VOV4.M'nông: Ôi 7/12, ta Nhih pah kan kruanh dak, Kruanh dak Nguyễn Xuân Phúc, Kruanh Hội đồng Quốc phòng n'hanh An ninh ƀư tơm rơh hop bôk năp Hội đồng Quốc phòng n'hanh An ninh năm kan 2021- 2026. Ta rơh hop, Hội đồng tâm nchră, an nău rgop mpeh tâm boh kan nsum đah ăp mpôl kan tahen, Công an n'hanh ăp n'gâng kan, ăp n'gor tâm njrăng, n'gang nuh srê Covid-19; ntrŭt ntrôl an n'hao tahen kơl mât đăp mpăn bah Liên hợp quốc; pah kan mât đăp mpăn rnă njrăng mạng n'hanh trong hăn lơh ta trôm mạng tâm nô nău aƀaơ. Mpeh bôk nău kan năm 2022, Kruanh dak, Kruanh Hội đồng lah rjăp tât nău ŭch geh rƀah gĭt nău lư, lor nchrăp rdâk njêng trong kan têh jong, trong nchrăp rdâng lơh đah nău tât duh jêr tâm nkual n'hanh lam ntŭr neh, Kruanh dak dăn đă ăp nuĭh lăp kan nsum, nhih pah kan bah Hội đồng mât uĕh nău khlay ƀư tơm tâm pah kan mât đăp mpăn njrăng n'gang neh dak, rnă njrăng bah neh dak. Lơn lah, lor nchrăp njrăng n'gang, rdâng lơh đah ăp ntul rlong rnă njrăng mô way ơm geh ta năp măt n'hanh jŏ jong. Hăn nkre đah nê lah n'hao dăng tâm rgop kan nsum lhăt đah njrăng n'gang neh dak, rnă njrăng n'hanh tâm boh dak bah dih, ntrŭt ntrôl tâm boh dak bah dih njrăng n'gang neh dak, rnă njrăng neh dak bah ơm, bah ngai./.

Nuĭh rblang: Điểu Thân