Nău nchih bôk năp: Nghị quyết 30: Joi bah nău ngăn công ty nông lâm nghiệp ta Tây Nguyên pơk uănh tĭng trong link dja: 

https://vov4.vov.gov.vn/Mnong/chuyen-muc/nghi-quyet-30-joi-bah-nau-ngan-cong-ty-nong-lam-nghiep-ta-tay-nguyen-c168-409901.aspx

VOV4.M'Nông: Công ty cà phê Đức Lập (nkuâl Dak Mil, n'gor Dak Nông) dơi Thủ tướng Chính phủ uănh an trong nchrăp dăp rgum mhe, tĭng trong rgâl jêng công ty bah dih, ngih dak mô hôm mât rnoh prăk rgop kan tâm pă ƀư ntơm bah năm 2015. Ntơm bah nê tât aƀaơ, công ty dja mô dơi rgâl jêng công ty bah dih ngih dak yor rnon mô dơi trok aƀaơ hŏ hao rlău 174 rmen prăk. Wa Phạm Tiến Hùng, Giám đốc Công ty an gĭt, rnoh rnon dja jêng geh tâm lvang năm 1999-2001, công ty manh prăk bah du đêt ngân hàng gay rvăt n'hanh tăch n'gluh cà phê:

        “Êng rnoh rnon ngân hàng n'hanh rnon ăp doanh nghiệp ri rnoh deh prăk kon ntơm bah 6- 7 rmen prăk/năm. Tâm rnôk nê, nău kan njêng luh geh nklăp 2 rmen prăk, mô tŏng gay trok deh prăk kon. Ăp năm hôm hŭt 5- 6 rmen prăk, yor  kơt nê̆ jêng dŭt jêr jŏt. Bơi 20 năm aơ mô dơi tât đah du tơm prăk manh đêt.”

        Dŭt njrăng ăp rnoh rnon manh bah Công ty cà phê Đức Lập ta ăp ngân hàng dơi UBND n'gor Dak Nông n'glôch jêh lah an manh mô di nău way. Gay tĭng ƀư rgâl jêng công ty bah dih ngih dak, năm 2016, n'gor Dak Nông hŏ geh si ƀŭt njuăl tât ăp  ngân hàng gay đă jut bah lĕ rngôch ăp rnoh deh prăk kon ntoh tay n'hanh du gâl rnon tơm an Công ty dja. Ndrĭ yơn lôch ƀư du đêt si ƀŭt tăch rvăt, tât kêng dŭt năm 2019, lĕ rngôch rnoh rnon ta ăp ngân hàng hŏ dơi tăch an du đêt doanh nghiệp, êng nuĭh, nău tâm dăn jut lĕ rnon mô geh nău dơi.

        Ndrel đah tuch tăm, nău dăp rgum, rgâl jêng công ty bah dih ngih dak tâm trong kan si gle ta Tây Nguyên dôl geh dŭt mêl đŏng. Công ty TNHH MTV Nam Nung (nkuâl Krông Nô, n'gor Dak Nông) lah du nău ntĭt rnôk hŏ 6 năm mô hŏ dơi rgâl jêng công ty bah dih ngih dak, yor rnoh rnon hŏ hao rlău 170 rmen prăk. Tâm nê, êng rnoh rnon prăk khay an nuĭh kan hŏ hao tât 20 rmen prăk, rnon bảo hiểm 24 rmen prăk. Rnoh hôm ƀa ƀă lah rnon ăp băl tâm boh, ăp nhih pah kan an manh prăk. Wa Hà Hữu Thanh, Groi giám đốc mât uănh công ty an gĭt, mô dơn phăn rnon, công ty hôm geh tâm pit neh đah nuĭh ƀon lan đŏng. Tâm rnoh 1.100ha cao su bah công ty, aƀaơ geh tât 800ha dôl tâm pit đah ƀon lan. Rlău 6.500ha bri jao an công ty aƀaơ nchih rgum dơn hôm 340ha bri dơm, hôm ƀa ƀă lah hŏ geh rŭn in.

      “Mhâm dơi ma blău rgâl jêng rnôk ma lĕ rngôch neh ntu, drăp ndơ mô hŏ dơi nkra đah nuĭh ƀon lan. Ma aƀaơ, nuĭh ƀon lan tâm pit tâm trôm neh  geh drăp ndơ. Mô dơi tuch tăm, nuĭh ƀon lan rŭn in, muĭh kăl bu tăch dĭl, geh du đêt nuĭh khân păng tăch tay ta neh geh rŭn in nê. Mpeh công ty dơn mbơh đah n'gor dơm, n'glĕ nău dơi bah n'gor."

        Tâm ban kơt ta n'gor Dak Nông nê đŏng, nô nău phăn rnon bah ăp công ty nông lâm nghiệp dŭt âk jêr ta ăp n'gor Tây Nguyên. Wa Lê Danh Thắng, Groi giám đốc Sở Tài chính n'gor Dak Lak an gĭt, âk doanh nghiệp, ntĭt kơt Công ty Cà phê Buôn Ma Thuột, Công ty cà phê Đray Hlinh, Công ty Cà phê ca cao Krông Ana nău kan  mô nsĭt geh, phăn rnon jŏ jong. Tĭng Luật Doanh nghiệp ri ăp công ty roh nău tâm ban geh kơt nê ân nchrai lĕ drăp ndơ. Yơn, tĭng Nghị quyết 30 bah Bộ Chính trị khoá XI n'hanh Nghị định 118 năm 2014 bah Chính phủ ri mô geh trong ƀư nchrai lĕ drăp ndơ an ăp công ty nông lâm nghiệp ngih dak. Ăp công ty dơn ƀư ntlơi lĕ dơm, yơn nău ntlơi du lĕ bar pe năm aơ hôm mô hŏ dơi ƀư lôch ơm yor ăp rnon mô dơi trok n'hanh tâm pit neh ntu, tâm rkeh tâm ăp si ƀŭt tâm ton tâm rgop kan, jao dơn mât njrăng bri. Ăp nău kŏ kol dja ân geh lăp kan bah ăp n'gâng kan:

      “Rnôk tĭng ƀư geh ăp nău tât uănh lhơ, mô gĭt năl lor, mô hŏ dơi tât rnoh kan kơt bôk năp. Tâm let năp tay, mpôl hên mbra kan nsum đah ăp n'gâng kan, ôp uănh tay ăp quy định bah pháp luật, tâm ban kơt nău geh ngăn ngăn. Nsing kalơ nê, nsŏng kơl an n'gor kơt dăn đă ăp n'gâng kan trung ương ngăch droh rklaih jêr jŏt, kŏ kol an ăp đơn vị.”

        Lam nkual Tây Nguyên geh bơi 100 công ty nông lâm nghiệp ngih dak, mât n'hanh dŏng nklăp 1,2 rkeh ha neh. Ntơm bah ăp năm 1991, nău dăp rgum, rgâl mhe tay ta ăp doanh nghiệp hŏ dơi ƀư tĭng trong nchrăp bah Đảng, Ngih dak n'hanh dơi ntrôl dăng lơn lôch Nghị quyết 30 năm 2014 bah Bộ Chính trị khoá XI. Yơn lah, lôch âk năm , nău dăp rgum rgâl mhe mô hŏ geh nău dơi âk.

        Nkô̆ tơm bah nău dja lah tă bah pah kan mât bôk kan rbăn lhơ, mô geh hăn ôp uănh, groi nđôi jêng tât nău ƀư njêng, tăch rgâl mô nsĭt geh, nô nău roh neh, roh bri, tăch neh, rgâl neh, rŭn in neh mô geh nău way krit hô. Âk nău khoah, mpăng đêt, tih leh geh mbro bah năm aơ tât năm êng, mô hŏ dơi nkra. Nău dja jêng tât ăp doanh nghiệp dăp rgum, rgâl mhe, rgâl jêng công ty bah dih ngih dak mâp dŭt mêl, tơm ndơ bah hang rhiăng ha neh geh mpŭng lir. Nkô̆ nău dja dôl ân geh nău droh rklaih bah trung ương tât tâm n'gor./.

Nuĭh rblang: Điểu Thân