VOV4.Mnông-Ôi nar 6/12, kruanh Quốc hội dak Cộng hòa Dân chủ Nhân dân Lào (CHDCND) Xaysomphone Phomvihane leo mpôl đại biểu gâl têh Quốc hội Lào n’hanh i ur tât khâl dak he. Ta ntŭk kan Quốc hội, kruanh Quốc hội Vương Đình Huệ n’hanh i ur lĕ vơt kruanh Quốc hội Lào ndrel đa i ur n’hanh mpôl kan gâl têh Quốc hội Lào.

Ta ăp rơh tâm nchră lôch rơh vơt, bar hê kruanh Quốc hội tâm ban ŭch dơn ngoăy uănh năl nău tâm boh kan chính trị- nchră nău đah dak bah dih ta lĕ rngôch ăp ntŭk kan mbơh nău mô rlu geh hun hao. Bol ma bar dak dôl geh tâm rdâng đah ăp nău ntul rlong hô bâh nuh srê Covid-19 yơn lĕ rnoh prăk geh tăch ndơ an dak bah dih đah bar dak tâm năm 2021 dơi geh 948 rkeh đôlar, hao 28% đah khay aơ năm ba năp. Ntuh kơl bâh Việt Nam ta Lào dâk tal pe tâm 54 dak dôl geh ntuh kơl ta Lào. Bar hê kruanh Quốc hội lĕ tâm mbơh têh hvi mpeh ntrong kan tâm kơl tâm let năp tay.

Di rơh aơ, bar hê kruanh Quốc hội lĕ geh râng saơ rơh pă ndơ dŏng tâm n’gâng kan dak si bâh Quốc hội Việt Nam kơl an Quốc hội Lào tâm nău kan njrăng rdâng nuh srê đah rnoh khlăy 1 rkeh đôlar.

Nuĭh rblang: Thị Đoắt