VOV4.M’nông – Geh tâm trôm ăp nău ƀư nkah gĭt 60 năm nar Wa Hồ hăn khâl ƀon tơm rơh tal 2 (8/12/1961-8/12/2021), nar 12/12, ta Nkual Di tích Kim Liên, xă Kim Liên, nkuăl Nam Đàn, n’gor Nghệ An ƀư nkah gĭt 60 năm Wa Hồ sĭt khâl ƀon tơm rơh tal 2 n’hanh sa nkra Jay nkah gĭt Kruanh dak Hồ Chí Minh tâm nkual di tích. Ntoh ngơi ta nar ƀư, Kruanh dak Nguyễn Xuân Phúc an gĭt, lôch nău rêh ƀư cách mạng, Wa yor neh dak ma ntlơi ngih wâl.

Kruanh dak Nguyễn Xuân Phúc râng nkah gĭt 60 năm Wa Hồ hăn khâl ƀon tơm rơh tal 2

Ngai ƀon tơm bah năm 1906 tât rnôk jêng nuĭh djôt bôk Đảng n’hanh Ngih dak, Wa Hồ knŭng sĭt khâl ƀon tơm geh 2 tơ̆, yơn Nuĭh njuăl lĕ nău nkah gĭt, nău yô̆ tă bah sam ƀŭt nchih, nău nchih njuăl sĭt ƀon tơm, ăp tơ̆ nkoch bri đah ƀon lan, cán bộ, đảng viên n’gor Nghệ An. Kruanh dak mĭn lah, Đảng, Ngih dak n’hanh nuĭh ƀon lan he mro mrăng nkah gĭt ăp n’hâm soan têh bah ăp nuĭh deh rnôk nĕ, bah rnăk wâl n’hanh ăp rnoi mpôl e che bah nuĭh lĕ deh, mât rong, ntĭm nti nuĭh kon têh dăng bah rnoi mpôl Việt Nam-Kruanh Hồ Chí Minh he.

Nŭih blang: Y Sưng Phê Ja