VOV4.Mnông-Kêng măng nar 28/12, groi Thủ tướng chính phủ Lê Văn Thành lĕ uănh nđôi nău ngăn n’hanh pah kan đah Lâm Đồng ndrel đah ăp n’gâng kan, ntŭk kan geh tât mpeh nău nchrăp ntuh ƀư nău nchrăp kan ƀư trong têh ntŭk Tân Phú ta Đồng Nai-Bảo Lộc ta Lâm Đồng n’hanh Bảo Lộc- Liên Khương. Nău nchrăp ƀư trong têh Tân Phú- Bảo Lộc geh nău jong 66km, tâm nĕ 11km ta n’gor Đồng Nai n’hanh 55km ta Lâm Đồng. Aơ lah ngoăy tâm 3 nău kan bâh nău nchrăp ƀư trong têh Dầu Giây-Liên Khương. Nău nchrăp kan geh pă ƀư ntuh kan 2 rơh, nchrăp ƀư lôch n’hanh an dŏng ta năm 2025. Ntoh ngơi ta rơh pah kan, groi Thủ tướng chính phủ Lê Văn Thành rnê âk nău n’gor Lâm Đồng lĕ geh rgum prăk bâh ntŭk rêh jêng bâh ăp doanh nghiệp n’hanh du đê̆ rnoh prăk ta ntŭk, mô geh dŏng prăk trung ương rnôk geh ƀư ntuh kơl rlău 140km trong hăn têh. Nkre lah, đă ăp n’gâng kan, ntŭk kan geh tât rgum kơl an ăp n’gor doh rklaih nău jêr, ƀư lôch ăp nău way kan tĭng nău ntrŭnh gay ma ơm ƀư tĭng, ndơ̆ ăp ntŭk trong hăn têh lăp pah kan tĭng nău nchrăp.

Nuĭh rblang: Thị Đoắt