VOV4.M'nông: Ta Dak Lak nău kan bah ăp câu lạc bộ mpeh bu ur bu klô, tâm ban bu ur bu klô hŏ rgop rgâl nău gĭt êng n'hanh nău kan bah âk nuĭh mpeh tâm ban bu ur bu klô ta n'gor. Ngoăy tâm ăp trong leo ƀư nsĭt tay nău dơi ngăn ngăn nê lah "Câu lạc bộ bu klô dâk leo lor tâm njrăng n'gang tâm lah tâm janh rnăk wâl" ta xã Ea Kao, nkual ƀon têh Buôn Ma Thuột, n'gor Dak Lak.

Kơt âk bu klô tâm ƀon đŏng, nô Y Kô Bkrông ta buôn Ea Bông, xã Ea Kao, nkual ƀon têh Buôn Ma Thuột, n'gor Dak Lak lôch sĭt kan kêng măng way gŭ rgum ngêt sa, rnôk hŏ geh dak ndrui lăp tâm săk sĭt jay way jreh nuih n'hâm ur  kon. Nău rêh tâm rnăk wâl jêng lhăt ăl. Ur kon nô way mô saơ đăp mpăn tâm  nuih n'hâm. Tăng nău lư, nuĭh tâm câu lạc bộ “Bu klô dâk leo lor njrăng n'gang tâm lah tâm janh rnăk wâl xã Ea Kao" hŏ tât rgŏ jă, bonh đă. Bôk năp mô dơh gay ma rgâl nuĭh n'hâm, yơn tât âk tơ̆ tĭng trong mih njâm mbĕ jŏ, ntơm bah rnôk nuĭh ân bonh đă tât aƀaơ Y Kô hŏ jêng nuĭh nsrôih uĕh bah câu lạc bộ. Nô Y Kô an gĭt:  

“Ntơm nơh mô hŏ râng câu lạc bộ gâp way ngêt ndrănh sĭt jay tâm lah tâm janh đah ur. Aƀaơ râng câu lạc bộ gâp đêt hăn ngêt ndrănh lơn sĭt jay mô hôm tâm lah tâm janh đah ur kon ƀư roh tâm rnglăp tâm rnăk wâl. Aƀaơ râng câu lạc bộ njrăng n'gang tâm lah tâm janh rnăk wâl gâp gĭt dơi nău ntĭm nti ur, kon đah gâp tâm kơl nsum tâm rnăk wâl đŏng, ƀư lôch jêh uĕh lơn rđĭl đah ntơm nơh".

Hôm đah yuh H Bat Niê, Kruanh Buôn Bông, xã Ea Kao, nkual ƀon têh Buôn Ma Thuột, n'gor Dak Lak nkoch: Lah kruanh ƀon jêng mông nar yuh rong an pah kan nsum an ƀon lan âk lơn nău kan tâm rnăk wâl nơm jêng sai yuh geh rnôk mô di nuih n'hâm; ur sai way tâm lah tâm janh tă bah sai mô hŏ dơi wât nău kan bah ur. Yơn ntơm bah rnôk râng câu lạc bộ "Bu klô dâk leo lor njrăng n'gang tâm lah tâm janh rnăk wâl" hŏ kơl sai yuh geh ăp nău gĭt êng di mpeh nău kan bah ur n'hanh mpeh tâm ban bu ur bu klô. Săk păng nơm hŏ gĭt nkân nkân nuih n'hâm lơn, geh ăp nău kan uănh khlay n'hanh tâm ban lơn rnôk dâl nău đah bu ur, lơn lah đah ur kon he nơm. Tâm rnăk, nô hŏ lor nchrăp tâm kơl kan đah ur kon. Rhơn lơn lah sai yuh mbra nta trong dơh kơl yuh tâm pah kan ngih dak đŏng:

“Ntơm bah rnôk râng gâp saơ dŭt geh nkô̆ khlay. Nău kan tâm rnăk wâl, sai gâp geh kơl ƀư đŏng. Ntơm bah ăp nău kan dŭt jê̆ kơt nău gâp hăn kan ngih dak dơm mô geh mông nar gŭ ta jay sai gâp kơl an gâp nău kan tâm rnăk wâl, ntĭm nti oh kon. Nău n'gon trău jŏ jŏ sai gâp ƀư đŏng. Tâm rơh njrăng n'gang Covid mhe aơ nơh sai gâp ndrel râng n'hanh gâp đŏng. Sĭt tât jay mông nar dơh ru bar hê ur sai pâl rlưn n'hanh kon n'hanh ăp nău kan tâm jay ri tâm kơl ƀư nsum".

Wa Phạm Văn Sơn, chủ nhiệm Câu lạc bộ “Bu klô tâm njrăng n'gang tâm lah tâm janh rnăk wâl" xã Ea Kao, nkual ƀon têh Buôn Ma Thuột, n'gor Dak Lak an gĭt: Câu lạc bộ dơi njêng nar 28/6/2019, nău njêng câu lạc bộ hŏ njêng luh ăp nău rgum nchră ta ƀon lan, kơl ăp nuĭh kan câu lạc bộ tâm nchră ăp nkô̆ nău geh tât tâm ban bu ur bu klô n'hanh tâm lah tâm janh đah bu ur ma bu klô ân tâm rdâng tâm nău rêh; n'hao nău gĭt êng n'hanh nău blău an bu klô tâm nău tâm tâm boh kloh uĕh n'hanh nkra bah tâm lah tâm janh, n'hao gĭt blău tâm săk n'hanh mpơl nuĭh bu klô uĕh.  Ăp nuĭh lăp kan nsum tâm câu lạc bộ lah "nuĭh nkra bah nău tâm rkeh", "nuĭh kan nkoch trêng" nsrôih uĕh gay rgâl nău mĭn n'hanh nău kan, rƀŏng tât bah tâm lah tâm janh đah bu ur n'hanh kon se bu ur.

“Kơp ntơm bah rnôk câu lạc bộ dơi njêng, mpôl hên nkoch trêng tâm câu lạc bộ ăp găr ntil gay rgŏ jă trong leo kan ta ăp ntŭk thôn ƀon njrăng n'gang tâm lah tâm janh tâm lĕ rngôch ăp tơ̆ rgum bah hội bu ur mpôl hên nkre đah nkô̆ nkoch trêng mpeh njrăng n'gang bah tâm lah tâm janh rnăk wâl ma rup gui, ma lha si ƀŭt, ma ndơ nkoch trêng lĭr ta xã n'hanh 14 đơn vị thôn ƀon. Ta lĕ rngôch ăp thôn ƀon mpôl hên way tâm ôp gĭt mbro mbrô điện thoại bah Hội bu ur n'hanh mbrô bah Chủ nhiệm câu lạc bộ gay rnôk geh ntil nău ăp oh yuh mbra ôp mpôl hên tât kơl"

Trong ntĭt leo ƀư câu lạc bộ “ Bu klô dâk leo lor tâm njrăng n'gang tâm lah tâm janh rnăk wâl" bah Hội bu ur xã Ea Kao, nkual ƀon têh Buôn Ma Thuột, n'gor Dak Lak mô dơn mbrơi rgâl nău gĭt êng mpeh bu ur, ma bu klô jêng ntŭk nsing nâp an bu ur n'hanh kon se đŏng. Lôch nê rdâk njêng du nău rêh geh nău tâm ban bah tâm lah tâm janh rnăk wâl, rgop jêng geh nău đăp mpăn tâm nău rêh, ntop kơl bu ur nsan hao tât rgâl mhe.

Câu lạc bộ “Bu klô leo lor tâm nau njrăng rdâng tâm lơh tâm rnăk vâl” xã Ea Kao, nkuăl ƀon teh Buôn Ma Thuột, n’gor Dak Lak hŏ rgop nau kơl an n’huch nau tâm lơh tâm rnăk vâl, bun ueh nau tâm ŭch rŏng bau ur sai, mbơ̆ kon, tă bah nê n’hao nau đăp mpăn ndrel hun hao ueh bah ăp rnăk. Gay gĭt kloh lơn mpeh nau nkoch trêng, bonh đă, nsôih lơh jăng lơi nau tâm lơh tâm rnăk vâl, bonh đă nau geh tâm ban bu ur bu klô tâm nkuăl, Phóng viên nkô̆ nau nkoch geh ôp nau wa Trịnh Thị Tuyết, Kruanh rmôt kan bu ur xã Ea Kao, nkuăl ƀon têh Buôn Ma Thuột, n’gor Dak Lak.

          Ơi wa, đah nau geh bah nkuăl nơm âk nŭih rnoi mpôl đê̆ tâm ntŭk rêh, tĭng nau vay ri bu ur ƀư tơm tâm rnăk vâl, ndri ma nau tâm lơh tâm rnăk vâl ri moh nau mpơl geh êh?

          Trịnh Thị Tuyết: Tâm nŭih rnoi mpôl đê̆ tâm ntŭk, khân păng tĭng mpeh ur ri ma ăp nau dơi geh nau ntrŭnh leo kan lah bu ur ƀư. Yơn lah, nau ngăn ri du gưl mô geh kơt nê, ăp nŭih bu klô vay rgum ngêt ndrănh, jêh ăp nar hăn pah kan sĭt ri vay hăn ngêt ndrănh, jêh ri tâm jin ma ur kon. Ntoh tă bah ăp nau nê phung hên bonh đă âk rnăk vâl lah nŭih rnoi mpôl đê̆ lăp rgum rƀŭn nsum bah rmôt aơ. Yor đah xã Ea Kao geh 7 ƀon lah nŭih rnoi mpôl đê̆. Phung hên ŭch nê lah ăp nŭih blau gay ma kơl nkoch trêng ân ueh mpeh naukan tâm ban bu ur bu klô tâm nŭih rnoi mpôl đê̆.

          Jêh 2 năm hăn lăp nau kan ri rmôt kan “Bu klô leo lor tâm nau njrăng rdâng nau tâm lơh tâm rnăk vâl: bah xã hŏ njêng geh nau rgâl mhâm tâm nau gĭt ndrel nau kan bah bu klô tâm nkuăl hơi wa.

          Trịnh Thị Tuyết: Lah nơm ƀư ân rjăp ri ê geh ôh, ndrei ma aơ lah rnôk ƀư nau kan ân geh tât jŏ jong, yơn gâp ndơn saơ nau rgâl ngăn tâm nau gĭt bah nŭih bu klô geh ngăn. Geh ăp nau rgâl mhe lah khân păng hŏ gĭt kơl an ur âk lơn, kơt lah nau tâm lơh tâm rnăk vâl n’huch âk ndrel ngăn đŏng lah ur râng ƀư ăp nau kan kơl an tâm nau rêh ri kơt lah sai mô geh nau mô ân ôh, ri aơ lah nau rgâl ueh ngăn. Tal bar đŏng lah, nau kan bah rnăk vâl ri sai kŏ kơl an ân ur đŏng. Kơt lah nau kan lŏ mir ri mô geh nau lah, yơn rnốk sĭt tâm ngih ri kơl an nau kan đah ur, ăp nŭih bu klô ƀư lĕ nau kan nê lah ngoai tâm âk nau kan ueh, ngăn lah nau tâm lơh tâm rnăk vâl hŏ n’huch.

          Kơt ri, mra dơi lah rnăk bâl mô geh tâm lơh mra lah nau dơi ndâk leo nau tâm ban bu ur bu klô, ndri tâm rơh tât rmôt kan bu ur xã Ea Kao mhâm lŏ pơk hvi nau kan aơ gay ma rgop nau ndâk rnăk vâl mô geh tâm lơh, njêng nau tâm ban bu ur bu klô ơi wa?

          Trịnh Thị Tuyết: Đah bu ur phung hên ri ngăn lah tâm rơh dăch ngăn ri phung hên mra lŏ pơk hvi lơn tay nau ƀư nau kan aơ. Tal bôk năp păng n’huch âk nau tâm lơh tâm rnăk vâl, tal bar lah nau rklaih ân nŭih bu ur bah ăp nau mô dơi tâm rnăk vâlm bah nŭih sai kơt bah năp nơh, geh dah rŏng râng nau kan kơl an tâm nau rêh. Jêh ri bu klô kŏ kơl an gay ma ur kon nơm râng nau kan văn hoá, thể thao, nau kan kơl an tâm nau rêh, tâm pă nau kan kơl an ma rnăk vâl, nê lah nau ma bah rmôt kan hên dơi geh ƀư. Tâm rơh tât ri phung hên mra ƀư âk lơn nau kan aơ gay ma kuăl jă âk lơn nŭih râng nau kan kơt aơ ri ngăn lah nau tâm lơh tâm rnăk vâl păng mra n’huch ndrel ngăn lah nau kan mô hôm tâm ban tâm rnăk vâl mra mô hôm geh ôh.

           Ơ, lah ueh ueh mpeh ăp nau mbơh nkoch mhe aơ.

Nuĭh rblang: Điểu Thân n'hanh H'Thi