VOV4.M'nông: Du mblâm jay nkah ndray bah Đại tướng Võ Nguyên Giáp ta thôn An Xá, xã Lộc Thủy nkuâl Lệ Thủy ntơm bah âk năm aơ lah ntŭk dŭt dêh bên đah  ƀon lan, tahen lam dak. Ta aơ way dơn ăp nău rŏng răm mƀak bah nuĭh ƀon lan ăp ntŭk lam dak tât weh khâl, nkah gĭt nuĭh Đại tướng jêng nău nkoch bah rnoi nuĭh.

Hăn lăp rlău mpông mpêr si hŏ blak mir nar sa, lăp tâm jay Đại tướng Võ Nguyên Giáp, ta năp măt lah mir tơm chè tàu nđĭr uĕh, dơi koh uĕh n'ging lha, rĭng tâm ban. Jay ơm gŭ bah meng dak me Kiến Giang mpeh thôn An Xá, xã Lộc Thủy, nkuâl Lệ Thủy, nkre đah mô gĭt dah âk nău nkah uĕh pâl rlưn hôm kon se kăl e bah Đại tướng. Ntơm nơh, tâm rơh tâm lơh tâm su, jay hŏ geh bu lơh su ŭnh sa lĕ rngôch. Năm 1977, tĭng nău ŭch bah rnăk Đại tướng, jay dơi rdâk ƀư tay ta ntŭk ơm kơt ntơm nơh. Jay ntưm ngói, ta nâm ntop tanh tay ja nching mih nching nar.

Tâm trôm jay pla ƀơch rgơm đah nduang me ta n'gul lah ntŭk n'gân bàn thờ u che yău ye ndrel đah păng rup bah Đại tướng Võ Nguyên Giáp. Bah pŭng jay geh du mblâm rương têh đâng ăp ntil ndơ dŏng hôm ƀa ƀă bah rnăk wâl. Mpeh bah dih mpông lah bar mblâm nsưng mpan gay wơt năch. Wăr jay hôm yông âk păng rup nkah ndray. Wa Võ Đại Hàm, nuĭh kuăl Đại tướng lah che tĭng rêng său tâm rnoi deh năm aơ hŏ bơi 80 năm deh lah nuĭh mât chăm Jay nkah ndray, mât chăm nhang n'huk ta bàn thờ Đại tướng an gĭt:

       “Jay ƀư ta neh jay bah ăp u che kăl e, ƀư ma si kơt aơ đŏng. Rnôk Prăng plơ̆ lơh tay Quảng Bình, way hăn ca nô bah Đồng Hới tĭng trong dak me Kiến Giang hao lơh n'hanh hŏ su jay dja. Lôch rnôk rklaih luh, nkuâl rdâk tay jay dja, ăp nuĭh ŭch rŏng Đại tướng rnôk sĭt ƀon tơm geh ntŭk ma gŭ".

        Nău mât uănh Jay nkah ndray tă bah rnăk wa Võ Đại Hàm n'hanh wa Trần Thị Vân, lah kon său tâm rnoi Võ dơn mât. Ƀon lan n'hanh tahen lam dak rnôk hăn tât weh khâl dơi wơt ăp dăp n'hanh djăt nău nkoch tay âk mpeh nău rêh hôm jê̆ bah Đại tướng. Bol hŏ âk tơ̆ hăn tât jay dja, yơn ăp tơ̆ chuat hăn rlău mpông, tahen ơm Phan Thế Vinh mô bah rngot nkah. Yor ăp tơ̆ Đại tướng sĭt khâl ƀon tơm, păng lah ngoăy tâm ăp nuĭh rhơn dơi mâp, nkoch bri ndrel Đại tướng. Tahen ơm Phan Thế Vinh, ta xã Lộc Thủy, nkuâl Lệ Thủy nkoch:

     "Tâm ban geh du ntil ndơ nê nơh ntrŭt ntrôl he lah djăt ma ăp năm tât nar roh bah wa Giáp mô lah tât nar nkah ndray nar deh wa Giáp mô lah ăp nar lễ gâp ŭch sĭt ta aơ da dê n'hanh nkah mpeh wa. Kơt lah wa Giáp dôl hôm rêh n'hanh plơ̆ sĭt ta jay dja".

        Nău pâl rlưn hôm kon se bah Đại tướng nkre đah dak me ƀon tơm, n'hong dak me Kiến Giang rngân uĕh. Wa Ngô Thị Bảy, ta thôn An Xá, xã Lộc Thủy, nkuâl Lệ Thủy nkoch, ăp tơ̆ Đại tướng sĭt khâl jay, kônh wa ƀon lan tât wơt dŭt âk. Măng, n'gâng kan ta ntŭk, kônh wa ƀon lan ƀư njroh mprơ ta jâng gung bah năp Jay nkah ndray dĭl. Wa Bảy ndrel rmôt njroh mprơ nsum mpôl tâm xã Lộc Thủy njroh mprơ ăp nău hò khoan ma bâr nuĭh ƀon lan ngăn. Wa Bảy nkah tay, rnôk nê, Đại tướng gŭ bah meng mpông jay, njôm wăr kiău ma lah rnăk wâl n'hanh âk mpưm kônh wa, tap ti ăp nău njroh mprơ hò khoan, khuh n'gôr rnăk wâl, nău tâm rŏng ƀon lan răm mƀak:

       “Lor bôk năp Đại tướng, rnôk nê nkre rhơn, nkre râm rnôk wa hăn nhŭp ti. Gâp rnôk nê hôm ndăm, lah: “ơ mon lah uĕh wa", nhŭp ti wa ma gâp rhơn rngot lah "Ti wa jôn uĕh ngăn, ma ti gâp ri dăng kruanh" lôch nê saơ wa gơm. Muh măt bah wa kơt mô di lah du hê nuĭh kruanh mât bôk tahen đŏng ôh ma tâm ban kơt du hê bôk bơ̆, bôk che bah ƀon tơm he nơm, dêh bên, tâm rŏng n'hanh dŭt dêh đah ƀon lan".

        Jay ƀơch rgơm bah meng dak me Kiến Giang nkre đah mô gĭt dah âk nău nkah bah hôm kon se jê̆ an tât rnôk Đại tướng săk ranh suan djôr. Aƀaơ, Jay nkah ndray bah Đại tướng Võ Nguyên Giáp jêng ntŭk dêh bên đah âk nuĭh ƀon lan ta ăp ntŭk lam dak. Ndrôm si ƀŭt nchih nkah an ta nklang nsưng bah jay dja hôm têl jru ăp mbor nchih âk nău chŭn mbah, nău uănh khlay bah ƀon lan, tahen lam dak n'hanh băl mpôl dak bah dih khâl Jay nkah ndray Đại tướng Võ Nguyên Giáp./.

Nuĭh rblang: Điểu Thân