VOV4.M'nông: Ta Jay mprơ Têh, nkual ƀon têh Hà Nội, hŏ ƀư Lễ mpư rnê n'hanh ntăm an săk ntơ "Ƀon lan kan lŏ mir Việt Nam ngăch prăl 2021”. Kruanh Quốc hội Vương Đình Huệ râng lễ mpư rnê. Ta rơh lễ, Kruanh Quốc hội Vương Đình Huệ n'hanh ăp kruanh rđău kan Đảng, Ngih dak hŏ ntăm an Kỷ niệm chương, Bằng khen mpư rnê 63 ƀon lan kan lŏ mir ngăch prăl, ntơh măt an hang rkeh ƀon lan kan lŏ mir ntoh lư lam dak.

Lah ta rơh lễ, Kruanh Ủy ban Trung ương MTTQ Việt Nam Đỗ Văn Chiến lah rjăp, Đảng n'hanh Ngih dak ntrŏng năl, tuch tăm mât rong, ƀon lan kan lŏ mir way geh nău khlay têh jong tâm n'gâng kan mhe, uĕh mhe, rdâk njêng n'hanh mât njrăng neh dak. Mpôl tơm ƀư hŏ n'glêh ntăm an săk ntơ ƀon lan kan lŏ mir Việt Nam ngăch prăl năm 2021 an 63 nuĭh ƀon lan tĭng 5 rmôt: trong kan mât rong; trong kan tuch tăm; trong kan mât rong têh hvi, rgum lĕ ma tui ka dak me, dak lêng; trong kan ƀư njêng, nkret njêng tăch rgâl rhŏ dŏng nău kan tuch tăm; trong kan blău ƀư njêng mhe, rgâl mbrô, geh nău dơi tâm rdâk njêng ƀon lan mhe n'hanh mât rnă njrăng neh dak./.  

Nuĭh rblang: Điểu Thân