VOV4.M’nông: Jêh 3 nar pah kan rjăp, ƀư nau nâp, lơ 10/11, HĐND n’gor Dak Lak gưl X, năm kan 2021-2026 hŏ ƀư jêh nau kan pah kan bah rơh rƀŭn tal III đah âk nkô̆ nau khlay ndrel lôch rơh rƀŭn. Tâm nau tâm nchră, uănh ăp ding, nâp nâl mbơh nau, nau mbơh uănh, rơh rƀŭn tâm ban nau prêh nchră 30 nau ntrŭnh. Tâm nê geh âk nkô̆ nau khlay, kơl an ân hun hao văng sa, văn hoá, rêh jêng, đăp mpăn neh dak, rnă njrăng bah n’gor kơt:

Nau ntrŭnh mpeh nkô̆ nau hun hao văng sa rêh jêng, đăp mpăn rnă njrăng neh dak năm 2022, nau nchrăp ndâk ndrel hun hao nkuăl ƀon têh Buôn Ma Thuột tât năm 2030, rƀŏng tât năm 2045, kơl an hun hao văng sa nsum bah n’gor Dak Lak năm 2021-2025. Ntoh nau ta nar rƀŭn, Wa Y Vinh Tơr, Uỷ viên dự khuyết Trung ương Đảng, Kruanh HĐND n’gor, Kruanh rmôt kan ntoh măt Quốc hội n’gor Dak Lak lah rjăp, ăp nau ntrŭnh geh nchră luh tâm nar rƀŭn geh nau khlay ngăn đah nau ƀư dơi nau kan hun hao văng sa rêh jêng bah n’gor năm 2022 ndrel ăp năm ba kơi./.

Nŭih rblang: H’Thi