VOV4.M’nông – Ta năp nĕ, Kruanh dak Nguyễn Xuân Phúc lĕ rgum nchră đah Thủ tướng Campuchia Hun Sen. Ta rgum nchră, 2 Kruanh tâm ban ŭch mpeh ăp trong rƀŏng têh n’hao kan ndrel đah 2 dak tâm năm tât, tĭng nĕ mbra rgum mbơh ƀư săk rnglăy ăp hiệp định, tâm ton lĕ ký; mât ƀa ƀơ ăp rơh khâl, tâm mâp, tâm rgâl gưl prêh n’hanh ăp gưl, ăp trong ƀư kan ndrel ăp ding.

Kruanh dak Nguyễn Xuân Phúc rgum nchră đah Thủ tướng Campuchia Hun Sen

2 ding tâm ban ŭch ntrôl kan ndrel ta ăp nău kan ntĭm nti, tư pháp, nông-lâm-ngư-nghiệp, neh tu bri dak n’hanh ntŭk ntô, pâl nđaih; ntrôl tâm nchră hăn tât kơp dơn nsum mpeh Hộ chiếu vaccine, Sam ƀŭt kơp dơn chuh vaccind. Kruanh dak Nguyễn Xuân Phúc ŭch 2 ding tâm rgop tay, n’hao nău mĭn êng nơm bah ASEAN mpeh Biển Đông, mkra nău kan tâm pit đah trong đăp mpăn, tĭng luật pháp lam ntŭr neh.

Nŭih blang: Y Sưng Phê Ja