơm bah nê geh ăp nău rgop dăch dêh ngăn ngăn. Nău dja dơi cử tri Phạm Giáo, nkuâl Đức Phổ, n'gor Quảng Ngãi mpơl nău:

“N'hao âk nuĭh ntơh măt an nkual jêr jŏt, nkual jru, nkual ngai, nkual ƀon lan nuĭh rnoi mpôl đê̆ ri mbra geh nău gĭt ngăn ngăn lơn, wât âk lơn ta nkual ƀon lan nuĭh rnoi mpôl đê̆ way lah geh âk jêr jŏt, nău gĭt blău ƀon lan đêt, wăng sa hôm jêr jŏt. Yor kơt nê̆, lơn ma wât dơi âk jêr jŏt, wât dơi ăp nău ŭch rŏng bah nuĭh ƀon lan ri mbra ndjôt an Quốc hội gay geh ăp trong kơl đah ăp nkual dja, đăp mpăn n'hao săk geh nău rêh bah nuĭh ƀon lan nkra bah ir jêr jŏt bah khân păng".

Lĕ dĭng nuĭh hŏ gĭt đŏng, nău ntơh măt lah nuĭh rnoi mpôl đê̆ râng ăp nhih pah kan bah Quốc hội n'hanh Hội đồng nhân dân ăp gưl mbra gĭt uĕh lơn ăp nkô̆ nău ta ntŭk tâm dâng, yơn gay mhâm ƀư dơi geh tât rnoh 18% tĭng rnoh tât Quốc hội jao ri aơ lah nău jêr nkra. Yor tĭng nău wa Quàng Văn Hương, Groi kruanh Hội đồng dân tộc bah Quốc hội ri nkô̆ nău geh tât ta nkual ƀon lan nuĭh rnoi mpôl đê̆ n'hanh mpeh yôk yang lah nkual dŭt jêr jŏt, nău gĭt blău bah nuĭh ƀon lan đêt n'hanh nău hun hao đah ăp rnoi nuĭh  mô tâm ban n'hanh păng dêh lơn dŭt âk rđĭl đah nău gĭt blău nsum, nău dja hŏ ring tât mô đêt tât dơi geh rơh bầu cử, nău tâm ban blău sơch ăp nuĭh ntơh măt lah jêr ngăn, mô lah lôch rnôk sơch hôm yơn ăp nuĭh dâk tâm rlong mô dơi tŏng đah nău ŭch geh kan, mô hŏ ntoh lư ngăn mô lah geh du nkô̆ nău đŏng lah nkô̆ nău "mbăk anh dăp rgum”.

Nuĭh dâk tâm rlong rnôk mbăk anh jâk nău dăp rgum, rnoi mpôl đê̆, mom ndăm, bah dih Đảng n'hanh bu ur đŏng. Du hê nuĭh ma tŏng geh lĕ 4 ntil nê, bu tŏng geh lĕ ăp ntil rnoh nê gay bu râng, yơn rlơ̆ tay lah mpet jâk dŭt têh. Joi geh dơi du hê nuĭh kơt nê lah dŭt jêr. Yor lah ngăch prăl gĭt blău ngăn ri bu hŏ lăp Đảng hôm. Nău nê bu mô dơi leng nuĭh n'hâm cử tri ma nău way ăp nuĭh dâk tâm rlong dja lah ăp nai ntĭm nti, ăp nai dak si dŭt n'hâm ngăn kan n'glĕ tâm 1 xã ma nkual bầu cử nê hôm geh 3-4 nkuâl, cư tri mô gĭt lĕ ơm, ma ăp nuĭh dâk tâm rlong mô tŏng geh âk nău blău mât bôk kan nău way ƀư rnâng kan dơm, dâk bah năp âk nuĭh, du rgum nchră ri mpet jâk ngăn, mô dơi ƀah rih si ƀŭt, jêng rup gui du hê nuĭh tâm rlong lah răk blău yơn lah di lah tâm ban kơt nuih n'hâm bah cử tri ri ƀư dơi lah nkô̆ nău mô hŏ leng dơi nuih n'hâm cử tri.

Tĭng wa Cao Thị Xuân, Groi kruanh Hội đồng dân tộc bah Quốc hội ri du nkô̆ nău êng đŏng jêng tât nău mô tŏng nuĭh ntơh măt lah nuĭh rnoi mpôl đê̆ râng tâm ăp nhih pah kan Quốc hội n'hanh Hội đồng nhân dân ăp gưl lah mô geh nău mât uănh bah du đêt n'gor, du đêt n'gâng kan ma păng gŭ ta rêng dăp rgum.

Lah mô geh cán bộ bah xã ri mbra mô geh cán bộ nkuâl, cán bộ nkuâl ri ân dăp rgum bu hao gưl groi kruanh jrô kan, kruanh jrô kan ri mơ geh giám đốc sở, mơ geh tỉnh ủy viên lôch nê mơ râng dơi ăp nhih pah kan têh lơn, nănh jao nău kan lơn.

Ndrĭ he mbra saơ kloh du nkô̆ nău lah ndơ lơh dĭng rnoh âk ăp nuĭh ntơh măt lah nuĭh rnoi mpôl đê̆ đêt lơn rđĭl đah rnoh ndơ̆ luh, du gâl tă bah nău gĭt blău, nău way gŭ rêh, nău jêr jŏt, ji đit prêng, mô tŏng nău geh gĭt blău n'hanh lơn đŏng lah nău dăp rgum bah gưl tâm dâng mô dơi uănh khlay đŏng. Ndrĭ jêng gay nkra dơi nkô̆ nău dja ri ân geh trong nkra n'hanh tor lor trong gĭt kloh na nê̆./.

Việt Phú/VOV4- Nuĭh rblang: Điểu Thân