VOV4.M’nông – Kêng măng 6/1, ta Ntŭk kruanh dak, Kruanh dak Nguyễn Xuân Phúc jao nău ntrŭnh n’hao grat bah Trung tướng hao Thượng tướng đah ăp đồng chí Groi Kruanh N’gâng kan Công an Trần Quốc Tỏ n’hanh Lương Tam Quang. Ntoh ngơi ta nar ƀư jao nău ntrŭnh, ndơn măt kruanh Đảng, Ngih dak, mbah rhơn 2 đồng chí Groi Kruanh N’gâng kan Công an dơi n’hao grat bah Trung tướng hao Thượng Tướng, Kruanh dak Nguyễn Xuân Phúc uănh lah, đồng chí Trần Quốc Tỏ n’hanh đồng chí Lương Tam Quang lah ăp cán bộ geh nău mĭn êng nơm, nău mĭn nâp rjăp, nău rêh uĕh dơi ntĭm nti lôch ăp, nti âk n’hanh nău blău kan uĕh; dơi tiăr nti, ntŭl rlong n’hanh têh jêng bah nău ngăn pah kan, tâm lơh; geh âk nău blău ntĭm rđău, ƀĭt joet, mât uănh ăp ntŭk kan, ăp n’gor. Kruanh dak Nguyễn Xuân Phúc nsing nơm n’hanh mpŏng ăp đồng chí n’hanh nsum mpôl Đảng ủy Công an Trung ương, kruanh N’gâng kan Công an mât nâp nău rêh cách mạng kloh uĕh, nâp nâl tay n’hanh mât uĕh nău rêh n’hanh rup ndah nuĭh tahen Công an ƀon lan “Yor neh dak chuêl săk nơm, yor ƀon lan rhŏ kan” tâm lvang mhe.

Nŭih blang: Y Sưng Phê Ja