VOV4.M’nông: Tâm nkuăl Tây Nguyên, ăp n’gor ntrŭnh ƀư Khay Công nhân đah ka nau kan ngăn. Wa Triệu Lệ Nhung-Kruanh Liên đoàn Lao động n’gor Gia Lai mbơh: Gay ntrŭnh ƀư ân geh săk tam bah BÔk nau kan Khay công nhân năm 2021, êp nau lŏ ƀư ăp nau kan dôl ma geh ƀư geh săk tam, geh âk mpưm đoàn viên, nŭih pah kan ndơn, ăp kơn Công đoàn bah n’gor hôm rgum ƀư 4 nau kan tơm geh: Bôk nau kan “75 rbăn nau mĭn mhe, rlet nau jêrr, hun hao”, “Bôk nau kan djăt-gĭt rbăng-tâm kơl” đah đoàn viên ndrel nŭih pah kan, ƀư ăp nau kan “lah ueh nŭih pah kan” ndrel nkoch mbơh, rnê ăp nŭih pah kan, đoàn viên tă bah ăp kơn Công đoàn tâm n’gor. Rnôk aơ, Liên đoàn lao động n’gor Gia Lai hŏ rgŏ jă khay pah kan đăp mpăn kloh nau pah kan năm 2021 geh ntơm lơ 1-31/5 đah nkô̆ “N’hao nau nchră, nkân njrăng ăp nau tât khuch mpeh nau đăp mpăn kloh pah kan ndrel nau râng bah nau đăp mpăn kloh ueh”. Ta nar rgŏ jă, Liên đoàn lao động n’gor sŏk dŏng 530 rkeh tă bah tơm prăk kơl an gay kơl ndâk mhe ndrel nkra 17 “Ngih công đoàn” ân đoàn viên, nŭih pah kan mô geh ngih gŭ.

Lôch rơh rgŏ jă bah Liên đoàn Lao động n'gor Gia Lai, Công đoàn Công ty TNHH một thành viên Cao su Chư Păh hŏ ƀư lễ rgŏ jă Khay Công nhân n'hanh Khay dâk kan mpeh mât đăp mpăn, mpôih kuaih kloh uĕh ntŭk kan năm 2021. Tâm khay Công nhân n'hanh Khay dâk kan mpeh mât đăp mpăn, mpôih kuaih kloh uĕh ntŭk kan năm aơ, Công đoàn Công ty mbra geh ăp nău kan kơt: ƀư nkoch trêng jru hvi tât lĕ rngôch đoàn viên, nuĭh kan mpeh nkô̆ hôr khlay bah Nar pah kan lam ntŭr neh; nkoch trêng mpeh trong nchrăp rdâk njêng rơh kơn công nhân Việt Nam tĭng nuih n'hâm Nghị quyết Đại hội XIII bah Đảng; ƀư ăp rơh tâm mâp đah nuĭh kan tĭng nkô̆ "Djăt- gĭt wât- tâm pă nkoch”; n'hao dăng uănh năl, mât njrăng geh ma nău tât rmoh rmanh nău kan n'hanh râng bah nuĭh kan mât kloh uĕh đăp mpăn ntŭk pah kan. Bah meng nê, Công đoàn Công ty mbra ƀư âk rơh hăn khâl, pă nklâm ndơ an công nhân geh nău rêh jêr jŏt, geh nău tât rmanh rnôk pah kan; rdâk njêng n'hanh jao an jay “N'hŭt răm Công đoàn” an rnăk công nhân hôm jêr jŏt mpeh jay gŭ./.

Nuĭh rblang: Điểu Thân n'hanh H'Thi