VOV4.M’nông: Lŏ bôk nau rƀŭn tal 3, HĐND n’gor Dak Lak gưl X, lơ 9/12, ăp ntoh măt uănh tâm nchră ăp nau mbơh geh tât nau kan hun hao văng sa rêh jêng bah n’gor năm 2022 ndrel lvang năm 2020-2025. Ăp nau kan geh tât nau rgum ntuh kơl, pă kan pah ân nŭih pah kan geh nau khuch yor srê Covid-19 hŏ geh âk ntoh măt uănh khlay. Năm 2021, nau hun hao văng sa bah n’gor Dak Lak geh 5,1%, nchrăp năm 2022 nsôih ân geh 7,27%, tĭng ăp ntoh măt, gay dơi geh nkô̆ nau aơ tâm rnôk srê nuh ri UBND n’gor hŏ rgum ngăn nau doh rklaih ăp ntŭk nkol tâm ntuh kơl.

Ngăn lah nkol mpeh nau nchrăp dŏng neh ndrel nau kan trok tâm gay ntrơn ntŭk ƀư nau kan. Ndrel ma nau uănh khlay nau rgum ntuh kơl, nau kan pă kan pah ân nŭih ê geh kan kŏ geh ăp ntoh măt ndơ̆ luh. Tĭng ăp nau mbơh bah Sở Lao động-Thương binh-Xã hội, tâm rơh srê Covid-19 ntoh tal 4, geh bơi tât 140 rbăn nŭih tă bah n’gor mpeh ba dâng sĭt. Tâm nê geh bơi 24% nŭih ŭch gŭ tay tâm nkuăl ndâk nau kan ndrel ŭch geh manh prăk ntơm 20-80 rkeh prăk gay ma hun hao văng sa. Ndri ma, ntoh măt đă ân geh nau kan, nau kơl an tơm prăk manh gay ma pă kan pah ân nŭih gŭ kan tâm n’gor./.

Nŭih rblang: H’Thi