VOV4.Mnông- Bar hê kon hoc ta nkuăl ƀon têh Kon Tum, n’gor Kon Tum geh saơ ntưp đah srê SARS-Cov2 lah kon hoc nti jrô 3 n’hanh jrô 5 nti ta ngih nti Tiểu học Hoàng Văn Thụ, phường Quyết Thắng. Lôch geh nău mbơh, ntŭk kan y tế nkuăl ƀon têh Kon Tum lĕ sŏk ntil xét nghiệm đah lĕ rngôch kon hoc n’hanh nai nti ta ngih nti.

Ăp nai nti lĕ geh tâm ôp đah mê̆ bơ̆ kon hoc ndrel nti đah bar hê oh geh ntưp nĕ vơt kon sĭt, an gŭ êng n’hanh tĭng nău ntĭm ăp mê̆ bơ̆ tât ta ngih dak si ntŭk gŭ nơm gay ma mbơh đah ntŭk kan dak si ntŭk hăn n’hanh tă tâm mâp n’hanh xét nghiệm an oh kon nơm. Ta năp nău ntoh geh 2 hê nuĭh ntưp tâm ngih nti, ndrel đah nău ntĭm đă ngăch ndăl uănh nđôi, joi nuĭh tă tâm mâp gay ma njrăng ntưp rêng âk, UBND nkuăl ƀon têh Kon Tum lĕ đă kon hoc ngih nti tiểu học Hoàng Văn Thụ rlu nti ta ngih nti jêng nti trực tuyến ta jay gay ma njrăng srê.

Nuĭh rblang: Thị Đoắt