VOV4.M'nông: Tâm rnôk hăn khâl ngăn Liên bang Nga, kêng măng 1/12, Kruanh dak Nguyễn Xuân Phúc hŏ srĭng nău đah Thủ tướng Chính phủ Liên bang Nga Mikhail Mishustin ta Moscow. Kruanh dak Nguyễn Xuân Phúc lah rjăp, Đảng, Ngih dak Việt Nam way nkah gĭt nău ntop kơl têh kuâng ma Liên bang Nga an Việt Nam tâm rơh nsĭt tay đăp mpăn ntơm nơh tâm ban kơt rdâk njêng n'hanh hun hao neh dak aƀaơ.

Kruanh dak Nguyễn Xuân Phúc n'hanh Thủ tướng Mishustin hŏ rgum tâm ôp mpeh nô nău tâm boh Việt Nam – Liên bang Nga kalơ ăp trong kan, lơn lah wăng sa; mpơl nău rhơn an lah tâm boh tăch rgâl n'hanh ntuh kơl đah bar dak pơk hvi tay; tâm ban ŭch âk trong rƀŏng n'hanh trong nkra n'hao dăng lơn đŏng tâm boh kalơ ăp trong kan ntĭm- nti, khoa học - công nghệ, văn hóa, pâl nđaih, tâm nđŭr ƀon lan. Bar ding tâm ban ŭch âk mbra n'hao dăng tâm boh ƀư njêng vaccine tâm ban kơt dak si săm Covid-19.

Nuĭh rblang: Điểu Thân