VOV.M’nông: Ta rơh rƀŭn nchră hun hao văng sa nkuăl n’har bri yor n’gâng kan Công thương ƀư nthoi trực tuyến đah 25 n’gor nkuăl n’har bri mhe aơ, ngoai tâm 3 nkô̆ tơm geh tât nau hun hao văng sa tâm nkuăl n’har ê geh dơi tât nau ŭch, ê tĭng năn nau hun hao, nê lah ăp nau nkol tâm nau rgum, tă bah nau rgum tơm kơt nau rgum trong mpông n’har 2021-2030, rgum trong điện, trong hăn…tât nau rgum trong ƀư nơih-lah ntrong kan tăch rgâl.

Nau mbơh bah N’gâng kan Công thương ân saơ, nau hun hao văng sa tâm nkuăl n’har bri hŏ geh dơi âk nau ueh. Tâm nau dôl geh jêr, ăp n’gor nkuăl n’har bri hŏ nchrăp, nsôih rklaih, rlet, nkre đăp mpăn rnă njrăng neh dak tâm nkuăl n’har bri nkre njrăng rdâng srê Covid-19 ân nâp tam, mât n’hâm soan ân ƀon lan, nkre mât nau hun hao nkuăl n’har bri. 6 khay bôk năm 2021, ăp dĭng lĕ 25 n’gor n’har bri kŏ geh nau hun hao, tâm nê, 20/25 n’gor hun hao âk lơn rđil nau geh lam dak. Âk n’gor hun hao rlau 2 tŏ.

Yơn lah nau hun hao văng sa tâm nkuăl n’har bri hôm âk nau jêr. Nau văng sa, rêh jêng ăp nkuăl n’har bri hôm mâp âk nau jêr mbrơi hun hao rđil nau geh nsum bah ăp n’gor n’har bri lah êng ndrel lam dak lah nsum. Nau hun hao văng sa tâm nkuăl nsing tâm nau tuch tăm, geh jêng nkuăl rgum, ê kơt tĭng ăp nau geh dơi, joi kloh tu tơm, ndâk njêng nau tâm nthoi-nau leo tăch. Nau tuch tăm ê geh nau dơi tơm, n’hâm ntul rlong ê dăng. Tâm ăp nkô̆ nau, n’huch lơi nau nchŏng luh ăp nau nau rgum ntuh kơl hun hao ăp n’gor nkuăl n’har bri lah nsum ndrel nkuăl n’har bri lah êng hôm âk nau ê nâp, mô tŏng nau nkoch mbơh, mô tŏng nau nchrăp kan. Mô lah, nau kan rgum ê geh nsum ma nau ndâk nau nchrăp ƀư. Nê lah ê nkoch tât yor ê geh nau tâm rgop nsum ma nau hun hao bah nkuăl, ăp nau geh mpeh tuch tăm, tăch dŏng ndrel nau mơng bah ăp nkuăl ƀon lan bah ăp n’gor n’har bri ri ma nau hun hao văng sa, rêh jêng bah nkuăl ê prêh, leo tât nau kan tuch tăm, tăch rgâl bah ăp n’gor hôm mbrơi hun hao.

Wa Lê Hoàng Oanh-Kruanh N’gâng kan tăch rgâl bah Châu Á-Châu Phi mbơh, tĭng Luật ntrŭnh, rnôk aơ ăp n’gor nkuăl n’har bri dôl ma ƀư nau ndâk nau rgum bah n’gor lvang năm 2021-2030. Aơ lah nau rgum ngăn ăp nau kan, pă nkuăl hun hao bah nkuăl n’har bri. Rnôk ntuh kơl ê geh jêh ndrel ƀư ê geh jêh rgum ri n’gor dôl ma hôm mâp nau tơm prăk, rgum nau ntuh kơl, mô geh nau dơi tâm nau njêng nau săk geh ân ntuh kơl hun hao…Tĭng wa Lê Hoàng Oanh, bah rlau 200 nau mbơh bah ăp n’gor mpeh n’har bri njoăl tât, ndrel nau kơl an ntuh kơl hun hao nau kan gung trong ri nau ơm jêh nau rgum mpông n’har bri lvang năm 2021-2030 geh uănh khlay ngăn:

‘Mpeh trong mhe, n’hao nau nkra mpông n’har bri ri ân geh 33 nau đă đah ăp nkô̆ nau kơt: ơm ƀư jêh nau rgum bah mpông n’har bri Việt Nam-Lào, Việt Nam-Campuchia, Việt Nam-Trung Quốc lvang năm 2021-2030, đă bah ăp n’gor rnôk aơ ân ri mhe knŭng geh nau rgum tât năm 2020. Mpeh nau rgum hun hao điện lực geh 36 nau đă-đah ăp nkô̆ nau geh tât nau rgum điện, nau pă tơm prăk ân nhau kan điện ƀon lan, ntrŭt dăng nau ntuh kơl ăp trong pă điện tâm ăp nkuăl tĭng nau rgum, ân ƀư nau rgum hun hao điện ntơm năm 2016-2025 bah ăp n’gor kơt Lai Châu, ntop nau rgum bah Lào Cai ân nau kan thuỷ điện mô lah Quảng Nam…Ăp rmôt ƀư nau đă gay ân geh hun hao công nghiệp geh 14 nau đă đah ăp nkô̆ ngăn kơt lah nau rgum ntuh kơl công nghiệp, ndâk njêng nau bonh đă, rgum ntŭk kan ntuh kơl ƀư ăp nau kan công nghiệp, nkuăl công nghiệp…”.

Ngăn lah, đah n’gor Quảng Ninh, nkuăl geh du trong êng đah klơ kơh ndrel dak lêng ma Trung Quốc, geh nau dơi ntuh rlong mpeh nau kan tăch rgâl, pâl n’aih, nchuăn rdeng ndoh ndơ đah Trung Quốc ndrel ASEAN. Gay hun hao nau geh jêng, nau dơi geh nsum đah hun hao nâp nâp ăp nau kan công nghiệp geh nsum ma nau kan tăch rgâl, wa Bùi Văn Khắng-Groi Kruanh UBND n’gor Quảng Ninh, đă:

‘Ryơk đă ngăn ăp N’gâng kan công thương rgum ndrel kơl an ân ăp n’gor Quảng Ninh hun hao ăp nau kan công nghiệp tâm 3 nkuăl n’har bri-rnôk aơ nau rgum bah n’gor ê geh âk. Ngăn lah Móng Cái, tal bar đŏng lah Hải Hà, tal 3 lah Tịnh Biên ân geh kơl rgum ndrel ntop tay tâm nau rgum hun hao ăp nkuăl công nghiệp ta aơ gay ma pơ trong nơih lơn ân ăp ntŭk kan, ngăn lah nau kan nau ƀư kan tăch rgâl”.

Uănh năl nau rgum n’gor lah ntŭk gay ma pă, rgum ntuh kơl hun hao. Yơn lah, tĭng Luật ntrŭnh, mô ân geh nau rgum hun hao công nghiệp ndrel nau kan tăch rgâl, rgum ân nau hun hao nau kan công nghiệp ndrel tăch rgâl êng ma ăp nê ân geh rgum tâm nau kan bah n’gor nchrăp. Ndri ma, gay hun hao nkuăl văng sa n’har bri tâm rnôk aơ, Kruanh n’gâng kan Công thương Nguyễn Hồng Diên đă ăp n’gor ân geh ƀư kơp ndrel đă ăp nkô̆ mpeh nau ntuh kơl hun hao ăp nau kan tâm nkuăl n’har bri, nchrăp rgum nau công nghiệp ndrel tăch rgâl, rgum hun hao ân jêh ăp nkô̆ nau kan mpeh nau kan ntŭk ntuh ƀư kan ndrel tăch rgâl bah nkuăl gay geh nau rgum nsum ndrel ndal ƀư jêh nau rgum bah n’gor lvang năm 2021-2030, rƀŏng tât 2025, ƀư nau dơi ân ntrong pă nau ntuh kơl hun hao ndrel rƀŏng tât nau hun hao jŏ jong ân nkuăl n’har bri kŏ kơt lah ăp nau kan gung trong, công nghiệp, tăch rgâl, điện năng, ăp nkuăl bah ăp ntŭk…

‘Tal bôk năp ân geh rgum nau ndâk njêng ăp nau kan ndrel nau nchrăp hun hao nau kan công nghiệp, tuch tăm, rgum nau kan tăch rgâl bah nkuăl. Ndrel đah nau hun hao ăp nau kan ntŭk kan kơt mhe nkah ri ân geh ơm ƀư ân dơi nau rgum tâm nau kan bah n’gor, rgum bah ăp nkuăl geh nsum trong n’har bri. Ndrel nsing tâm ăp nau rgum bah neh dak ma N’gâng kan nchră nau geh jao nau kan aơ ri nơm ân ơm đă ăp nau kan ma Trung ương, Quốc hội ndrel Chính phủ gay geh nau dơi gay ma nchră nau rgum hun hao văng sa bah n’gor n’har bri, ngăn lah nau rgum hun hao ăp mpông n’har tâm lam dak, ngăn lah ntrong mpông mpeh dak neh kơh dak lêng”.

Nŭih dâk bôk ntŭk kan Công thương ngăn ngên lah rjăp tâm nau kan ndal ƀư nau hun hao nau rgum hun hao công nghiệp-tăch rgâl tâm nkuăl n’har bri, mpông trong…tâm ban đah nau geh jêng, nau dơi bah nkuăl ndrel tâm ban đah nau rgum, ntuh kơl hun hao bah dak băl./.

Nŭih rblang: H’Thi