VOV4.Mnông: Âk nar ba năp yor mih têh hô lĕ ƀư an âk ntŭk ƀư trong bâh nău nchrăp kan ƀư nkra mhe, n’hao ƀư ăp ntŭk tơm ta trong Quốc lộ 24 ntŭk hăn let nkuăl Kon Plông, n’gor Kon Tum geh rluh rlâm âk. Ta năp nău ăp, rnâng kan mât uănh nău nchrăp kan n’hanh ăp ntŭk pah kan dôl ndăn nkra ƀư leo kan gay ma nkre mât đăp mpăn trong hăn, nkre ntrôl ƀư ngăch nău kan tă mbrơi nkai yor mih sial âk nar ba năp.

Nău kơp bâh rnâng kan mât uănh nău nchrăp nkra ƀư trong hăn ta Kon Tum ta trong quốc lộ 24 an saơ, ta rnoh dơn kan mbrô 4 n’hanh mbrô 5 jong rlău 24km ntŭk hăn let nkuăl Kon Plông geh 6 ntŭk rluh rlâm pich neh đah nău khuch khat klâp ma 10 rmen prăk. Ntŭk kan mât nkra trong hăn n’gor Kon Tum an gĭt, ndrel đah nău ntĭm đă bâh ăp ntŭk leo kan ƀư kuaih nchoăn neh lŭ gay ma mât đăp mpăn trong hăn ta quốc lộ 24, ntŭk kan lĕ geh uănh năl na nê̆ mpeh rnoh prăk nkra mhe, nkre lah dăn đă n’gâng kan mât uănh ntung trong rgâl ntrong kan nkra mhe ta luy âm ta du đê̆ ntŭk gay ma nău kan nkra trong geh ƀư nâp lơn.

                        Nuĭh rblang: Thị Đoắt