VOV4.M'nông: Ôi 27/12, Bộ Giao thông vận tải kan nsum đah UBND n'gor Lai Châu ƀư Lễ ntơm pơk rdâk njêng trong nchrăp buăt nthoi ntung trong ăp n'gor yôk yang mpeh Bắc. Trong nchrăp ƀư geh lĕ rngôch tơm prăk ntuh kơl rlău 5.300 rmen prăk, kơl rhuăt glêh trong hăn bah nklang ăp n'gor Lai Châu, Lào Cai, Yên Bái n'hanh ăp n'gor êng ƀa ƀă geh tât sĭt thủ đô Hà Nội.

Lah ta rơh lễ, Groi Thủ tướng Rnâng kan Phạm Bình Minh lah rjăp nău khlay bah trong nchrăp kan buăt nthoi ntung trong, ntrŭt ntrôl hun hao wăng sa- rêh jêng kon nuĭh an ăp n'gor geh trong nchrăp n'hanh lĕ ma nkual Tây Bắc. Gay trong nchrăp kan dơi ƀư di rnoh ngăch, Groi Thủ tướng Rnâng kan Chính phủ dăn đă nuĭh mât bôk kan Bộ Giao Thông - Vận tải, Ban Mât uănh trong nchrăp 2 groi dăch, mât bôk kan lĕ n'hâm suan, nâp uĕh, di rnoh ngăch, tơm prăk ntuh kơl tâm rnôk tĭng ƀư trong nchrăp kan, đăp mpăn lhăt, di pháp luật./.

Nuĭh rblang: Điểu Thân