VOV4.M’nông: Năm 2021, Gia Lai geh nau hun hao văng sa 9,7%, prêh ngăn tâm nkuăl Tây Nguyên, nau geh sŏk spay kŏ hao âk, geh bơi tât 7.600 rmen. Năm 2022, n’gor nsôih mât rnoh hun hao rlau 8,6%, đăp mpăn ăp nkô̆ nau rêh jêng ndrel nau kan njrăng rdâng srê Covid-19. Nsôih geh nau hun hao văng sa 8,65% nau geh du hê bôk nŭih rlau 60,44 rkeh prăk, nau geh sŏk prăk soau rlet rlau 5.800 rmen, nê lah du đê̆ nkô̆ nau tơm ma n’gor Gia Lai rƀŏng tât tâm năm 2022. Tĭng nê, n’gor lŏ hun hao tuch tăm prêh mhe, tâm rgop tĭng rnoh mhe, hun hao ŭnh nar ndâk ơm. Nkre ma, rgum doh rklaih ăp nau jêr, nau nkol tâm nau kan ntuh kơl, n’hao rnoh mrô ntul rlong (PCI), rgâl mhe hành chính. Ntrŭt dăng nau ndâk ntrong ngih vâl gung trong ân tâm ban, ăp nau kan tơm, hun hao đô thị tĭng nau rgum ndrle nau nchrăp, rƀŏng tât nau kan ndrih, blau ndrel nâp nâl. N’gor Gia Lai kŏ kơp uănh, njrăng, rdâng srê Covid-19 lah nau kan khlay, ndak ndrel ƀa ƀơ, mro, nsum ma nau tâm rgop ăp nau kan hun hao văng sa, rêh jêng bah năm 2022 ndrel ăp năm ba kơi./.

Nŭih rblang: H’Thi