VOV4.M’nông – Măng 28/12, ta Nkual ƀon têh Tam Kỳ, Kruanh dak Nguyễn Xuân Phúc râng ƀư nkah gĭt 550 năm rnê moh săk Quảng Nam (1471-2021). Ntoh ngơi ta nar ƀư, Kruanh dak Nguyễn Xuân Phúc an gĭt, tă aơ 550 năm, Kađăch Lê Thánh Tôn lĕ moh săk an nkual neh Quảng Nam geh 3 Phủ: Thăng Hoa, Tư Nghĩa n’hanh Hoài Nhơn. Nĕ lah nău khlay nar aơ mô knŭng geh nkô̆ nău đah Quảng Nam ma hôm đah lĕ Đà Nẵng, Quảng Ngãi, Bình Định n’hanh n’ăp nkual Miền Trung. Quảng Nam, moh săk geh nkô̆ nău dơi uănh ngai jru hvi mpeh bri dak Việt he kơt nău ŭch rnoi mpôl têh dăng. Bah năp nĕ, ta kêng măng 28/12, Kruanh dak Nguyễn Xuân Phúc mâp măt ăp đồng chí ơm ƀư tỉnh ủy viên bah năm 1997 tât aƀaơ. Lah du đêt ntŭl rlong đah Quảng Nam aƀaơ kơt ntrong kan wăng sa hôm e jêt, nău geh rĭng bôk nuĭh đêt lơn nkôp đah rĭng geh nsum lam dak, ntung trung hôm e jêr jŏt; rnoh ach o hôm e âk 4,25%, uĕh blău nuĭh kan hôm e đêt, Kruanh dak Nguyễn Xuân Phúc đă: An geh du nău mĭn, du nău ŭch bah nuĭh Quảng Nam tâm năm tât.

Nuĭh rblang: Y Sưng Phê Ja