VOV4.M'nông: Kêng măng 27/12, Mpôl đại biểu Quốc hội nkual ƀon têh Hồ Chí Minh  pah kan đah Ủy ban nhân dân nkual ƀon têh gay groi nđôi nău tĭng ƀư trong kan, pháp luật mpeh pah kan dăp rgum ta nkual ƀon têh Hồ Chí Minh. Kruanh dak Nguyễn Xuân Phúc râng ta bôk ƀoh nhih pah kan Kruanh dak. Lah ta rnôk tâm nchră, Kruanh dak Nguyễn Xuân Phúc lah kloh, đah du nkual ƀon têh têh kơt nkual ƀon têh Hồ Chí Minh ri pah kan dăp rgum ân hăn lor du njuat, ân mpơl dơi nău kan têh jong, ƀư ntŭk nsing an ƀư trong nchrăp, rgum tơm ndơ bah lam dak n'hanh bah dih ngih dak, ntrŏng ăp rnoh tât kan na nê̆. Kruanh dak nchŏng kloh, nkual ƀon têh Hồ Chí Minh dôl plơ̆ rŭch bah kơi rđĭl đah ăp nkual ƀon têh têh tâm nkual mpeh hun hao wăng sa, nău dơi tâm rlong n'hanh săk geh nău rêh. Nuih n'hâm dâk hăn lor n'hanh ntŭk kan dâk lor bôk năp bah nkual ƀon têh đah lam dak dôl ta trong jŭr hŭch. Kruanh dak Nguyễn Xuân Phúc đă nkual ƀon têh ân grêt dêh ăp rnoh tât kan, ăp trong rƀŏng, ăp nău dơh geh gay ƀư lôch jêh dăp rgum, nkre ân dŏng dăp rgum lah tơm hun hao nkual ƀon têh du trong rĭng uĕh, trong tor lor, njuat hăn nâp n'hanh ngăn ngăn./.

 Nuĭh rblang: Điểu Thân